نبوت تےغیر زباناں دے بارےءچ بیان
14
1 مُحبت دے طالب رَہو تے رُوحانی نعمتاں دی وی سِک رکھو، خاص طور تے نبوت کرݨ دی نعمت دی۔ 2 کیوں جو جیہڑا کوئی غیر زبان ءچ گالھیں کریندے اوہ اِنسان نال نئیں بلکہ خُدا نال گالھیں کریندےاِیں واسطے جو اُوندی گالھ کوئی نئیں سمجھدا۔ اوہ رُوح القُدس دی قُدرت نال غیب دی گالھ آہدھے۔ 3 پَر جیہڑا نبوت کریندے اوہ لوکاں کُوں اُنہاں دی ترقی، نصیحت تے تسلی دے گالھیں آہدھے۔ 4 جیہڑا کوئی غیر زبان ءچ گالھیں کریندے اوہ آپنڑی ترقی کیتے اِینویں کریندے۔ پَر جیہڑا نبوت کریندے اوہ کلیسیا دی ترقی کیتے اِینویں کریندے۔5 میں چاہندا ہاں جو تُساں سارے غیر زباناں ءچ گالھیں کرو پَر زیادہ تر اِیہو چاہندا ہاں جو نبوت کرو۔ جے غیر زباناں بولنڑ آلا کلیسیا دی ترقی کیتے ترجمہ نہ کرے تاں نبوت کرݨ آلا اُوں کنُوں وَڈا ہے۔
6 اے بِھراؤ! جے میں تُہاڈے کولھ آ تے غیر زباناں ءچ گالھیں کراں پَر تُہاڈے نال کہیں مکاشفہ یا علم یا نبوت یا تعلیم دی گالھ نہ کراں تاں تُہاکُوں کیا فائدہ تھیسی؟ 7 جے بانسری یا بربط جیہے بے جان سازاں کُوں وَجیندے وَیلے اُنہاں آوازاں ءچ فرق نہ ہووے تاں اُنہاں ءچوں نِکلنڑ آلے سُر کیویں پچھانڑے ویسن؟ 8 جے نرسنگے دی آواز صاف سُنڑائی نہ ڈیوے تاں کوݨ جنگ کیتے تیار تھیسی؟ 9 اِینویں ای جے تُساں زبان کنُوں صاف صاف گالھ نہ آکھو تاں کوݨ تُہاڈی سمجھسی؟ تُساں ہوا نال گالھیں کرݨ آلے ہوسو۔ 10 دُنیا ءچ بہُوں ساریاں بولیاں ہِن پَر اُنہاں ءچوں کوئی وی بے معنی نئیں۔ 11 بس جے میں کہیں زبان کُوں سمجھ نہ سگاں تاں میں اُوں زبان دے بولنڑ آلے دی نگاہ ءچ غیر سمجھیا ویساں تے اوہ وی میڈی نگاہ ءچ غیر ہوسی۔ 12 جِیں وَیلے تُساں رُوحانی نعمتاں دی سِک رکھیندے ہِیوے تاں ایجھی کوشش کرو جو تُہاڈی رُوحانی نعمتاں دے وَدھارے نال کلیسیا دی ترقی تھیوے۔
13 اِیں واسطے جیہڑا کوئی غیر زبان ءچ گالھیں کریندے اوہ دُعا کرے جو اوہ اُوندا ترجمہ وی کر سگے۔ 14 کیوں جو جے میں غیر زبان ءچ دُعا کراں تاں میڈی رُوح تاں دُعا کریندی ہے پَر میڈی عقل بیکار رَہندی ہے۔ 15 اِیں واسطے کیا کرنڑا چاہیدے؟ میں رُوح نال وی دُعا کریساں تے عقل نال وی دُعا کریساں، رُوح نال وی حمد کریساں تے عقل نال وی حمد کریساں۔ 16 ورنہ جے تُوں فقط رُوح نال ای خُدا دی تعریف کریں تاں ناواقف بندہ تیڈی شُکر گُزاری اُتے کیویں ”آمین“ اکھیسی؟ کیوں جو اوہ نئیں جانڑدا جو تُوں کیا آہدھیں۔ 17 تُوں تاں بے شک چنگی طرحاں خُدا دا شُکر ادا کریندیں پَر اِیندے نال ڈوجھے دی ترقی نئیں تھیندی۔
18 میں خُدا داشُکر ادا کریندا ہاں جو میں تُہاڈے ءچوں ساریاں تُوں زیادہ غیر زباناں بولیندا ہاں۔ 19 پَر کلیسیا ءچ غیر زبان ءچ ڈاہ ہزار گالھیں آکھنڑ تُوں میکُوں ایہہ زیادہ پسند ہے جو بئے دی تعلیم کیتے فقط پنج گالھیں عقل نال آکھاں۔
20 بِھراؤ! تُساں سمجھ ءچ بال نہ بنڑو۔ بُرائی ءچ تاں بالاں وانگوں بنڑو پَر سمجھ ءچ بالغ بنڑ وَنجو۔ 21 کلام ءچ لکھیا ہے جو
”خُداوند فرمیندے میں اِیں اُمت نال
غیر زباناں تے پردیسیاں دی معرفت گالھیں کریساں،
وَل وی اوہ میڈی نہ سُنڑ سِن ۔“
22 بس غیر زباناں اِیمانداراں کیتے نئیں بلکہ غیر اِیمانداراں کیتے نشان ہِن۔ تے نبوت غیر اِیمانداراں کیتے نئیں بلکہ اِیمانداراں کیتے ہے۔
23 جے ساری کلیسیا ہِک جاہ جمع ہووے تے سارے دے سارے غیر زباناں بولنڑ لگ پووݨ تے کُجھ ناواقف یا غیر ایماندار لوک اندر آ وَنجنڑ تاں کیا اوہ تُہاکُوں پاگل نہ سمجھ سن؟ 24 پَر جے سارے نبوت کرݨ تے کوئی غیرایماندار یا غیر واقف شخص اُتھاں آ وَنجے تاں اوہ تُہاڈے گالھیں سُنڑ تے قائل تھی ویسی تے سارے اُونکُوں چنگی طرحاں پرکھ وی گِھنسن۔ 25 اُوندے دِل دے بھید ظاہر تھی ویسن تے اوہ وی مُنہ بھرنے ڈھے تے خُدا کُوں سجدہ کریسی تے مَنیسی جو ”خُدا سچ مُچ تُہاڈے ءچ ہے۔“
کلیسیا ءچ نظم و ضبط
26 بِھراؤ! کیا کرݨ چاہیدے؟ جِیں وَیلے تُساں عبادت کیتے جمع تھیندے ہِیوے تاں ہر ہِک دے دِل ءچ مزمُوریا تعلیم یا مکاشفہ یا غیر زبان یا اُوندا ترجمہ ہوندا ہے۔ بس سارا کُجھ رُوحانی ترقی کیتے ہوونڑا چاہیدے۔ 27 جے غیر زبان ءچ گالھیں کرنڑاں ہووے تاں ڈو یا زیادہ کنُوں زیادہ تَرے شخص واری واری بولنڑ تے کوئی اُوندا ترجمہ کرے۔ 28 جے کوئی ترجمہ کرݨ آلا نہ ہووے تاں غیر زبان بولنڑ آلا جماعت ءچ چُپ رَہوے تے دِل ای دِل ءچ خُدا نال گالھیں کر ے۔ 29 نبیاں ءچوں ڈو یا تَرے کلام کرݨ تے باقی اُنہاں دے کلام کُوں پرکھنڑ۔ 30 پَر جے ہِک دے کلام کریندے وقت کہیں ڈوجھے اُتے وحی نازل تھیوے تاں پہلا شخص چُپ تھی وَنجے۔ 31 کیوں جو تُساں سارے ہِک ہِک کر تے نبوت کر سگدے ہِیوے تے سارے لوک سِکھنڑ تے اُنہاں دا حوصلہ وَدھسی۔ 32 تے نبیاں دیاں رُوحاں نبیاں دے تابع ہوندیاں ہِن۔ 33 اِیں واسطے جو خُدا بدنظمی دا نئیں بلکہ امن دا بانی ہے۔
تے جِیویں مُقدساں دی کلیسیا ءچ دستور ہے 34 عورتاں کلیسیا دے مجمع ءچ چُپ رَہنڑ۔ اُنہاں کُوں بولنڑ دی اجازت نئیں بلکہ تابع رَہنڑ جِیویں جو تَورَیت ءچ وی لکھیا ہے۔ 35 ہاں جے کوئی گالھ پُچھنڑ چاہوے تاں گھر ءچ آپنڑے پائے کنُوں پُچھے۔ اِیں واسطے جو ایہہ شرم دی گالھ ہے جو عورت کلیسیا دے مجمعءچ بولے۔
36 کیا خُدا دا کلام تُہاڈے تُوں شروع تھیّا ہے یا فقط تُہاڈے تئیں پُجیا ہے؟ 37 جے کوئی آپنڑے آپ کُوں نبی یا رُوحانی سمجھے تاں اُونکُوں پتا ہوونڑاں چاہیدے جو جیہڑا کُجھ میں لکھدا ہاں خُداوند ای دا حُکم ہے۔ 38 جے کوئی نہ جانڑے تاں نہ جانڑے۔