تمہید
1
1 ایہہ خط پَولُس جیہڑا خُدا دی مرضی نال مسیح یسوع دا رسُول ہے تےتِیمُتھِیُس بِھرا دی طرفوں خُدا دی کلیسیا دے ناں جیہڑی کُرِنتھُس شہر ءچ ہے تے پورے اخیہ دے سارے مُقدساں دے ناں۔2 ساڈے باپ خُدا تے خُداوند یسوع مسیح دی طرفوں تُہاکُوں فضل تے اطمینان حاصل تھیندا رَہوے۔
پَولُس خُدا دا شُکر ادا کریندے
3 ساڈے خُداوند یسوع مسیح دے خُدا تے باپ دی حمد ہووے جیہڑا بہُوں ای رحیم باپ تے ہر طرحاں دی تسلی ڈیوݨ آلا خُدا ہے۔ 4 اُوہو ساڈے سارے مصیبتاں ءچ ساکُوں تسلی ڈیندے تاں جو اَساں اُوندی تسلی نال ڈوجھیاں کُوں وی تسلی ڈے سگوں جیہڑے کہیں وی قِسم دی مُصیبت ءچ مُبتلا ہِن۔ 5 کیوں جو جِیویں اَساں مسیح دے ڈُکھ ءچ زیادہ شریک تھیندے ہاں، اُونویں ای ساکُوں مسیح دےوسیلے تسلی وی زیادہ مِلدی ہے۔ 6 جے اَساں ڈُکھ برداشت کریندے ہئیں تاں اوہ تُہاڈی تسلی تے نجات کیتے ہے تے جے تسلی پَیندے ہیں تاں اوہ وی تُہاڈی تسلی کیتے ہےجِیندے سببّوں تُساں اُنہاں مُصیبتاں کُوں صبر نال برداشت کر سگسو جیہڑیاں اَساں وی برداشت کریندے ہئیں۔ 7 تے تُہاڈے بارے ءچ ساڈی اُمید مضبوط ہے کیوں جو ساکُوں یقین ہے جو جِیویں تُساں ڈُکھاں ءچ ساڈے نال شریک ہِیوے اُونویں ای تسلی ءچ وی شریک ہوسو۔
8 بِھراؤ! اَساں نئیں چاہندے جو تُساں اُوں مُصیبت کنُوں بے خبر رَہو جیہڑی آسیہ ءچ ساڈے اُتے آئی۔ ایہہ مُصیبت اِتی شدید تے ساڈی برداشت کنُوں باہر ہئی جو اَساں تاں زندگی کنُوں وی ہَتھ دھو بیٹھے ہاسے۔ 9 بلکہ اَساں محسوس کر گِھدا ہا جو ساڈی مَوت یقینی ہے۔ ایہہ اِیں واسطے تھیّا جو اَساں آپنڑی ذات دی بجائے اُوں خُدا اُتے بھروسہ رکُھوں جیہڑا مُردیاں کُوں زندہ کریندے۔ 10 اُونیں ساکُوں مَوت کنُوں بچا گِھدے تے بچیندا وی ہے تے ساکُوں پوری اُمید ہے جو اوہ وَل وی بچیندا رہسی۔ 11 تُساں رَل تے دُعا دے ذریعے ساڈی مدد کرو تاں جو اوہ فضل جیہڑا بہُوں سارے لوکاں دی دُعا دے وسیلے ساڈے اُتے تھیّا ہے، اُوندے کیتے بہُوں سارے لوک ساڈے بارےءچ خُدا دا شُکر کرݨ۔
پَولُس دے منصوبے ءچ تبدیلی دی حمایت
12 ساکُوں آپنڑے دِل دی اِیں گواہی تُوں ایہہ فخر ہے جو ساڈا چال چلنڑ دُنیا آلیاں کیتے تے خاص طور تے تُہاڈے ءچ جِسمانی حکمت دے نال نئیں بلکہ خُدا دے فضل دے نال ریہا یعنی ایجھی پاکیزگی تے سچائی دے نال جیہڑا خُدا دے لائق ہے۔ 13 اَساں تُہاکُوں بِیا گالھیں نئیں لکھدے سِوائے اُنہاں دے جِنہاں کُوں تُساں پڑھ تے سمجھدے وی ہِیوے۔ تے میکُوں اُمید ہے جو آخر تئیں سمجھدے وی رَہسو، 14 جِیویں تُہاڈے ءچوں کُجھ ساکُوں سمجھ گئے ہِیوے۔ وَل خُداوند یسوع دے ظہور دے ڈینہہ جِیویں اَساں تُہاڈے کیتے فخر دا باعث ہئیں ،اُونویں ای تُساں وی ساڈے کیتے فخر دا باعث ہوسو۔
15 اِیں بھروسے دی وجہ تُوں میں اِرادہ کیتا ہا جو پہلے تُہاڈے کولھ آواں تاں جو تُہاکُوں ڈو دفعہ فائدے تھیوݨ۔ 16 یعنی تُہاڈے کولُھوں تھیندا ہویا مَکِدُنیہ چلیا وَنجاں تے مَکِدُنیہ کنُوں تھی تے وَل تُہاڈے کولھ آواں۔ وَل تُساں میکُوں یہُودیہ دو روانہ کر ڈیوائے۔ 17 جِیں وَیلے میں اِرادہ کیتا تاں کیا غیر مستقل مزاجی نال کیتا؟ یا جیہڑے گالھیں دا اِرادہ کریندا ہاں کیا دُنیاوی طور نال کریندا ہاں جو ”ہاں، ہاں“ وی کراں تے ”نہ، نہ“ وی؟ 18 جِیویں خُدا سچاہے اُونویں ای تُہاڈے نال ساڈے قول ءچ ”ہاں“ تے ”نہ“، ڈوہائیں نئیں ہوندے۔ 19 کیوں جو خُدا دے پوتر یسوع مسیح جِیندی منادی اَساں یعنی سِیلاس، تِیمُتھیُس تے میں تُہاکُوں سُنڑائی، اُوندے ءچ ”ہاں“ تے ”نہ“ ڈوہائیں نہ ہَن بلکہ اُوندے ءچ ہمیشاں ”ہاں“ ای ریہی۔ 20 کیوں جو خُدا دے سارے وعدے مسیح ءچ ”ہاں“ دے نال پورے کیتے گئے ہِن۔ اِیں واسطے اَساں اُوندے وسیلے نال ”آمین“ آہدھے ہیں تاں جو ساڈے وسیلے خُدا دا جلال ظاہر تھیوے۔ 21 تےجیہڑا ساکُوں تے تُہاکُوں مسیح ءچ قائم رکھیندے تے ساکُوں مسح کر تے مخصوص کیتے، اوہ خُدا ای ہے 22 جئیں ساڈے اُتے مُہر وی کیتی تے رُوح القُدس بَیعانہ دے طور تےساڈے دِلاں ءچ ڈِتا۔
پَولُس دے آوݨ ءچ دیر دا مقصد