2
1 چنانچہ میں آپنڑے دِل ءچ پکا اِرادہ کر گِھدا ہا جو وَلا تُہاڈے کولھ غمگین تھی تے نہ آواں۔ 2 کیوں جو جے میں تُہاکُوں غمگین کراں تاں میکُوں کوݨ خوش کریسی، سِوائے اُنہاں دے جیہڑے میڈی وجہ کنُوں غمگین تھئے؟ 3 میں تُہاکُوں اِیہو گالھ لکھی ہئی aتاں جو اِینویں نہ تھیوے جو جِیں وَیلے میں آواں تاں میکُوں اُنہاں لوکاں کنُوں ڈُکھ پُجے جِنہاں کنُوں میکُوں خوشی مِلنی چاہیدی ہئی۔ میکُوں تُہاڈے ساریاں اُتے اِیں گالھ دا بھروسہ ہے جو جیہڑی میڈی خُوشی ہے اُوہو تُہاڈے ساریاں دی وی ہے۔ 4 میں بہُوں مصیبت تے پرشانی دی حالت ءچ بہُوں سارے ہنجو وہا وہا تے تُہاکُوں لکھیا ہا پَر میڈا مقصد تُہاکُوں ڈُکھ ڈیوݨ نہ ہا بلکہ میں چاہندا ہاں جو تُساں اُوں محبت کُوں جانڑو جیہڑی میکُوں تُہاڈے نال ہے۔قصُور وار کیتے معافی
5 جے کہیں شخص نیں ڈُکھ ڈِتے تاں فقط میکُوں ای نئیں بلکہ کہیں حد تئیں تُساں ساریاں کُوں ڈُکھ ڈِتے ۔اِیندے ءچ میں زیادہ سختی نئیں کرنڑا چاہندا۔ 6 ایجھے آدمی کیتے ایہہ سزا بہُوں ہے جیہڑی تُساں ساریاں اُوندے اُتے عائد کیتی۔ 7 بس ہُنڑ تُساں اُوندا قصُور معاف کر ڈیوو تے اُونکُوں تسلی ڈیوو۔ ایہہ نہ ہووے جو اوہ غم دی شدت کنُوں تباہ و برباد تھی وَنجے۔ 8 اِیں واسطے میں تُہاڈی مِنت کریندا ہاں جو اُونکُوں آپنڑی محبت دا یقین ڈیواؤ۔
9 میں اِیں واسطے وی لکھیا ہا جو تُہاڈا اِمتحان گِھناں جو تُساں سارے گالھیں ءچ فرمانبردار ہِیوے یا نئیں۔ 10 جِینکُوں تُساں معاف کریندے ہِیوے اُونکُوں میں وی معاف کریند اہاں۔ جے میں معافی ڈِتی تاں مسیح کُوں حاضر جاݨ تے تُہاڈی خاطر معاف کِیتا 11 اِینویں نہ تھیوے جو شیطان کُوں ساڈے تُوں فائدہ چاوݨ دا موقع مِل وَنجے کیوں جو اَساں اُوندی چال بازی کنُوں نا واقف نئیں۔
تروآس ءچ پَولُس دی بے چینی
12 جِیں وَیلے میں مسیح دی خُوشخبری دی تبلیغ کیتے تروآس پُجیا تاں خُداوند نیں میڈے کیتے خدمت دا دروازہ کھول ڈِتا ہا۔ 13 وَل وی میکُوں دِلی سکُون نہ تھیّا کیوں جو میڈا بِھرا طِطُس اُتھاں نہ ہا۔ اِیں واسطے میں اُنہاں لوکاں تُوں رُخصت تھی تے مَکِدُنیہ روانہ تھی گِیا۔
مسیح دے وسیلے نال فتح
14 پَر خُدا دا شُکر ہے جو اوہ ساکُوں مسیح دی فتح دے جلُوس ءچ ہمیشاں گِھن وَیندا ہے، تےاُونکُوں جاننڑ دی خوشبو ساڈے وسیلے نال ہر جاہ کھنڈیندے۔ 15 کیوں جو اَساں نجات پاوݨ آلیاں تے ہلاک تھیوݨ آلیاں ڈوہائیں کیتے خُدا دے حضور ءچ مسیح دی خوشبو ہئیں۔ 16 کُجھ کیتے تاں مَوت ڈیوݨ آلی بدبُو تے کُجھ کیتے زندگی ڈیوݨ آلی خوشبُو ہئیں تےکوݨ ایجھے کَم دے لائق ہے؟ 17 اِیں واسطے اَساں اُنہاں اکثر لوکاں وانگوں نئیں جیہڑے خُدا دے کلام ءچ مِلاوٹ کریندے ہِن بلکہ خُدا دی طرفوں تے خُدا کُوں حاضر جاݨ تے مسیح ءچ سچے دِل نال بولیندے ہیں۔