‏4 مسیح دی معرفت خُدا اُتے ساڈا ایجھا ای بھروسہ ہے۔ ‏5 ایہہ گالھ نئیں جو ساڈے ءچ کوئی لیاقت ہے جو اَساں خود کُجھ کرݨ دا دعویٰ کر سگوں بلکہ ساڈی لیاقت خُدا دی طرفوں ہے، ‏6 جئیں ساکُوں نویں عہد دے خادم تھیوݨ دے لائق وی بنڑایا ہے۔ ایہہ عہد لفظاں اُتے نئیں بلکہ رُوح اُتے قائم ہے کیوں جو لفظاں آلا عہد (یعنی شریعت) مار سَٹیندے پَر رُوح القُدس زندگی عطا کریندے ^a۔

‏7 جیں وَیلے اوہ مَوت گِھن آوݨ آلا نِظام جِیندے الفاظ پتھر دیاں تختیاں اُتے لکھے گئے ہَن، ایجھا جلالی ہا جو بنی اِسرائیل کُوں موسیٰ دے چہرے دے نُور کُوں ڈیکھنڑ دی تاب نہ ہئی بھانویں جو اوہ نُور گَھٹدا وَیندا ہا، ‏8 تاں رُوح القُدس دا نِظام اُوں کنُوں کِتی جلال آلا ہوسی؟ ‏9 جِیں وَیلے قصُوروار قرار ڈیوݨ آلا نِظام جلال آلا ہے تاں راستباز قرار ڈیوݨ آلا نِظام کِتی زیادہ جلال آلا ہوسی۔ ‏10 بلکہ جیہڑا پہلے جلال آلا ہا، ہُنڑ اِنتہائی جلال آلے دے مقابلے ءچ غیر جلالی لگدا ہے۔ ‏11 کیوں جو جِیں وَیلے مِٹ وَنجنڑ آلا نِظام جلالی ہا تاں ہمیشاں تئیں قائم رَہنڑ آلا نِظام تاں بہُوں ای جلال آلا ہوسی۔

‏12 بس ایجھی اُمید رکھیندے ہوئے اَساں بہُوں دلیری نال بولیندے ہئیں۔ ‏13 اَساں موسیٰ وانگوں نئیں جئیں آپنڑے چہرے اُتے نقاب سَٹ گِھدا ہا تاں جو بنی اِسرائیل اُوں مِٹ وَنجنڑ آلے جلال کُوں نہ ڈیکھ سگنڑ۔ ‏14 اُنہاں دے ذہن سخت تھی گئے تے اَج تئیں پُرانڑے عہد دی کتاباں کُوں پڑھدے وَیلے اُنہاں دے دِل اُتے پردہ پِیا رَہندے ۔ایہہ پردہ صرف اُونہئی وَیلے اُٹھدے جِیں وَیلے کوئی مسیح اُتے اِیمان گِھن آندے۔

‏15 اَج تئیں جِیں وَیلے موسیٰ دی کتاب پڑھی وَیندی ہے، اُنہاں دے دِل اُتے اُوہو پردہ پِیا رَہندے۔ ‏16 پَر جِیں وَیلے کہیں دا دِل خُداوند کی طرف رجوع کریسی تاں اوہ پردہ ہَٹا ڈِتا ویسی۔ ‏17 کیوں جو خُداوند رُوح ہے تے جِتھاں خُداوند دا رُوح القُدس ہے اُتھاں آزادی ہے۔ ‏18 اِیں واسطے اَساں ساریاں دے بے نقاب چہریاں تُوں خُداوند دا جلال منعکس تھیندے جِیویں شیشے ءچوں، تاں اَساں خُدا دے رُوح القُدس دے وسیلے تُوں اُوندے جلال آلی صورت ءچ آہستہ آہستہ بَدلدے وَیندے ہئیں۔