اَسمان اُتے نواں جسم
5
1 اَساں جانڑدے ہئیں جو جِیں وَیلے ایہہ تمبو سَٹ ڈِتا ویسی جیہڑازمین اُتے ساڈا گھر ہے (یعنی ساڈا بدن) تاں ساکُوں خُدا کنُوں اَسمان اُتے ایجھا گھر مِلسی جیہڑا اِنسانی ہَتھ دا بنڑیا ہویا نئیں بلکہ اَبدی ہے۔ 2 اِیں واسطے اَساں اِیں موجودہ تمبو(بدن ) ءچ کراہندے ہئیں تے ساکُوں بہُوں سِک ہے جو اَساں آپنڑے اَسمانی گھر کُوں پُشاک وانگوں پا گِھنوں، 3 تاں جو اُونکُوں پا گِھننڑ دے بعد ننگے نہ رَہوں۔ 4 اَساں اِیں تمبو ءچ رَہندے ہوئے بھار کنُوں کراہندے ہئیں اِیں واسطے نئیں جو اَساں اِیں بدن کُوں چھوڑنا چاہندے ہئیں بلکہ اِیندے اُتے ڈوجھا بدن پُشاک وانگوں پاگِھننڑ چاہندے ہئیں تاں جو جیہڑا فانی ہے اوہ اَبدی زندگی ءچ غرق تھی وَنجے۔ 5 خُدا نیں خُود ساکُوں اِیں گالھ کیتے بنڑایا ہے تے رُوح القُدس ساکُوں بَیعانہ ءچ ڈِتا۔6 بس اَساں ہمیشاں مطمئن رَہندے ہئیں تے ایہہ جانڑدے ہیں جو جئیں تئیں اَساں بدن دے گھر ءچ ہیں، خُداوند دے گھر کنُوں پَرے ہئیں۔ 7 کیوں جو اَساں اِیمان اُتے چلدے ہیں نہ جو اَکھیں نال ڈیکھنڑ نال۔ 8 ہاں، اَساں مطمئن ہئیں تے ساکُوں ایہہ بدن چھوڑتے خُداوند دے گھر ءچ رَہنڑا زیادہ منظُور ہے۔ 9 بھانویں اَساں گھر ءچ ہوؤں یا اُوں کنُوں پَرے، ساڈا مقصد تاں اُونکُوں خوش رکھنڑ ہے۔ 10 کیوں جو اَساں ساریاں کُوں مسیح دی تختِ عدالت دے سامنڑے حاضر تھیونڑاں ہے تاں جو ہر شخص آپنڑے چنگے یا بُرے اعمال دا بدلہ پاوے جیہڑے اُونیں آپنڑے بدن ءچ رہ تے کیتے ہِن۔
مسیح دے وسیلے نال خُدا دے نال میل ملاپ
11 اَساں خُداوند دے خوف کُوں سامنڑے رکھ تے ڈوجھیاں کُوں سمجھاوݨ دی کوشش کریندے ہیں ۔خُدا دے اَگوں ساڈی حقیقت ظاہر ہے تے میکُوں اُمید ہے جو تُساں وی ساکُوں چنگی طرحاں جانڑدے ہوسو۔ 12 اِیندا مطلب ایہہ نئیں جو اَساں تُہاڈے سامنڑے وَلا کنُوں آپنڑے نیک تھیوݨ دا اعلان کرݨ لگے ہئیں بلکہ تُہاکُوں موقع ڈیوݨ چاہندے ہئیں جو تُساں ساڈے اُتے فخر کر سگو تے اُنہاں کُوں جواب ڈے سگو جیہڑے ظاہری گالھیں اُتے فخر کریندے ہِن پَر دِل دے گالھیں اُتے نئیں۔ 13 جے اَساں دیوانے ہیں تاں خُدا دے واسطے ہئیں، تے جے ہوش ءچ ہئیں تاں تُہاڈے کیتے۔ 14 اَساں مسیح دی مُحبت دے سببّوں مجبور ہئیں کیوں جو اَساں اِیں نتیجے اُتے پُجے ہئیں جو جِیں وَیلے مسیح ساریاں کیتے مویا تاں سارے مَر گئے۔ 15 تے اوہ اِیں واسطے ساریاں دی خاطر مُویا جو جیہڑے زندہ ہِن اوہ وَلا آپنڑی خاطر زندہ نہ رَہوݨ بلکہ فقط اُوندی خاطر جیہڑا اُنہاں کیتے مُویا تے وَلا زندہ تھی گِیا۔
16 بس ہُنڑ اَساں کہیں کُوں جِسمانی حیثیت نال نئیں جانڑدے، ہاں بھانویں ہِک وقت اَساں مسیح کُوں وی اُونویں ای جانڑیا ہا پَر ہُنڑ اُونکُوں اِینویں نئیں جانڑدے۔ 17 اِیں واسطے جے کوئی مسیح ءچ ہے تاں اوہ نویں مخلوق ہے۔ پُرانڑے چیزاں وَیندیاں رہیاں، ڈیکھو اوہ ساریاں نویاں تھی گئیاں۔ 18 ایہہ سبھ خُدا دی طرفوں ہے جئیں مسیح دے ذریعے ساڈے نال میل ملاپ کر گِھدا، تے میل ملاپ کرݨ دی خدمت ساڈے سپُرد کر ڈِتی۔ 19 مطلب ایہہ ہے جو خُدا نیں مسیح ءچ دُنیا آلیاں نال میل ملاپ کیتا تے اُنہاں کُوں اُنہاں دے گُناہاں دے ذمہ نہ لایا تے اُونیں میل ملاپ دا ایہہ پیغام ساڈے سپُرد کر ڈِتا ہے۔