مسیحی خیرات
8
1 بِھراؤ! اَساں تُہاکُوں خُدا دے اُوں فضل دے بارے ءچ ڈسیندے ہئیں جیہڑا مَکِدُنیہ دی کلیسیاواں اُتے تھیّا۔ 2 جو کیویں سخت مُصیبت دی اَزمائش ءچ اُنہاں دی وَڈی خوشی تے سخت غریبی نیں اُنہاں دی سخاوت کُوں بہُوں وَدھا ڈِتا۔ 3 میں اِیں گالھ دا گواہ ہاں جو اُنہاں جِتی اوہ ڈے سگدے ہَن ڈِتا بلکہ گنجائش کنُوں وی زیادہ آپنڑی خوشی نال ڈِتا۔ 4 اُنہاں ساکُوں مُقدساں دی خیرات دی خدمت ءچ شراکت کیتے مِنت کر تے درخاست کیتی۔ 5 تے ساڈی اُمید دے مطابق ای نہ ڈِتا بلکہ خُدا دی مرضی نال پہلے آپنڑے آپ کُوں خُداوند دے تے وَل ساڈے سپُرد کیتا۔ 6 اِیں واسطے اَساں طِطُس کُوں ہدایت کیتی جو جِیویں اُونیں پہلے شروع کیتا ہا، اُونویں ای تُہاڈے ءچ اِیں خیرات دے کَم کُوں پورا کرے۔ 7 بس جِیویں تُساں ہر گالھ ءچ یعنی اِیمان ءچ ، کلام ءچ ، علم ءچ ، جوش ءچ تے ساڈے نال مُحبت ءچ ڈوجھیاں کنُوں اَگوں وَدھ گئے ہِیوے، اُونویں ای اِیں خیرات دے کَم ءچ وی اَگوں نِکل وَنجو۔8 میں تُہاکُوں حُکم نئیں ڈیندا پِیا بلکہ اِیں واسطے جو ڈوجھیاں دے جوش نال تُہاڈی مُحبت دی سچائی کُوں اَزماواں۔ 9 کیوں جو تُساں ساڈے خُداوند یسوع مسیح دے فضل کُوں جانڑدے ہِوےجو اوہ بھانویں جو دولت مند ہا، وَل وی تُہاڈی خاطر غریب بنڑ گِیا تاں جو تُساں اُوندی غریبی دے سببّوں دولت مند بنڑ وَنجو۔
10 ہُنڑ میڈے خیال ءچ تُہاڈے کیتے اِیہو چنگا ہے جو جِیویں تُساں پچھلے سال نہ فقط اِیہو کَم ءچ بلکہ اِیندے ارادے ءچ وی اول ہِیوے، 11 ہُنڑ اِیں کَم کُوں پورا وی کرو تاں جو جِیویں تُساں ارادہ کرݨ ءچ تیار ہَوے اُونویں ای آپنڑی گنجائش دے مُوافق اُونکُوں پورا کرݨ ءچ زور لاؤ۔ 12 کیوں جو جے نیت ہووے تاں خیرات اُوندے مطابق مقبول تھیسی جیہڑی اُوندے کولھ ہے، نہ جو اُوندے مطابق جیہڑی اُوندے کولھ نئیں۔
13 میڈا ایہہ مطلب نئیں جو بئیاں کُوں آرام مِلے تے تُہاکُوں تنگی بلکہ برابری ہووے۔ 14 اِیں وَیلے تُہاڈی دولت نال اُنہاں دی کمی پوری تھیوے تاں جو اُنہاں دی دولت دے نال تُہاڈی وی کمی پوری تھیوے تے اِینویں برابری تھی وَنجے۔ 15 جیویں لکھیا ہے جو
”جئیں بہُوں جمع کیتا اُوندا کُجھ زیادہ نہ تھیّا
تے جئیں تھوڑا جمع کیتا اُوندا تھوڑا نہ تھیّا ۔“
طِطُس تے اُوندے ہم خدمت
16 خُدا دا شُکر ہے جیہڑا تُہاڈے کیتے طِطُس دے دِل ءچ ایجھا جوش پیدا کریندے جِیویں میڈا تُہاڈے کیتے ہے۔ 17 اُونیں نہ فقط ساڈی درخاست قبول کیتی بلکہ اوہ بہُوں جوش نال تے آپنڑی خوشی نال تُہاڈے دو روانہ تھیّا۔ 18 اَساں اُوندے نال اُوں بِھرا کُوں بھیجیندے پئے ہاں جِیندی تعریف خُوشخبری دی تبلیغ کرݨ دی وجہ کنُوں ساری کلیسیاواں ءچ تھیندی پئی ہے۔ 19 تے فقط اِیہو نئیں بلکہ کلیسیاواں نیں اُونکُوں مُقرر کیتے جو اوہ خیرات دے اِیں کَم ءچ ساڈا ہم سفر بنڑے۔ اَساں ایہہ کَم خُداوند دے جلال کیتے تے آپنڑی خدمت دے شوق کُوں ظاہر کرݨ کیتے کریندے ہئیں۔
20 اَساں اِیں کنُوں بچدے ہئیں جو جِیں خیرات دا اَساں انتظام کریندے ہئیں اُوندے بارے ءچ کوئی ساڈے اُتے اَنگل نہ چاوے۔ 21 اَساں ایجھے کَم کرݨ دی کوشش کریندے ہئیں جیہڑے نا صِرف خُداوند دی نظر ءچ چنگے ہووݨ بلکہ اِنساناں دی نظر ءچ وی۔
22 تے اَساں اُنہاں ڈوہاں دے نال اُوں بِھرا کُوں بھیجیندے پئے ہاں جِینکُوں اَساں بہُوں سارے گالھیں ءچ چنگی طرحاں اَزمایا تے بہُوں پُرجوش ڈِٹھا ہے۔ ہُنڑ کیوں جو تُہاڈے اُتے بہُوں بھروسہ ہے، اِیں واسطے اوہ بِیا وی پُرجوش تھی گِیا ہے۔ 23 جے کوئی طِطُس دے بارے ءچ پُچھے تاں اوہ میڈا ساتھی تے تُہاڈی مدد کیتے میڈا ہم خدمت ہے۔ بِیاں بِھراواں دے بارے ءچ ایہہ ہے جو اوہ کلیسیاواں دے نمائندے تے مسیح کُوں جلال ڈیندے ہِن۔ 24 بس آپنڑی مُحبت تے ساڈے اُوں فخر کُوں جیہڑا تُہاڈے اُتے ہے، کلیسیاواں دے سامنڑے ثابت کرو۔