‏5 میں سمجھدا ہاں جو میں اُنہاں ”افضل رسُولاں“ کنُوں کمتر نئیں۔ ‏6 بھانویں میں تقریر کرݨ ءچ بے شعور سہی پَر علم دے لحاظ نال نئیں بلکہ اِیندا ثبوت تاں اَساں تہاکُوں ہر گالھ ءچ ہر طرحاں ڈے ڈِتے۔

‏7 کیا ایہہ جُرم ہا جو میں خُدا دی خُوشخبری تُہاکُوں مُفت سُنڑاتے آپنڑے آپ کُوں پست کیتا تاں جو تُساں اُچے تھی وَنجو ؟ ‏8 میں ڈوجھی کلیسیاواں کُوں لُٹیا یعنی اُنہاں کنُوں مدد گِھدی تاں جو تُہاڈی خدمت کراں۔ ‏9 تے جِیں وَیلے میں تُہاڈے کولھ ہم تے میکُوں ضرورت تھئی تاں میں تُہاڈے ءچوں کہیں کُوں ذرا وی تکلیف نہ ڈِتی کیوں جو مَکِدُنیہ کنُوں مسیحی بِھراواں نیں آ تے میڈی ضرورت پوری کر ڈِتی ہئی۔ میں تُہاڈے اُتے کوئی بھار نئیں سَٹیا تے نہ ای وَلا سَٹیساں۔ ‏10 مسیح دی صداقت دی قسم جیہڑی میڈے ءچ ہے، اَخیہ ءچ کوئی شخص میکُوں اِیں فخر کرݨ کنُوں روک نہ سگسی۔ ‏11 آخر کیوں؟ کیا اِیں واسطے جو میں تُہاڈے نال مُحبت نئیں رکھیندا؟ خُدا جانڑدے جو میں تُہاڈے نال مُحبت رکھیندا ہاں۔

‏12 جیہڑا کُجھ میں کریندا ہاں اُوہو کریندا رَہساں تاں جو اُنہاں کُوں موقع نہ ڈیواں جیہڑے فخر کر تے دعویٰ کریندے ہِن جو اُنہاں دے کَم ساڈے وانگوں ہِن۔ ‏13 کیوں جو ایجھے لوک کُوڑے رسُول تے دغا بازی نال کَم کرݨ آلے ہِن تے آپنڑے آپ کُوں مسیح دے رسُولاں دے ہم شکل بنڑا گِھندے ہِن۔ ‏14 تے ایہہ کوئی انوکھی گالھ نئیں کیوں جو شیطان وی آپنڑے آپ کُوں نُورانی فرشتہ دا ہم شکل بنڑا گِھندے۔ ‏15 اِیں واسطے ایہہ کوئی وَڈی گالھ نئیں جے اُوندے خادم وی آپنڑے آپ کُوں راستبازی دے خادماں وانگوں بنڑا گِھننڑ۔ پَر اُنہاں دا انجام اُنہاں دے کَماں دے مطابق ہوسی۔

‏16 میں وَلا آہدھا ہاں جو کوئی میکُوں بیوقوف نہ سمجھے۔ نہ تاں بیوقوف سمجھ تے ای قبول کر گِھنو تاں جو میں وی آپنڑے آپ اُتے تھوڑا جِیہا فخر کراں۔ ‏17 میں جیہڑا کُجھ آہدھا ہاں اوہ خُداوند دی طرفوں نئیں بلکہ بیوقوفی نال تے فخر کرݨ دی جرأت نال آہدھا ہاں۔ ‏18 تےجِیں وَیلے بہُوں سارے اِنسانی طور تے فخر کریندے ہِن تاں میں وی کریساں۔ ‏19 تُساں ایجھے عقل مندہِوے جو بیوقوفاں دے گالھیں خوشی نال سُنڑ گِھندے ہِیوے۔ ‏20 جِیں وَیلے کوئی تُہاکُوں غلام بنڑیندے یا کوئی تُہاکُوں لُٹیندے، جے کوئی تُہاکُوں دھوکا ڈیندے، جے کوئی تُہاڈے اُتے رُعب پیندے، جے کوئی تُہاڈے مُنہ اُتے چاٹ مار ڈیندے تاں تُساں برداشت کر گِھندے ہِیوے۔ ‏21 میڈا ایہہ آکھنڑ شرمساری دا باعث ای سہی جو اَساں ایجھا کرݨ کیتے کمزور ہاسے۔

پَر جے کوئی کہیں گالھ اُتے فخر کرݨ ءچ دلیر ہے (بھانویں میڈا ایہہ آکھنڑ بیوقوفی ای ہے ) تاں میں وی دلیر ہاں۔ ‏22 کیا اُوہو عبرانی ہِن؟ میں وی ہاں۔ کیا اُوہو اِسرائیلی ہِن؟ میں وی ہاں۔ کیا اُوہو اِبرہام دی نسل ہِن؟ میں وی ہاں۔ ‏23 کیا اُوہو مسیح دے خادم ہِن؟( میڈا ایہہ آکھنڑ بیوقوفی سہی ) میں اُنہاں کنُوں وَدھ ہاں۔ میں بہُوں زیادہ محنت کیتی، اَن گِنت کوڑےکھادے، بہُوں دفعہ قید تھیّا، کئی پھیری مَوت دا سامنڑا کیتا ہے۔ ‏24 میں یہُودیاں دے ہَتھوں پَنج پھیری ہِک گَھٹ چالیہہ چالیہہ کوڑے کھادے، ‏25 تَرے پھیری بینت لگے، ہِک پھیری سنگسار وی کیتا گِیا، تَرے پھیری جہاز دے تباہ تھیوݨ دا سامنڑا کیتا، ہِک ڈینہہ تے ہِک رات کُھلے سمندر ءچ گُزاری۔ ‏26 میں کئی پھیری سفر ءچ، دریا دے خطریاں ءچ ، ڈاکوواں دےخطریاں ءچ ، آپنڑی قوم آلیاں دے خطریاں ءچ ، غیر قوماں دے خطریاں ءچ ، شہر دےخطریاں ءچ ، بیابان دے خطریاں ءچ، سمندر دےخطریاں ءچ ، کُوڑے بِھراواں دےخطریاں ءچ۔ ‏27 محنت تے مُشقت ءچ ، بہُوں پھیری رات بھر جاگدے ہوئے، بُھک تے پیاس دی مُصیبت ءچ ، بہُوں پھیری فاقے دی حالت ءچ ، سردی تے ننگے پن دی حالت ءچ رِیہا ہاں۔ ‏28 اِنہاں سارے گالھیں تُوں علاوہ ساریاں کلیسیاواں دی فِکر دا بوجھ میکُوں ہر روز دَبیندا ہے۔ ‏29 کِیندی کمزوری نال میں کمزور نئیں تھیندا تے کِیندے ٹھوکر کھاوݨ تُوں میڈا دِل نئیں ڈُکھدا؟

‏30 جے میکُوں فخر کرنڑا ای ہے تاں میں اِنہاں گالھیں اُتے فخر کریساں جیہڑیاں میڈی کمزوری نال تعلق رکھیندیاں ہِن۔ ‏31 خُداوند یسوع دا خُدا تے باپ ، جِیندی ہمیشاں تئیں حمد تھیوے، جانڑدا ہے جو میں کُوڑ نئیں مَریندا۔ ‏32 دمشق شہر دے حاکم نیں جیہڑا اَرِتاس بادشاہ دے ماتحت ہا، شہر دے پھاٹکاں اُتے پہرہ بِلہا ڈِتا ہا تاں جو میکُوں گرفتار کر گِھدا وَنجے۔ ‏33 پَر میکُوں ٹوکرے ءچ بِلہا تے دیوار دی کھڑکی کنُوں باہر تَلے لَہا ڈِتا گِیا تے اِینویں میں اُوندے ہَتھوں بچ تے نِکل گِیا۔