‏3 خُدا باپ تے ساڈے خُداوند یسوع مسیح دی طرفوں تُہاکُوں فضل تے اِطمینان حاصل تھیندا رَہوے۔

‏4 یسوع نیں آپنڑے آپ کُوں ساڈے گُناہاں کیتے قُربان کر ڈِتا تاں جو اوہ ساکُوں ساڈے خُدا تے باپ دی مرضی دے مطابق اِیں موجودہ بُرے زمانے کنُوں بچا گِھنے۔ ‏5 خُدا دی تمجید ہمیشاں تئیں تھیندی رَہوے۔ آمین۔

‏6 میکُوں حیرانگی ہے جو تُساں اِتنی جلدی اُوں خُدا کُنوں مُنہ پھیریندے پئیے ہِیوے جئیں تہاکُوں مسیح دے فضل نال سَڈیا تے کہیں بئی خُوشخبری دو متوجہ تھیندے پئے ہِیوے۔ ‏7 کوئی ڈوجھا ہے ای کائنا۔ ہاں، کُجھ لوک تُہاکُوں پریشان کریندے پئے ہِن جیہڑے مسیح دی خوشخبری کُوں تروڑ مروڑ تے پیش کریندے ہِن۔ ‏8 جے اَساں یا اَسمان دا کوئی فرشتہ اُوں خُوشخبری دے علاوہ جیہڑی اَساں تُہاکُوں سُنڑائی ہے کوئی بئی خوشخبری سُنڑیندا ہے تاں اوہ ملعون تھیوے۔ ‏9 جِیویں اَساں پہلے آکھ ڈِتا ہے اُونویں ای میں وَلا آہدھا ہاں جو اُوں خُوشخبری دے علاوہ جئیں اُتے تُساں اِیمان گِھن آئے ہَوے، جے کوئی تُہاکُوں بئی خوشخبری سُنڑاوے تاں ملعون تھیوے۔

‏10 کیا میں آدمیاں دا منظور ِ نظر بننڑاں چاہندا ہاں یا خُدا دا؟ جے میں ہُنڑ تئیں آدمیاں کُوں خوش کرݨ دی کوشش ءچ لگا رَہندا تاں مسیح دا خادم نہ ہوندا۔

‏11 بِھراؤ! میں تُہاکُوں ڈساوݨ چاہندا ہاں جو جیہڑی خوشخبری میں تُہاکُوں سُنڑائی ہے اوہ کہیں اِنسان دی گھڑی ہوئی نئیں۔ ‏12 میں اُونکُوں کہیں آدمی کنُوں نئیں گِھدا نہ اوہ میکُوں سِکھائی گئی بلکہ اُوندا مُکاشفہ میکُوں یسوع مسیح دی طرفوں تھیّا۔

‏13 تُساں تاں سُنڑیا ہے جو جِیں وَیلے میں یہُودی طور طریقے دا پابند ہم تاں میڈا چل چلن کیجھا ہا۔ میں خُدا دی کلیسیا کُوں کیویں حد تُوں زیادہ سَتیندا تے اُنہاں کُوں تباہ کرݨ دی کوشش کریندا ہم۔ ‏14 میں یہُودی طور طریقے ءچ آپنڑے زمانے دے یہُودیاں کنُوں زیادہ وَدھدا وَیندا ہم تے بزُرگاں دی روایتاں اُتے غیرت نال عمل کریندا ہم۔

‏15 پَر خُدا نیں جئیں میکُوں میڈی پیدائش کنُوں پہلے ای چُنڑ گِھدا تے آپنڑے فضل نال میکُوں آپنڑی خدمت کیتے سَڈوا گِھدا جِیں وَیلے اُوندی منشا تھئی ‏16 تاں آپنڑے پوتر کُوں میڈے ءچوں ظاہرکیتا تاں جو میں غیر قوماں کُوں اُوندی خوشخبری سُنڑاواں۔ تاں میں خون تے گوشت کنُوں صلاح نہ گِھدی، ‏17 تے نہ یروشلیم ءچ اُنہاں دے کولھ گِیا جیہڑے میں کنُوں پہلے رسُول مُقرر کیتے گئے ہَن بلکہ فوراً عرب دو چلیا گِیا وَل اُتھوں دمشق دو وَل آیا۔ ‏18 تَرے سال بعد کیفا ^a نال مُلاقات کرݨ کیتے یروشلیم گِیا تے پندرہ ڈینہہ تئیں اُوندے کولھ ریہا۔ ‏19 پَر ڈوجھے رسُولاں ءچوں سِوائے خُداوند دے بِھرا یعقوب دے کہیں کُوں نہ مِلیا۔

‏20 جیہڑے گالھیں میں تُہاکُوں لکھدا پِیا ہاں خُدا کُوں حاضر جاݨ تے اَکھیندا ہاں جو اوہ کُوڑیاں نئیں۔

‏21 اِیندے بعد میں سُوریہ تے کلکیہ دے علاقیاں ءچ گِیا۔ ‏22 یہُودیہ دی مسیحی کلیسیاواں میڈی شکل و صورت کنُوں واقف تاں نہ ہَن ‏23 پَر اوہ صِرف ایہہ سُنڑدیاں ہَن جو ”جیہڑا شخص پہلے ساکُوں سَتیندا ہا اوہ ہُنڑ اُوں ایمان دی تبلیغ کریندے جِینکُوں برباد کرݨ دی کوشش کریندا ہا۔“ ‏24 تے اوہ میڈے سببّوں خُدا دی تمجید کریندیاں ہِن۔