‏6 جماعت دے اوہ ارکان جیہڑے معتبر سمجھے وَیندے ہَن ( اوہ کیجھے وی ہَن، میکُوں اِیندے نال کُجھ واسطہ نئیں کیوں جو خُدا کہیں آدمی دا طرفدار نئیں )اُنہاں کنُوں میڈی تبلیغ ءچ کجھ اضافہ نہ تھیّا۔ ‏7 بلکہ جِیں وَیلے اُنہاں کُوں ایہہ معلوم تھیّا جو جِیویں مَختُوناں کُوں خوشخبری سُنڑاوݨ دا کَم پطرس دے سپُرد تھیّا اُونویں ای نامَختُوناں کُوں خوشخبری سُناوݨ دا کَم میڈے سپُرد تھیّا، ‏8 (کیوں جو خُدا جئیں مختوناں دی رسالت کیتے پطرس ءچ اَثر پیدا کیتا اُوں نیں ای غیر مختوناں کیتے میڈے ءچ اَثر پیدا کیتا )۔ ‏9 تے جِیں وَیلے یعقوب ، پطرس تے یُوحنّا کُوں جیہڑے کلیسیا دے سربراہ سمجھے وَیندے ہَن، معلوم تھیّا جو خُدا نیں میکُوں وی رسالت دی توفیق عطا فرمائی ہے تاں اُنہاں میکُوں تے برنباس کُوں سَجا ہَتھ ڈے تے آپنڑی شراکت ءچ قبول کر گِھدا جو اَساں غیر قوماں ءچ خدمت کروں تے اوہ یہُودیاں ءچ۔ ‏10 اُنہاں فقط ایہہ آکھیا جو غریباں کُوں یاد رکھائے تے ایہہ تاں میں پہلے ای کرݨ کیتے تیار ہم۔

‏11 پَر جِیں وَیلے پطرس انطاکیہ ءچ آیا تاں میں اُوندے سامنڑے اُوندی مُخالفت کیتی کیوں جو اوہ ملامت دے لائق ہا۔ ‏12 اِیں واسطے جوپطرس یعقوب دی طرفوں کُجھ لوکاں دےآوݨ کنُوں پہلے غیر قوماں دے نال کھانڑا کھاندا رَہندا ہا پَر جِیں وَیلے اوہ لوک اُتھاں پُجے تاں پطرس مختوناں ^aدے ڈر کنُوں رُک گِیا تے اَنج تھی گِیا۔ ‏13 وَل باقی مسیحی بِھرا جیہڑے پہلے یہُودی ہَن، منافقت ءچ پطرس دے نال رَل گئے، ایہہ تئیں جو برنباس وی اِیں منافقت ءچ گُمراہ تھی گِیا۔ ‏14 جِیں وَیلے میں ڈِٹھا جو اوہ خُوشخبری دی سچائی دے خلاف چلدے ہِن تاں میں ساریاں دے سامنڑے پطرس کُوں آکھیا جو ”تُوں یہُودی ہوندے ہوئے غیر قوماں دے وانگوں زندگی گُزریندا ہیں نہ جو یہُودیاں دے وانگوں، تاں تُوں کیویں غیر قوماں کُوں یہُودیاں دے وانگوں زندگی گُزارݨ کیتے مجبور کریندا ہیں؟“

‏15 ”اَساں پیدائشی یہُودی ہئیں، گُنہگار غیر قوماں ءچوں نئیں۔ ‏16 پَر ایہہ جانڑدے ہیں جو اِنسان شریعت اُتے عمل کرݨ نال نئیں بلکہ فقط یسوع المسیح اُتے اِیمان گِھن آوݨ نال راستباز تھیندا ہے ۔اِیں واسطے اَساں وی مسیح یسوع اُتے اِیمان گِھن آئے تاں جو شریعت اُتے عمل کرݨ نال نئیں بلکہ مسیح اُتے اِیمان گِھن آوݨ نال راستباز بنڑوں۔ کیوں جو شریعت دے اعمال کنُوں تاں کوئی اِنسان راستباز نئیں بنڑ سگدا۔ ‏17 پَر اَساں جیہڑے مسیح ءچ راستباز تھی وَنجنڑ چاہندے ہئیں، جے خود ای گُنہگار نِکلُوں تاں کیا مسیح گُناہ دا باعث ہے؟ ہرگز نئیں! ‏18 جیہڑا کُجھ میں سَٹ ڈِتے جے اُونکُوں وَل کھڑا کراں تاں آپنڑے آپ کُوں قصور وار بنڑیندا ہاں^b ۔ ‏19 چُنانچہ میں شریعت ای دے وسیلے، شریعت دے لحاظ نال تاں مَر گِیا تاں جو خُدا دے لحاظ نال زندہ تھی وَنجاں۔ ‏20 میں مسیح دے نال مصلُوب تھیّا ہاں تے ہُنڑ میں زندہ نہ ریہا بلکہ مسیح میڈے ءچ زندہ ہے تے جیہڑی زندگی میں ہُنڑ گُزریندا پِیا ہاں اوہ خُدا دے پوتر اُتے اِیمان گِھن آوݨنال گُزریندا پِیا ہاں، جئیں میڈے نال مُحبت رکھی تے میڈے کیتے آپنڑی جان ڈے ڈِتی۔ ‏21 میں خُدا دے فضل کُوں رد نئیں کریندا۔ کیوں جو جے راستبازی شریعت دے وسیلے نال حاصل کیتی وَنج سگدی ہئی تاں مسیح دا مرنڑا بے فائدہ ہوندا۔“