‏6 چُنانچہ ابرہام ”خُدا اُتے اِیمان گِھن آیا تےایہہ اُوندے کیتے راستبازی شمار کیتا گِیا ۔“ ‏7 بس جاݨ گِھنو جو اِیمان گِھن آوݨ آلے ای ابرہام دے حقیقی فرزند ہِن۔ ‏8 خُدا دے کلام نیں پہلے ای ڈسا ڈِتا ہا جو خُدا غیر قوماں کُوں اِیمان نال راستباز کھڑیسی تے پہلے ای ابرہام کُوں ایہہ خُوشخبری سُنڑا ڈِتی ہئی جو ”تیڈے وسیلے نال ساریاں قوماں برکت پے سِن۔“ ‏9 بس جیہڑے اِیمان آلے ہِن اوہ اِیماندار ابرہام نال برکت پیندے ہِن ^a۔

‏10 پَر جیہڑے خُدا دی نظر ءچ مقبول تھیونڑ کیتے شریعت دے اعمال اُتے بھروسہ رکھیندے ہِن سارے لعنت دے ماتحت ہِن۔ کیوں جو لکھیا ہے جو ”جیہڑا کوئی شریعت دی کتاب دے سارے گالھیں اُتے عمل نئیں کریندا اوہ لعنتی ہے ۔“ ‏11 ہُنڑ ایہہ صاف ظاہر ہے جو شریعت دے وسیلے نال کوئی شخص خُدا دی نگاہ ءچ راستباز نئیں تھی سگدا کیوں جو لکھیا ہے جو ”راستباز اِیمان نال زندہ رَہسی ۔“ ‏12 تے شریعت دا اِیمان نال کوئی تعلق نئیں بلکہ لکھیا ہے جو ”جیہڑا اِیندے اُتے عمل کریندا ہے، اوہ اِیندے وسیلے زندہ رَہسی ۔“

‏13 مسیح نیں ساڈے کیتے لعنتی بنڑتے ساکُوں شریعت دی لعنت کنُوں چُھڑا گِھدا کیوں جو لکھیا ہے جو ”جیہڑا کوئی درخت اُتے لٹکا تے ماریا گِیا اوہ لعنتی ہے “ ‏14 تاں جو ابرہام کُوں ڈِتی ہوئی برکت مسیح یسوع دے وسیلے نال غیر قوماں تئیں پُجے تاں جو اَساں اِیمان دے وسیلے نال اُوں رُوح القُدس کُوں حاصل کروں جِیندا وعدہ کیتا گِیا ہے۔

‏15 بِھراؤ! میں اِنسانی زِندگی دی ہِک مثال ڈیندا ہاں جو بھانویں کوئی اِنسانی معاہدہ ای ہووے پَر جِیں وَیلے اُوندی تصدیق تھی وَنجے تاں کوئی اُونکُوں ختم نئیں کر سگدا تے نہ ای اُوندے ءچ کُجھ ودھا سگدے، ‏16 اِینویں ای خُدا نیں ابرہام تے اُوندی نسل نال وعدے کیتے ۔پَر کلام ایہہ نئیں آہدھا جو”نسلاں نال“ یعنی بہُوں ساریاں نال، بلکہ ”تیڈی نسل نال“ یعنی ہِک ای نسل نال۔ تے اوہ مسیح ہے۔ ‏17 میڈا مطلب ایہہ ہے جو اوہ عہد جِیندی تصدیق خُدا نیں پہلے ای کر ڈِتی ہئی، اُونکُوں شریعت چار سو تَریح سال بعد آ تے ختم نئیں کر سگدی تے نہ اُوں وعدے کُوں منسُوخ کر سگدی ہے۔ ‏18 کیوں جو جے وراثت شریعت دی وجہ کنُوں ہوندی تاں اوہ وعدے دی وجہ کنُوں نہ ہوندی، پَر خُدا نیں ابرہام کُوںوعدے دے طور تے وراثت بخشی۔

‏19 وَل شریعت کیوں ڈِتی گئی؟ اوہ اِنسان دی نافرمانیاں دی وجہ نال بعد ءچ ڈِتی گئی جو ابرہام دی اُوں اولاد دے آوݨ تئیں قائم رَہوے جِیندا وعدہ کِیتا گِیا ہا۔ تے اوہ فرشتیاں دے وسیلے نال ہِک درمیانی یعنی موسیٰ دی معرفت ڈِتی گئی۔ ‏20 درمیانی فقط ہِک فریق کیتے نئیں ہوندا پَر خُدا ہِکو ای ہے۔

‏21 تاں کیا شریعت خُدا دے وعدے دے خلاف ہے؟ ہرگز نئیں! کیوں جو جے کوئی ایجھی شریعت ڈِتی وَیندی جیہڑی زندگی بخش سگدی ہے تاں راستبازی شریعت دے ذریعے حاصل تھیندی۔ ‏22 پَر خُدا دے کلام دے مطابق سارے گُناہ دے ماتحت ہِن تاں جو اوہ وعدہ جیہڑا یسوع مسیح اُتے اِیمان گِھن آوݨ دی وجہ کنُوں ہے اُنہاں ساریاں دے حق ءچ پورا کیتا وَنجے جیہڑے اِیمان گِھن آندے ہِن۔

‏23 اِیمان دے آوݨ کنُوں پہلے اَساں شریعت دے ماتحت ہاسے، تے جئیں تئیں اِیمان دی راہ ظاہر نہ تھی وَنجے اَساں پابند ہاسے۔ ‏24 بس شریعت ساکُوں مسیح تئیں پُجنر کیتے ساڈی نگہبان ہئی تاں جو اَساں اِیمان دے وسیلے راستباز تھی وَنجوں۔ ‏25 پَر ہُنڑ اِیمان دی راہ آ گئی ہے تے اَساں نگہبان دے ماتحت نہ ریہے۔

‏26 کیوں جو تُساں سارے یسوع مسیح اُتے اِیمان گِھن آوݨ دے وسیلے نال خُدا دے فرزند بنڑ گئے ہِیوے۔ ‏27 تے ساریاں جِنہاں مسیح ءچ شریک تھیوݨ دا بپتسمہ گِھدا، مسیح کُوں کپڑےپاونڑ وانگوں پا گِھدا ہے۔ ‏28 ہُنڑ نہ کوئی یہُودی ریہا نہ کوئی یُونانی، نہ کوئی غلام نہ کوئی آزاد تے نہ کوئی مَرد تے نہ کوئی عورت کیوں جو ہُنڑ تُساں سارے مسیح یسوع ءچ ہِک ہِیوے۔ ‏29 تے جے تُساں مسیح دے ہِیوے تاں ابرہام دی نسل تے وعدے دے مطابق وارث وی ہِیوے۔