‏2 تُہاکُوں ساڈے باپ خُدا تے خُداوند یسوع مسیح دی طرفوں فضل تے اِطمینان حاصل تھیندا رَہوے۔

‏3 ساڈے خُداوند یسوع مسیح دے خُدا تے باپ دی حمد ہووے جئیں ساکُوں مسیح ءچ اَسمان دی ہر رُوحانی برکت بخشی ہے۔ ‏4 اُونیں ساکُوں دُنیا دے بنڑاوݨ کنُوں پہلے ای مسیح ءچ چُنڑ گِھدا ہا تاں جو اَساں اُوندے حضور مُحبت ءچ پاک تے بے عیب تھیوؤں۔

‏5 اُونیں آپنڑی مرضی تے نیک اِرادے دے مطابق ساکُوں یسوع مسیح دے ذریعے آپنڑے لے پالک پوتر بنڑاوݨ دا فیصلہ پہلے کنُوں ای کیتا ہا، ‏6 تاں جو اُوندے اُوں جلال آلے فضل دی حمد ہووے جیہڑا اُونیں آپنڑے عزیز پوتر دے وسیلے نال ساکُوں مُفت بخشیا۔ ‏7 ساکُوں خُدا دے اُوں فضل دی بدولت مسیح دے خون دے وسیلے نال مخلصی یعنی گُناہاں دی معافی حاصل تھیندی ہے۔ ‏8 تے ایہہ فضل اُونیں بہُوں حکمت تے دانائی نال ساڈے اُتے کثرت نال نازل کیتا۔

‏9 تے خُدا نیں آپنڑی مرضی دے راز کُوں آپنڑی خوشی دے مطابق ساڈے اُتے ظاہر کر ڈِتا جِیندا اُونیں مسیح ءچ پورا کرݨ دا اِرادہ کیتا ہا۔ ‏10 وَل مناسب وقت تے خُدا ساریاں چیزاں کُوں خواہ اَسمان اُتے خواہ زمین اُتے، مسیحءچ کَٹھا کریسی۔

‏11 مسیح ءچ ساکُوں وی وراثت حاصل تھی گئی ہے کیوں جو خُدا جیہڑا آپنڑی مرضی دے مطابق سارا کُجھ کریندا ہے، اُونیں آپنڑے اِرادہ دے موافق ساڈے کیتے ایہہ پہلے کنُوں ای مُقرر کر رکھیا ہا۔ ‏12 تاں جو اَساں^a جِنہاں نیں سبھ کنُوں پہلے مسیح اُتے اُمید رکھی ہئی، اُوندے جلال دی تعریف دا باعث بنڑوں۔

‏13 تے جِیں وَیلے تُساں کلامِ حق کُوں یعنی آپنڑی نجات دی خُوشخبری کُوں سُنڑیا تے مسیح اُتے اِیمان گِھن آئے تاں تُہاڈے اُتے وی وعدہ کیتے ہوئے رُوح القُدس دی مُہر لا ڈِتی گئی۔ ‏14 اُوہو ساڈی میراث دا بِیعانہ ہے جئیں تئیں ساکُوں مخلصی نہ مل وَنجے تاں جو خُدا دے جلال دی ستائش ہووے۔

‏15 میں وی ایہہ سُنڑ تے جو تُساں خُداوند یسوع اُتے اِیمان رکھیندے ہِیوے تے سارے مُقدساں نال مُحبت رکھیندے ہِیوے ‏16 تُہاڈے کیتے خُدا دا شُکر کرݨ کنُوں باز نئیں آندا تے آپنڑی دُعاواں ءچ تُہاکُوں یاد کریندا ہاں۔ ‏17 میں دُعا کریندا ہاں جو ساڈے خُداوند یسوع مسیح دا خُدا جیہڑا جلال آلا باپ ہے، تُہاکُوں آپنڑی پچھاݨ ءچ حکمت تے مُکاشفے دی رُوح بخشے۔ ‏18 تے تُہاڈے دِل دے اَکھیں روشن تھی وَنجنڑ تاں جو تُساں جاݨ گِھنو جو اُونیں تہاکُوں کیجھی اُمید کیتے سَڈیا ہےتے اُوندے جلال آلی میراث دی دولت مُقدساں کیتے کیجھی ہے۔ ‏19 تے اَساں اِیمان گِھن آوݨ آلیاں کیتے اُوندی قُدرت کِیجھی عظیم ہے۔ ایہہ اُوہو قُدرت ہے ‏20 جیہڑی اُونیں مسیح کُوں مُردیاں ءچوں زندہ کر تے اَسمان اُتے آپنڑے سجے پاسے بلہا تے ظاہر کیتی، ‏21 تے ہر قِسم دی حکومت تے اِختیار تے قُدرت تے ریاست تے نہ فقط اِیں جہان ءچ بلکہ اَگوں آوݨ آلے جہان ءچ گِھدے وَنجنڑ آلے ہر ہِک ناں کنُوں اُچا کیتا۔ ‏22 خُدا نیں ایہہ سارا کُجھ اُوندے پیراں دےتَلے کر ڈِتا تے اُونکُوں سارے چیزاں دا سردار بنڑا تے کلیسیا کُوں ڈے ڈِتا۔ ‏23 کلیسیا مسیح دا بدن ہے تےاُوندی معموری ہے جیہڑا ہر ہِک چیز کُوں معمور کرݨ آلا ہے۔