‏4 پَر خُدا جیہڑا بہُوں ای رحم کرݨ آلا ہے، اُونیں ساڈے نال ایجھی مُحبت رکھی جو ‏5 جِیں وَیلے اَساں گُناہاں دی وجہ کنُوں مُردہ ہاسے، اُونیں ساکُوں مسیح دےنال زندہ کیتا۔ ہاں، تُہاکُوں فضل نال ای نجات مِلی ہے۔ ‏6 اُونیں ساکُوں یسوع مسیح دےنال زندہ کرتے اَسمانی مقاماں ءچ اُوندے نال بلہایا، ‏7 تاں جو اوہ آپنڑی اُوں مہربانی نال جیہڑی مسیح یسوع ءچ ساڈے اُتے ہے، آوݨ آلے زمانیاں ءچ آپنڑے حد کنُوں زیادہ فضل دی دولت کُوں ظاہر کرے۔ ‏8 کیوں جو تُہاکُوں اِیمان گِھن آوݨ دے سببّوں فضل نال ای نجات مِلی ہے۔ ایہہ تُہاڈی طرفُوں نئیں بلکہ خُدا دی بخشش ہے، ‏9 تے نہ ای ایہہ تُہاڈے اعمال دا پھل ہے تاں جو کوئی فخر نہ کر سگے۔ ‏10 کیوں جو اَساں خُدا دی کاریگری ہئیں تے ساکُوں مسیح یسوع ءچ اُنہاں نیک کَماں کیتے پیدا کیتا گِیا ہے جِنہاں کُوں خُدا نیں پہلے ای ساڈے کرݨ کیتے تیار کیتا ہا۔

‏11 بس یاد رکھو جو پہلے تُساں جِسم دے لحاظ نال غیر قوم ہَوے تے یہُودی جیہڑے جِسم ءچ ہَتھ نال کیتے ہوئے ختنے دے سببّوں”مختون“ اَکھویندے ہِن، اوہ تُہاکُوں ”نامختون“ آہدھے ہِن۔ ‏12 اُوں زمانے ءچ تُساں مسیح کنُوں جُدا، اِسرائیلی شہریت کنُوں لاتعلق ، وعدے دے عہد کنُوں اَݨسُوویں، دُنیا ءچ نا اُمید تے خُدا کنُوں ناواقف ہَوے۔ ‏13 پَر تُساں جیہڑے پہلےدُور ہَوے ہُنڑ یسوع مسیح ءچ اُوندے خون دے طفیل خُدا دے نزدیک تھی گئےہِوے۔ ‏14 اُوہو ساڈی صُلح ہے جئیں یہُودی تے غیر یہُودی ڈوہائیں کُوں ہِک کر ڈِتا تے دشمنڑی تے جُدائی دی اُوں دیوار کُوں جیہڑی ساڈے درمیان ہئی، سَٹ ڈِتا۔ ‏15 کیوں جو اُونیں شریعت کُوں اُوندے حُکماں تے قوانین سمیت آپنڑے جِسم دے وسیلے نال ختم کر ڈِتا، تاں جو ڈوہائیں کنُوں آپنڑے آپ ءچ ہِک نویں اِنسان دی تخلیق کر تے صُلح کرا ڈِیوے^a ۔ ‏16 تے اِینویں صلیب اُتے دشمنڑی کُوں ختم کر تے ڈوہائیں کُوں ہِک تَن بنڑا تے خُدا نال میل ملاپ کروا ڈِتا۔ ‏17 تے اُونیں تُہاکُوں جیہڑے کہیں وقت اُوندے کنُوں دُور ہاسے تے اُنہاں کُوں جیہڑے اُوندے نزدیک ہَن، ڈوہائیں کُوں صُلح دی خوشخبری ڈِتی۔ ‏18 کیوں جو مسیح دے وسیلے نال ہِکو رُوح القُدس ءچ اَساں باپ دے حضور آسگدے ہئیں۔

‏19 بس ہُنڑ تُساں پردیسی تے اجنبی نئیں ریہے بلکہ خُدا دے مُقدساں دے ہم وطن تے خُدا دے کُنبے دے فرد تھی گئے ہِیوے۔ ‏20 تُساں ہِک ایجھی عمارت ہِیوے جیہڑی رسُولاں تے نبیاں دی بنیاد اُتے اُساری گئی ہے جِیندے کونے دے سِرے دا پتھر یسوع مسیح خود ہے۔ ‏21 مسیح ءچ ساری کلیسیا آپس ءچ رَل مِل تے خُداوند کیتے ہِک پاک مَقدِس بنڑدا وَیندے۔ ‏22 تے تُساں وی اُوندے ءچ اُسردے وَیندے ہِیوے تاں جو رُوح القُدس دے وسیلےنال خُدا دا گھر بنڑو۔