‏7 خُدا دے اُوں فضل دے اِنعام دی بدولت جیہڑا اُوندی قُدرت دی تاثیر نال میڈے اُتے تھیّا، میں اِیں خوشخبری دا خادم بنڑیا۔ ‏8 میڈے اُتے جیہڑا سارے مُقدساں ءچوں چھوٹا ہاں، ایہہ فضل تھیّا جو میں غیر قوماں کُوں مسیح دی اُوں بے اندازہ دولت دی خوشخبری ڈیواں۔ ‏9 تے سارے لوکاں اُتے اُوں بھید کُوں روشن کراں جیہڑا ہر چیز دے پیدا کرݨ آلے خُدا ءچ اَزل کنُوں پوشیدہ ہا۔ ‏10 تاں جو ہُنڑ کلیسیا دے وسیلے نال خُدا دی طرحاں طرحاں دی حکمت اُنہاں حکومت آلیاں تے اختیار آلیاں کُوں معلوم تھی وَنجے جیہڑی اَسمانی مقاماں ءچ ہے۔ ‏11 ایہہ اُوہو اَزلی اِرادہ ہا جیہڑا اُونیں ساڈے خُداوند یسوع مسیح دے ذریعے پُورا کِیتا۔ ‏12 ہُنڑ اَساں مسیح اُتے ایمان رکھ تے حوصلہ تے دلیری نال خُدا دے کولھ آ سگدے ہئیں۔ ‏13 اِیں واسطے میں درخاست کریندا ہاں جو تُساں میڈی اِنہاں مصیبتاں دی وجہ کنُوں جیہڑیاں میں تُہاڈی خاطر سَہندا ہاں ہِمت نہ ہارو کیوں جو اوہ تُہاڈے کیتے باعث ِ فخر ہِن۔

‏14 اِیں واسطے میں آپنڑے خُداوند یسوع المسیح دے باپ دے اَگوں گوڈےٹیکدا ہاں، ‏15 جِیندے نال اَسمان تے زمین دا ہر خاندان نامزد ہے، ‏16 جو اوہ آپنڑے جلال دی دولت دے مطابق تُہاکُوں ایہہ بخشے جو تُساں اُوندے رُوح القُدس دے ذریعے آپنڑی باطنی اِنسانیت ءچ بہُوں زور آور تھی و َنجو۔ ‏17 تے اِیمان دے وسیلے نال مسیح تُہاڈے دِلاں ءچ رَہنڑ لگے تاں جو تُساں مُحبت ءچ جڑ پکڑتے، تے بنیاد قائم کر تے ‏18 سارے مُقدساں دے نال چنگی طرحاں جاݨ سگو جو اُوندی مُحبت دی لمبائی، چوڑائی، اُونچائی تے گہرائی کِتی ہے۔ ‏19 یعنی مسیح دی مُحبت کُوں سمجھ سگو جیہڑی سمجھ کنُوں باہر ہے تاں جو تُساں خُدا دی ساری معموری کنُوں معمور تھی وَنجو۔

‏20 ہُنڑ خُدا جیہڑا ایجھا قادر ہے اوہ آپنڑی اُوں قُدرت دے مطابق جیہڑی ساڈے ءچ تاثیر کریندی ہے، ساڈے مَنگنڑ یا سوچنڑ کنُوں بہُوں زیادہ کر سگدا ہے۔ ‏21 کلیسیا تے یسوع مسیح دے وسیلے اُوندی حمد اَبد تئیں پُشت در پُشت تھیندی رَہوے۔ آمین۔