مسیح ءچ یگانگت
4
1 بس میں جیہڑا خُداوند یسوع دی خاطر قید ءچ ہاں، تُہاڈی مِنت کریند اہاں جو اُوں بُلاوے دےمطابق چلو جِیندے کیتے تُہاکوں سَڈیا گِیا ہا۔ 2 یعنی کمال فروتنی، حلیمی تے صبر نال، مُحبت ءچ ہِک ڈوجھے دی برداشت کرو۔ 3 کوشش ءچ رَہو جو رُوح القُدس دی یگانگی کُوں صُلح دے بندھ نال بدھی رَکھو۔ 4 ہِکو ای بدن ہے تے ہِکو ای رُوح القُدس وی، تے جِیں وَیلے تُساں سَڈے گئے ہَوے تاں ہِکو ای اُمید رکھنڑ کیتے سَڈے گئے ہَوے، 5 تے ہِکو ای خُداوند ہے، ہِکو ای اِیمان تے ہِکو ای بپتسمہ ہے، 6 تے خُدا وی ہِک ہے جیہڑا ساریاں دا باپ ہے۔ اُوہو ساریاں دے اُتے، ساریاں دے دے نال aتے ساریاں دے اندر ہے۔7 پَر ساڈے ءچوں ہر ہِک دے اُتے مسیح دی بخشش دے اندازے دے مطابق فضل تھیّاہے۔ 8 اِیں واسطے فرمایا گیا ہے جو
”جِیں وَیلے اوہ اَسمان اُتے چڑھیا
تاں قیدیاں کُوں آپنڑے نال گِھن گِیا
تے لوکاں کُوں اِنعام ڈِتے ۔“
9 اُوندے ”اَسمان اُتے چڑھن“ دا مطلب ہے جو اوہ پہلے زمین دے تَلویں علاقے ءچ لَتھیا وی ہا۔ 10 تے ایہہ لَتھنڑ آلا اُوہو ہے جیہڑا ساریاں اَسماناں کنُوں وی اُتے چڑھ گِیا تاں جو پوری کائنات کُوں معمور کرے۔ 11 اُونیں کُجھ کُوں رسُول، کُجھ کُوں نبی، کُجھ کُوں تبلیغ کرݨ آلے تے کُجھ کُوں نِگہبان تے کُجھ کُوں اُستاد بنڑا ڈِتا، 12 تاں جو مُقدساں خدمت دا کَم کرݨ دے لائق بننڑ تے مسیح دے بدن دی ترقی تھیوے، 13 جئیں تئیں اَساں سارے دے سارے ایمان تے خُدا دے پوتر دی پچھاݨ ءچ ہِک نہ تھی وَنجوں تے کامل اِنسان نہ بنڑوں یعنی مسیح دے قَد b دے اندازے تئیں پُج نہ وَنجوں۔ 14 وَل اَساں اَگوں تُوں بال نہ رَہسُوں، تے ہر غلط تعلیم دی تیز ہوا نال پانڑی دے چھلاں وانگوں اِڈے اُڈے اُچھلدے وَہندے، تے چالباز تے مکار لوکاں دے گُمراہ کر ڈیوݨ آلے منصوبیاں دا شکار نہ بنڑسُوں۔ 15 بلکہ اَساں مُحبت دے نال سچائی اُتے قائم رہ تے مسیح دے نال جیہڑا سِر ہے، پیوستہ تھی تے ہر گالھ ءچ وَدھدے وَنجوں۔ 16 اُوندی وجہ کنُوں سارا بدن وَدھدے، آپس ءچ پیوستہ تے آپنڑے ہر جوڑ دی مدد نال قائم رَہندا ہے تے ہر اَنگ دے آپنڑا آپنڑا کَم کرݨ نال پُورا بدن محبت ءچ وَدھدا ہے۔
مسیح دے وسیلے نال نویں زندگی
17 اِیں واسطے میں آہدھا ہاں تے خُداوند یسوع ءچ چَتیندا ہاں جو اَگوں تُوں تُساں غیر قوماں وانگوں جیہڑے آپنڑے بے ہُودہ خیالاں دے مطابق چلدے ہِن نہ چلو۔ 18 اُنہاں دی عقل ماری گئی ہے تے اوہ آپنڑی جہالت دے باعث جیہڑی اُنہاں ءچ موجود ہے تے سخت دِلی دے باعث خُدا دی زندگی کنُوں خارج ہِن۔ 19 اُنہاں نیں بے حِس تھی تے آپنڑے آپ کُوں شہوت پرستی دے حوالے کیتا تے ہر طرحاں دے گندے کَم بہُوں حرِص نال کریندے ہِن۔
20 پَر تُساں مسیح دی ایجھی تعلیم نئیں گِھدی۔ 21 بلکہ تُساں اُوں سچائی دے مطابق جیہڑی یسوع ءچ ہے اُوندی ای سُنڑی تے اُوندے ءچ ایہہ تعلیم گِھدی ہوسی۔ 22 جو آپنڑی پُرانڑی اِنسانیت کُوں اُوندے پہلے چال چلنڑسمیت لہا سَٹو جیہڑی نفسانی خواہشاں دے فریب ءچ آ تے وِگڑدی وَیندی ہے، 23 تے رُوح القُدس نال آپنڑے ذہن کُوں نواں بنڑا گِھنو۔ 24 تے نوِیں اِنسانیت کُوں پا گِھنو جیہڑی خُدا دے مطابق سچائی، راستبازی تے پاکیزگی دی حالت ءچ پیدا کیتی گئی ہے۔
25 بس کُوڑ مارݨ چھوڑ تے ہر شخص آپنڑے ہمسائے نال سچ بولے کیوں جو اَساں سارے ہِک ڈوجھے دے اَنگ ہئیں۔ 26 اِتنا غُصہ نہ کرو جو گُناہ تھی وَنجے تے تُہاڈا غُصہ سِجھ لَہوݨ تئیں نہ رَہوے۔ 27 تے اِبلیس کُوں موقع نہ ڈیؤ۔ 28 چوری کرݨ آلا اَگوں تے چوری نہ کرے بلکہ کوئی چنگا کَم کر تے آپنڑے ہَتھاں نال محنت کرے تاں جو مُتھاجاں دی مددکرݨ کیتے اُوندے کولھ کُجھ ہووے۔ 29 تُہاڈے مُنہ ءچوں کوئی بُری گالھ نہ نِکلے بلکہ صرف چنگی گالھ ای نکِلے جیہڑی مُفید ہووے تاں جو سُننڑ آلیاں کُوں وی اُوندے تُوں برکت مِلے۔ 30 خُدا دے رُوح القُدس کُوں ناراض نہ کرو جِیندے نال تُہاڈے اُتے مخلصی دے ڈینہہ کیتے مُہر کیتی گئی ہے۔ 31 ہر قِسم دا کینہ، قَہر، تکرار تے بدگوئی، ہر طرحاں دی بدخواہی سمیت آپنڑے ءچوں کَڈھ ڈیؤ۔ 32 تے ہر ہِک دے نال مہربانی تے نرم دِلی نال پیش آؤ۔ جِیویں خُدا نیں مسیح ءچ تُہاڈے قصور معاف کیتے ہِن، تُساں وی ہِک ڈوجھے دے قصور معاف کرو۔