‏2 ساڈے خُدا باپ تے خُداوند یسوع مسیح دی طرفوں تُہاکُوں فضل تے اِطمینان حاصل تھیندا رَہوے۔

‏3 میں جِیں وَیلے وی تُہاکُوں یاد کریندا ہاں، آپنڑے خُدا دا شُکر کریندا ہاں۔ ‏4 تے آپنڑی ہر ہِک دُعا ءچ تُہاڈے کیتے بہُوں خوشی دے نال دُعا کریندا ہاں، ‏5 اِیں واسطے جو تُساں پہلے ڈینہہ کنُوں اَج تئیں خوشخبری سُنڑاوݨ ءچ شامل ریہے ہِیوے۔ ‏6 تے میکُوں اِیں گالھ دا یقین ہے جو خُدا، جئیں تُساں لوکاں ءچ نیک کَم شروع کیتے اوہ اُونکُوں یسوع مسیح دے ظہور دے ڈینہہ تئیں پورا کر ڈیسی۔

‏7 میں تُہاڈے ساریاں دے بارے ءچ ایجھا خیال کرݨ مناسب سمجھدا ہاں کیوں جو تُساں ہمیشاں میڈے دِل ءچ رَہندے ہِیوے۔تے تُساں میڈی قید تے خوشخبری دے دفاع تے تصدیق ءچ میڈے نال خُدا دے فضل ءچ شریک ہِیوے۔ ‏8 خُدا گواہ ہے جو میڈے دِل ءچ تُہاڈے کیتے یسوع مسیح جِیہی مُحبت ہے تے میں تُہاڈے ساریاں دا مُشتاق ہاں۔

‏9 میڈی دُعا ہے جو تُہاڈی مُحبت علم تے ہر طرحاں دی سمجھ ءچ وَدھدی وَنجے، ‏10 تاں جو تُہاکُوں معلوم تھی سگے جو کیہڑے گالھیں چنگیاں ہِن تے تُساں مسیح دے ظہور دے ڈینہہ تئیں صاف دِل تے بے عیب رَہو، ‏11 تے خُدا دے جلال تے تعریف کیتے یسوع مسیح دے وسیلے نال راستبازی دے پھل کنُوں بھریندے رَہو۔

‏12 بِھراؤ! میں تُہاکُوں ڈساوݨ چاہندا ہاں جو جیہڑا کُجھ میڈے اُتے گُزریا اوہ خُوشخبری دی ترقی دا باعث تھیّا ہے۔ ‏13 اِتھوں تئیں جو شاہی محل دے سارے سپاہیاں تے باقی لوکاں ءچ مشہور تھی گِیا جو میں مسیح دی خاطر قید ہاں۔ ‏14 تے خُداوند ءچ اکثر بِھرا، میڈے قید ہووݨ دی وجہ کنُوں اِتھوں تئیں دلیر تھی گئے ہِن جو اوہ بے خوف تے جُرأت نال خُدا دا کلام سُناوݨ لگے ہِن۔

‏15 کئی تاں حسد تے جھیڑے دی وجہ کنُوں مسیح دی تبلیغ کریندے ہِن تے کئی نیک نیتی نال۔ ‏16 نیک نیتی آلے تاں مُحبت دی وجہ نال ایہہ جاݨ تے تبلیغ کریندے ہِن جو میکُوں خوشخبری دے دفاع کیتے چُنڑیا گِیا ہے۔ ‏17 پَر ڈوجھے خلوص دِل نال نئیں بلکہ حسد دی وجہ کنُوں مسیح دی تبلیغ کریندے ہِن تاں جو قید ءچ میڈے ڈُکھ کُوں وَدھاوݨ۔

‏18 بس کیا تھیّا؟ صرف ایہہ جو اُنہاں دی نیت خواہ بُری ہووے خواہ نیک ، مسیح دی خوشخبری تاں سُنڑائی وَیندی ہے تے میں اِیں گالھ کنُوں خوش ہاں تے خوش رَہساں ‏19 کیوں جو میں جانڑدا ہاں جو تُہاڈی دُعا تے یسوع مسیح دے رُوح القُدس دی مدد نال اِیندا انجام میڈی نجات ہوسی۔ ‏20 میڈا یقین تے اُمید ایہہ ہے جو میکُوں کہیں گالھ ءچ شرمندہ تھیونڑا نہ پوسی بلکہ جیہڑی کمال دلیری نال مسیح دا جلال میڈے سببّوں ماضی ءچ ہمیشاں ظاہر تھیندا رِیہا ہے، اُونویں ای ہُنڑ وی بھانویں میں زندہ رَہواں یا مَر وَنجاں۔ ‏21 کیوں جو زندہ رَہنڑ تاں میڈے کیتے مسیح ہے تے مَرنڑا نفع۔ ‏22 پَر جے میڈا جِسمانی طور تے زندہ رَہنڑ میڈے کَم کیتے پَھل دار ہوسی ،تاں میں نئیں جانڑدا جو ڈوہائیں ءچوں کِیندا اِنتخاب کراں۔ ‏23 میں اِنہاں ڈوہائیں دی کشمکش ءچ پھسیا ہاں۔ دِل تاں چاہندے جو دُنیا کُوں خُدا حافظ آکھ تے مسیح دے کولھ وَنج رَہاں کیوں جو ایہہ زیادہ چنگا ہے۔ ‏24 پَر میڈا جِسمانی طور تے زندہ رَہنڑ تُہاڈے کیتے زیادہ ضروری ہے۔ ‏25 اِیں واسطے میکُوں اِیں گالھ دا بہُوں یقین ہے جو میں زندہ رَہساں بلکہ تُساں ساریاں دےنال رَہساں^a تاں جو تُساں اِیمان ءچ ترقی کرو تے خوش رَہو۔ ‏26 تے جِیں وَیلے میں تُہاڈے کولھ وَلا آساں تاں یسوع مسیح ءچ تُہاڈی خوشی جیہڑی میڈے کیتے ہے مزید وی زیادہ تھی وَنجے۔

‏27 کُجھ وی تھی وَنجے، اِتنا ضرور کرو جو تُہاڈا چل چلنڑ مسیح دی خوشخبری دے لائق ہووے تاں جو بھانویں میں تُہاکُوں ڈیکھنڑ آواں یا نہ آواں، ضرور تُہاڈے بارے ءچ سُنڑاں جو تُساں ہِک رُوح ءچ قائم ہِیوے تے ہِک جان تھی تے خوشخبری دے اِیمان کیتے بہُوں محنت کریندے پئے ہِیوے۔ ‏28 تے ایہہ وی جو تُساں کہیں گالھ ءچ وی آپنڑے مخالفاں کنُوں دہشت زدہ نئیں۔ ایہہ اُنہاں کیتے تاں ہلاکت دا نِشان، پَر تُہاڈے کیتے نجات دا نِشان ہے تےایہہ خُدا دی طرفوں ہے۔ ‏29 کیوں جو مسیح دی خاطر تُہاڈے اُتے ایہہ فضل تھیّا ہے جو نہ فقط اُوندے اُتے اِیمان گِھن آؤ بلکہ اُوندی خاطر ڈُکھ وی سہو۔ ‏30 تُساں وی اُوہوتکلیفاں ءچ شامل ہِیوے جِیویں میکُوں برداشت کریندے ہوئے ڈِٹھا ہَوے تے ہُنڑ وی سُنڑدے ہِیوے جو میں اُونویں ای کریندا پِیا ہاں۔