مسیح دی حلیمی تے عظمت
2
1 بس جےتُہاکُوں مسیح ءچ کُجھ تسلی تے اُوندی مُحبت کنُوں حوصلہ مِلدا ہے تے رُوح القُدس دی شراکت ہے تےجے تُہاڈے ءچ رحمدلی تے ہمدردی پائی وَیندی ہے، 2 تاں میڈی ایہہ خوشی پوری کر و جو ہِکو سوچ رَکھو، ہِکو جیہی محبت رَکھو، ہِک جان تھیؤ تے ہِک دِل رَہو، 3 تفرقے تے غیر مناسب فخر کنُوں دُور رَہو بلکہ حلیمی نال ہِک ڈوجھے کُوں آپنڑے کنُوں چنگا سمجھو۔ 4 ہر کوئی فقط آپنڑے فائدے دا نئیں بلکہ ڈوجھیاں دے فائدے دا وی خیال رکھے۔ 5 تُہاڈا مزاج اُونویں ای ہووے جِیویں مسیح یسوع دا ہا۔6 بھانویں اوہ خُدا دی صورت اُتے ہا a،
وَل وی اُونیں خُدا دی برابری کُوں آپنڑے قبضہ ءچ رکھنڑ دی چیز نہ سمجھیا۔
7 بلکہ آپنڑے آپ کُوں خالی کر ڈِتا،
تے نوکر دی صورت اِختیار کر تے
اِنساناں دے وانگوں تھی گِیا۔
8 اُونیں اِنسانی شکل ءچ ظاہر تھی تے
آپنڑے آپ کُوں پست بنڑا گِھدا
تے مَوت بلکہ صلیبی مَوت تئیں فرمانبرداری کیتی۔
9 اِیں واسطے خُدا نیں اُونکُوں بہُوں ای اُچا مقام ڈِتا،
تےاُونکُوں اوہ ناں بخشیا جیہڑا ہر ناں کنُوں اُچا ہے۔
10 تاں جو یسوع دے ناں اُتے ہر ہِک گوڈا جُھکے،
خواہ اوہ اَسمانی ہووے خواہ زمینی خواہ زمین دے تَلے ہووے۔
11 تے ہر زبان خُدا باپ دے جلال کیتے اِقرار کرے
جو یسوع مسیح ای خُداوند ہے۔
دُنیا ءچ نُور وانگوں چمکنڑاں
12 بس اے میڈے عزیزو! جِیویں تُساں ہمیشاں فرمانبرداری کیتی ہے، اُونویں ای ہُنڑ وی نہ فقط میڈی موجودگی ءچ بلکہ غیر موجودگی ءچ وی ڈردے تے کمبدے ہوئے آپنڑی نجات دا کَم کریندے رَہو b۔ 13 کیوں جو اوہ خُدا ای ہے جیہڑا تُہاڈے ءچ نیّت تے عمل ڈوہائیں کُوں پیدا کریندے تاں جو اُوندا نیک اِرادہ پورا تھی سگے۔
14 تے ہر کَم بغیر شکایت تے تکرار دے کیتا کرو۔ 15 تاں جو تُساں بے اِلزام تے پاک تھی تے ٹیڑھے تے گمراہ لوکاں ءچ خُدا دے بے عَیب فرزنداں وانگوں زندگی گُزارو جِنہاں ءچ تُساں تاریکی دی دُنیا ءچ روشنیاں وانگوں چمکدے ہِیوے۔ 16 تے زندگی دا کلام پیش کریندے ہِیوےc تاں جو مسیح دے ظہور دے ڈینہہ میکُوں فخر ہووے جو نہ تاں میڈی بھج دَھرُوک بیکار گئی تے نہ محنت بے فائدہ تھئی۔
17 جے تُہاڈے اِیمان تے خدمت دی قُربانی دے نال میکُوں آپنڑی جان دی قُربان وی ڈیونڑا پووے تاں میکُوں خوشی ہے تے میں تُساں ساریاں دے نال خوشی کریندا ہاں۔ 18 اِینویں ای تُہاکُوں وی خوش تھی تے میڈی خوشی ءچ شریک تھیونڑا چاہیدا ہے۔
تِیمُتِھیُس تے اِپفُردِتُس
19 میکُوں خُداوند یسوع ءچ ایہہ اُمیدہے جو تِیمُتِھیُس کُوں جلدی تُہاڈے کولھ روانہ کر ڈیساں تاں جو تُہاڈی خیریت دی خبر سُنڑ تے میکُوں وی تسلی تھیوے۔ 20 کیوں جو میڈے کولھ بِیا کوئی ہم خیال نئیں جیہڑا سچے دِل نال تُہاڈی فِکر کریندا ہووے۔ 21 سارے آپنڑے آپنڑے گالھیں دی فِکر ءچ ہِن نہ جو یسوع مسیح دے۔ 22 پَر تُساں تِیمُتِھیُس دے کردار کنُوں واقف ہِیوے جو جِیویں پوتر پِیُو نال کَم کریندا ہے، اُونیں میڈےنال رَل تے خُوشخبری دی تبلیغ ڈیوݨ دی خدمت کیتی ہے۔ 23 میں اُمید کریندا ہاں جو جِتی جلدی میکُوں معلوم تھیسی جو میڈا کیا انجام تھیوݨ آلا ہے، میں اُونکُوں تُہاڈے کولھ بھیج ڈیساں۔ 24 بلکہ میکُوں خُداوند اُتے بھروسہ ہے جو میں وی جلدی آساں۔
25 پَر میں اِپفُردِتُس کُوں تُہاڈے کولھ بھیجنڑا ضروری سمجھیا۔ اوہ میڈا بِھرا، ہم خدمت تے ہم سپاہ، بلکہ اوہ تُہاڈا قاصد تے میڈی ضرورتاں پوریاں کرݨ کیتے خدمت گزار ہے۔ 26 اوہ تُہاڈے ساریاں دا مُشتاق تے پریشان وی ہا کیوں جو تُساں اُوندی بیماری دا حال سُنڑیا ہا۔ 27 بے شک اوہ آپنڑی بیماری کنُوں مَرݨ دے قریب ہا پَر خُدا نیں اُوندے اُتے رحم کیتا تے نہ فقط اُوندے اُتے بلکہ میڈے اُتے وی، تاں جو میکُوں غم اُتے غم نہ تھیوے۔ 28 اِیں واسطے میکُوں خیال آیا جو اُونکُوں جلدی کنُوں جلدی روانہ کر ڈیواں تاں جو جِیں وَیلے تُساں اُونکُوں وَلا ڈیکھو تاں خوش تھی وَنجو تے میڈی پریشانی وی گَھٹ تھی وَنجے۔ 29 بس تُساں خُداوند ءچ کمال خُوشی نال اُوندا اِستقبال کرائے تے ایجھے لوکاں دا احترام کیتا کرو۔ 30 کیوں جو اوہ مسیح دی خدمت دی خاطر مَرݨ دے قریب تھی گِیا ہا۔ اُونیں آپنڑی جان کُوں خطرے ءچ پا ڈِتا تاں جو میڈی خدمت جیہڑی تُساں نہ کر سگے، اوہ اُونکُوں پورا کر ڈیوے۔