‏2 اُنہاں مُقدساں تے مسیح ءچ وفادار بِھرانواں دے ناں جیہڑے کُلُسے شہر ءچ ہِن۔ ساڈے خُدا باپ دی طرفوں تُہاکُوں فضل تے اِطمینان حاصل تھیندا رَہوے۔

‏3 جِیں وَیلے اَساں تُہاڈے کیتے دُعا کریندے ہئیں ،اَساں ہمیشاں آپنڑے خُداوند یسوع المسیح دے باپ ، خُدا دا شُکر ادا کریندے ہئیں۔ ‏4 کیوں جو اَساں سُنڑیا ہے جو تُساں مسیح یسوع اُتے اِیمان رکھیندے ہِیوے تے سارے مُقدساں نال مُحبت کریندے ہِیوے۔ ‏5 ایہہ اُوں اُمید کیتی ہوئی برکتاں دی وجہ کنُوں ہے جیہڑیاں تُہاڈے کیتے اَسمان اُتے رکھیاں ہِن ،تے جِیندا ذِکر تُساں خُوشخبری دے سچے کلام ءچ پہلے سُنڑ گِھدا ہے، ‏6 جیہڑی تُہاڈے کولھ پُجی ہے۔ اوہ ساری دُنیا ءچ اِینویں پھل ڈیندی تے ترقی کریندی وَیندی ہے، جیویں تُساں ءچ ای کریندی ہے، اوہ ڈینہہ کنُوں جئیں ءچ تُساں خُدا دے فضل دا پیغام سُنڑیا تے اُونکُوں سچ جانڑیا۔ ‏7 تُساں اِیہو تعلیم ساڈے پیارے بِھرا تے ہم خدمت اِپفُردِتُس کنُوں گِھدی جیہڑا تُہاڈے ءچ مسیح دا وفادار خادم ہے۔ ‏8 اُونیں ای ساکُوں اُوں محبت دے بارے ءچ ڈسایا جیہڑی رُوح القُدس نیں تُہاڈے ءچ پیدا کیتی ہے۔

‏9 اِیں واسطے جئیں ڈینہہ تُوں اَساں ایہہ سُنڑیا ہے، اَساں تُہاڈے کیتے دُعا کریندے پئے ہئیں۔ ساڈی عرض ہے جو تُساں ساری حکمت تے رُوحانی سمجھ نال خُدا دی مرضی دے علم نال بھریج وَنجو۔ ‏10 تاں جو تُہاڈا چال چلنڑ خُداوند دے لائق ہووے تے اُونکُوں ہر طرحاں نال پسند آوے تے تُساں ہر چنگے کَم ءچ پھلدار بنڑو تے خُدا دی پہچانءچ وَدھدے وَنجو۔ ‏11 تے اُوندے جلال دی قُدرت دے مطابق ہر طرحاں دی قوت نال مضبوط تھیندے وَنجو تاں جو تُساں ءچ خوشی دے نال بےحد تحمل تے صبر پیدا تھیوے۔ ‏12 تے باپ دا شُکر کریندے رَہو جئیں تُہاکُوں اِیں لائق کیتا جو نُورءچ مُقدساں دی میراث ءچ شریک تھیؤ۔ ‏13 خُدا نیں ساکُوں اندھارے دی غلامی کنُوں چُھڑا تے آپنڑے عزیز پوتر دی بادشاہی ءچ داخل کیتا، ‏14 جِیندے وسیلے نال ساکُوں مخلصی تے گُناہاں دی معافی مِلی ہے۔

‏21 ہِک وقت ہا جِیں وَیلے تُساں خُدا کنُوں بہُوں دُور تے آپنڑی بُری سوچ تے کماں دی وجہ کنُوں اُوندے دُشمنڑ ہَوے۔ ‏22 پَر ہُنڑ اُونیں مسیح دی جِسمانی مَوت دے وسیلے نال تہاڈے نال صُلح کر گِھدی ہے،تاں جو تُہاکُوں پاک ، بے عیب تے بے اِلزام بنڑا تے آپنڑے حضور ءچ پیش کرے۔ ‏23 پَر شرط ایہہ جو تُساں آپنڑے اِیمان دی بُنیاد اُتے قائم تے مضبوط رَہو تے خُوشخبری دی اُوں اُمیدکُوں نہ چُھڑائے جیہڑی تُساں سُنڑی ہے۔ خوشخبری دی تبلیغ اَسمان دے تَلے ساری مخلوقات ءچ کیتی گئی ہے تے میں پَولُس اُنہاں دا خادم بنڑیا۔

‏24 ہُنڑ تُہاڈی خاطر ڈُکھ چاوݨ وی میڈے کیتے خوشی دا باعث ہے کیوں جو میں مسیح دی مصیبتاں دی کمی کُوں اُوندے بدن یعنی کلیسیا کیتے آپنڑے بدن دے ذریعے پورا کریندا پِیا ہاں۔ ‏25 خُدا نیں میکُوں خادم بنڑا تے ایہہ ذمہ داری تُہاڈی خاطر ڈِتی جو میں اُوندے کلام دی پُوری پُوری تبلیغ کراں۔ ‏26 یعنی اوہ راز جیہڑا سارے زمانیاں تے نسلاں کنُوں لُکیا ریہا، پَر ہُنڑ خُدا دے مُقدساں اُتے ظاہر تھیّا۔ ‏27 خُدا اُنہاں اُتے ایہہ ظاہر کرݨ چاہندا ہا جو اُوں راز دے جلال دی دولت غیر قوماں کِیتے کیا کُجھ ہے، تے راز ایہہ ہے جو مسیح جیہڑا جلال دی اُمید ہے، تُساں ءچ رَہندے۔ ‏28 اَساں مسیح دی تبلیغ کریندے ہئیں تے کمال دانائی نال سارے لوکاں کُوں نصیحت کریندے تے تعلیم ڈیندے ہئیں تاں جو ہر شخص کُوں مسیح ءچ کامل کر تے پیش کر سگوں۔ ‏29 اِیں مقصد کیتے میں مسیح دی اُوں وَڈی قوت دے مطابق جیہڑی میڈے اُتےزور نال اثر کریندی ہے، سخت محنت کریندا ہا۔