‏4 ایہہ میں اِیں واسطے آہدھا ہاں جو کوئی تُہاکُوں کُوڑے دلیلاں نال گُمراہ نہ کر ڈیوے۔ ‏5 بھانویں جو بظاہر میں تُہاڈے ءچ موجود نہ ہم پَر رُوحانی طورتے تُہاڈے کولھ ہاں تے ایہہ ڈیکھ تے تُہاڈی وجہ کنُوں خوش ہاں جو تُساں مسیح اُتے آپنڑے اِیمان ءچ ترتیب نال قائم ہِیوے۔

‏6 بس جِیویں تُساں مسیح یسوع کُوں آپنڑا خُداوند قبول کر گِھدے، اُونویں ای اُوندے ءچ چلدے رَہو۔ ‏7 اُوندے ءچ جڑ پکڑیندے تے تعمیر تھیندے وَنجو تے جِیویں تُساں تعلیم گِھدی ہے اُونویں ای اِیمان ءچ مضبوط رَہو تے خُدا دی بہُوں شُکر گُزاری کیتا کرو۔

‏8 خبردار کوئی شخص تُہاکُوں اُنہاں فلسفیانہ تے بے فائدہ دھوکےآلے گالھیں د اشکار نہ کر گِھنے جیہڑیاں اِنسانی روایتاں تے دُنیاوی اصُولاں دے مطابق ہِن نہ جو مسیح دے مطابق ۔ ‏9 کیوں جو الُوہیت دی ساری معمُوری اُوندے ءچ مجسم تھی تے سکونت کریندی ہے۔ ‏10 تے تُساں مسیح ءچ معمور تھی گئے ہِیوے جیہڑا ہر حکُومت تے اختیار دا سِر ہے۔

‏11 مسیح ءچ تُہاڈا ایجھا ختنہ تھیّا جیہڑا ہَتھ دا نئیں بلکہ مسیح دا کیتا ہویا ہے، جِیندے نال تُہاڈی پُرانڑی اِنسانیت تُساں کنُوں اَنجھ کر ڈِتی گئی ہے۔ ‏12 جِیں وَیلے تُساں بپتسمہ گِھدا تاں مسیح دے نال جِیویں جو دفن تھی گئے، تے جِیں وَیلے تُساں خُدا دی قُدرت اُتے اِیمان گِھن آئے جئیں مسیح کُوں مردیاں ءچوں زندہ کیتا تاں تُساں اُوندے نال زندہ وی کیتے گئے۔ ‏13 تُساں تاں آپنڑے گُناہاں تے جِسمانی نامختونی دے باعث مُردہ ہَوے پَر خُدا نےساڈے سارے گُناہ معاف فرماتے تُہاکُوں وی مسیح دے نال زندہ کیتا۔ ‏14 تے حُکم عدولی دی اوہ دستاویز مِٹا ڈِتی جیہڑی ساڈے خلاف ہئی، تے اُونکُوں صلیب اُتے کِیلاں نال جَڑ تے، ساڈے کنُوں دُور کر ڈِتا۔ ‏15 اُونیں حکومتاں تے اختیار آلیاں دے اِختیار کُوں گِھن گِھدا تے صلیب دے وسیلے نال جیت تے اُنہاں دا کُھلے عام تماشا بنڑایا۔

‏16 بس کھاوݨ، پیوݨ، عید مناوݨ، نویں چَن تے سَبت دے بارے ءچ کوئی تُہاڈے اُتے اِلزام نہ لاوے^a ۔ ‏17 ایہہ تاں آوݨ آلیاں چیزاں دا پَرچھاواں ہِن پَر حقیقت مسیح ہے۔ ‏18 کوئی شخص خاکساری دی زندگی گُزارݨ تے فرشتیاں دی عبادت کرݨ نال تُہاکُوں اِنعام کنُوں محروم نہ کر ڈیوے۔ ایجھا شخص رویا ڈیکھنڑ دے بارے ءچ گالھیں کریندے تے آپنڑی جِسمانی سوچ تُوں بِلا وجہ پُھلیا ہوندے۔ ‏19 اوہ مسیح کُوں جیہڑا بدن دا سِر ہے نئیں پکڑیندا، جِیندے نال سارا بدن جوڑاں تے پٹھیاں دے ذریعے پرورش پا تے آپس ءچ جُڑ تے خُدا دی مدد نال وَدھدا وَیندے۔

‏20 جے تُساں مسیح دے نال مرتے دُنیاوی اصُولاں کنُوں آزادتھی گئےہِوے تاں ہُنڑ دُنیا آلیاں وانگوں زندگی کیوں گُزریندے ہِیوے؟ ایجھے اِنسانی حکماں دے کیوں پابند تھیندے ہِیوے؟ ‏21 جو ”نہ جھلّو“ ، ”نہ چکھو“ تے ”نہ ہَتھ لاؤ۔“ ‏22 ایہہ ساریاں چیزاں استعمال تھی تے فنا تھی وَیندیاں ہِن تے ایہہ اِنسان دے بنڑائے ہوئے حُکم تے تعلیمات ہِن۔ ‏23 ایہہ حکمت لگدے ہِن کیوں جو اُنہاں ءچ خود بنڑائےدینی ا عمال تے خاکساری تے جِسمانی ریاضت اُتے زور ڈِتا گِیا ہے پَر جِسمانی خواہشاں اُتے قابو پاوݨ ءچ اُنہاں کنُوں کوئی مدد نئیں مِلدی۔