‏2 تُساں ساریاں کیتےاَساں ہمیشاں خُدا دا شُکر ادا کریندے ہئیں ،تے تُہاکُوں آپنڑی دُعاواں ءچ وی یاد رکھیندے ہئیں۔ ‏3 اَساں تُہاڈے کَم جیہڑے اِیمان دی وجہ کنُوں ہِن تے تُہاڈی محنت جیہڑی محبت دا نتیجہ ہے تے تُہاڈے صبر کُوں جیہڑا ساڈے خُداوند یسوع المسیح اُتے اُمید رکھنڑ دے باعث تُہاڈے ءچ پیدا تھیّا ہے، آپنڑے خُدا تے باپ دی حضوری ءچ بلا ناغہ یاد کریندے ہئیں۔

‏4 اے عزیز بِھراؤ! ساکُوں معلوم ہے جو تُساں خُدا دے چُنڑے ہوئے ہِیوے۔ ‏5 کیوں جو ساڈی خوشخبری محض لفظاں نال نئیں بلکہ قُدرت ، رُوح القُدس تے پورے یقین دے نال تُہاڈے تئیں پُجی ہے۔ تُساں جانڑدے ہِیوے جو اَساں تُہاڈی خاطر تُہاڈے درمیان کِیویں زندگی گُزریندے رِیہے ہاسے ‏6 تے تُساں سخت مصیبت دے باوجود کلام کُوں رُوح القُدس دی خوشی دے نال قبُول کر تےساڈے تے خُداوند دے نمُونے اُتے چلنڑ آلے بنڑ گئے۔ ‏7 اِیں واسطے تُساں مَکِدُنیہ تے اَخیہ دے سارے اِیمانداراں کیتے نمونہ بنڑ گئے۔ ‏8 خُداوند دا پیغام تُہاڈے وسیلے نہ فقط مَکِدُنیہ تے اَخیہ ءچ پھیل گِیا بلکہ خُدا اُتے تُہاڈے اِیمان دا ہر جاہ ایجھا چرچا تھی گِیا ہے جو ہُنڑ ساڈے آکھنڑ دی کوئی حاجت نئیں ریہی۔ ‏9 کیوں جو لوک خود آہدھے ہِن جو جِیں وَیلے اَساں تُہاڈے کولھ گئے تاں تُساں کِیویں ساڈا اِستقبال کِیتا تے کِیویں بُتاں کُوں چھوڑ تے زندہ تے برحق خُدا دی عبادت کرݨ کیتے اُوندی اَل آئے ہِیوے۔ ‏10 تے اُوندے پوتر دے اَسمان کنُوں آوݨ دے مُنتظر ہِیوے، یعنی یسوع جِینکُوں اُونیں مُردیاں ءچوں زندہ کیتا تے جیہڑا ساکُوں آوݨ آلے غضب کنُوں بچیندا ہے۔