3
1 اِیں واسطے جِیں وَیلے اَساں مزید برداشت نہ کر سگے تاں بہتر سمجھیا جو اَساں اتھینے ءچ کلھے رَہوں، 2 تے تِیمُتھِیُس کُوں، جیہڑا ساڈا بِھرا تے مسیح دی خوشخبری دی تبلیغ ءچ خُدا دا خادم ہے، تُہاڈے کولھ بھیجیا تاں جو تُہاکُوں مضبوط کرے تے اِیمان ءچ تُہاڈا حوصلہ وَدھاوے، 3 تاں جو اِنہاں مُصیبتاں دے باعث کوئی گھبرا نہ وَنجے۔ کیوں جو تُساں خود جانڑدے ہِیوے جو اَساں اِنہاں کیتے مُقرر کیتے گئے ہئیں۔ 4 جِیں وَیلے اَساں تُہاڈے کولھ ہاسے تاں تُہاکُوں پہلے ای ڈسا ڈِتا ہئی جو اَساں تکلیفاں چَیسوں ۔تے تُساں جانڑدے ہِیوے جو اِینویں ای تھیّا۔ 5 اِیں وجہ کنُوں جِیں وَیلے میں مزید برداشت نہ کر سگیا تاں تُہاڈے اِیمان دا حال معلوم کرݨ کیتے اُونکُوں بھیجیا، کِتھائیں اِینویں نہ تھیوے جو اَزماوݨ آلے a نیں تُہاکُوں اَزمایا ہووے تے ساڈی محنت بے فائدہ تھی گئی ہووے۔6 پَر ہُنڑ تِیمُتھِیُس تُہاڈے کولُھوں اِتھاں آیا ہے تے تُہاڈے ایمان تے محبت دی خوشخبری ڈِتی تے ڈسایا جو تُساں ساڈا ذِکر ِخیر ہمیشاں کریندے ہِیوے تے ساکُوں مِلنڑ دی ایجھی سِک رکھیندے ہِیوے جِیویں اَساں تُہاڈے کیتے رکھیندے ہئیں۔ 7 اِیں واسطے اے بِھراؤ! اَساں آپنڑی ساری تنگی تے مُصیبت ءچ تُہاڈے اِیمان دی وجہ کنُوں تُہاڈے بارے ءچ تسلی پاتی۔ 8 تے ہُنڑ کیوں جو تُساں خُداوند یسوع ءچ قائم ہِیوے تاں اِیں واسطے اَساں زندہ ہئیں۔ 9 تُہاڈے باعث جیہڑی خوشی حاصل تھئی ہے، اُوندے بدلے ءچ اَساں خُدا دے حضور تُہاڈے کیتے کیویں شُکر ادا کروں؟ 10 اَساں رات ڈینہہ بہُوں دُعا کریندے ہئیں جو تُہاڈی صُورت ڈیکھوں تے تُہاڈے اِیمان دی کمی کُوں پورا کر ڈیؤں۔
11 ہُنڑ ساڈا خُدا تے باپ خود تے ساڈا خُداوند یسوع تُہاڈے دو ساڈی رہنمائی کرے۔ 12 خُداوند کرے جو جِیویں ساکُوں تُہاڈے نال محبت ہے اُونویں ای تُہاڈی محبت وی آپس ءچ تے سارے لوکاں دے نال وَدھدی وَنجے۔ 13 اوہ تُہاڈے دِلاں کُوں ایجھا مضبوط کرے جو جِیں وَیلے ساڈا خُداوند یسوع آپنڑے سارے مُقدساں دے نال آوے تاں تُہاڈے دِل ساڈے خُدا تے باپ دے سامنڑے پاک تے بے عیب ہووݨ۔