‏2 ساڈے باپ خُدا تے خُداوند یسوع مسیح دی طرفوں تُہاکُوں فضل تے اطمینان حاصل تھیندا رَہوے۔

‏3 بِھراؤ ! ہر وَیلے تُہاڈے کیتے خُدا دا شُکر کریندے رَہونڑا ساڈے اُتے فرض ہے۔ تے ایہہ اِیں واسطے مناسب ہے جو تُساں اِیمان ء چ بہُوں ترقی کریندے پئے ہِیوے تے تُہاڈی آپس دی محبت وی وَدھدی وَیندی ہے۔ ‏4 ایہہ تئیں جو اَساں خُدا دی کلیسیاواں ءچ فخر نال تُہاڈا ذِکر کریندے ہئیں جو ظلم تے مصیبتاں سَہوݨ دے باوجود تُساں بہُوں صبر نال آپنڑے اِیمان اُتے قائم ہِیوے۔

‏5 ایہہ خُدا دی سچی عدالت دا واضع ثبُوت ہے جو تُساں اُوندی بادشاہی دے لائق تھی سگو جِیندے کیتے تُساں ڈَکھ چَیندے پئے ہِیوے۔ ‏6 خُدا دی نظر ءچ ایہہ اِنصاف ہے جو اوہ تُہاڈے اُتے مصیبت گِھن آوݨ آلیاں کُوں بَدلے ءچ مصیبت ءچ سَٹے، ‏7 تے تُہاکُوں مصیبت چاوݨ آلیاں کُوں ساڈے نال آرام ڈیوے ۔ایہہ اُوں وَیلے ہوسی جِیں وَیلے خُداوند یسوع آپنڑے زور آور فرشتیاں دے نال بھڑکدی ہوئی بھاہ ءچ اَسمان کنُوں ظاہر تھی سی ‏8 تے اُنہاں کُوں سزا ڈیسی جیہڑے خُدا کُوں نئیں جانڑدے تے ساڈے خُداوند یسوع دی خوشخبری کُوں نئیں مَنیندے۔ ‏9 اوہ لوک خُداوند دی حضوری تے اُوندی جلالی قُدرت کنُوں دُور تھی تے اَبدی ہلاکت دی سزا پے سِن۔ ‏10 ایہہ اُوندے آوݨ آلے ڈینہہ ہوسی جِیں وَیلے اوہ آپنڑے مُقدّس لوکاں ءچ جلال پے سی تے سارے ایمان آلے اُوندی شان و شوکت ڈیکھ تے حیران رہ ویسن۔ اُنہاں ءچ تُساں وی شامل ہوسو کیوں جو تُساں ساڈی گواہی اُتے اِیمان گِھن آئےہَوے۔

‏11 اِیں واسطے اَساں تُہاڈے کیتے متواتر دُعا کریندے رَہندے ہئیں جو ساڈا خُدا تُہاکُوں اِیں بُلاوے دے لائق سمجھے تے آپنڑی قُدرت نال تُہاڈی ہر نیک خواہش تے ایمان نال کیتے ہوئے کَم کُوں پُورا کرے۔ ‏12 تاں جو ساڈے خُداوند یسوع مسیح دا ناں تُہاڈی وجہ کنُوں عزّت پاوے تے تُساں وی اُوندے وسیلے عزت پاؤ۔ ایہہ ساڈے خُدا تے خُداوند یسوع مسیح دے فضل نال تھیسی۔