خُدا دا اُوندے پوتر دے وسیلے نال آخری کلام
1
1 گُزرے زمانیاں ءچ خُدا نیں ساڈے پِیُو ڈاڈا نال مختلف موقعیاں اُتے تے مختلف طریقاں نال نبیاں دی معرفت کلام کیتا 2 پَر اِیں آخری ڈینہاں ءچ ساڈے نال آپنڑے پوتر دی معرفت کلام کیتا جِینکُوں اُونیں سارے چیزاں دا وارث بنڑایا تے جِیندے وسیلے نال اُونیں کائنات کُوں خلق کِیتا۔ 3 پوتر خُدا دے جلال دی چمک تے اُوندی ذات دا عین نقش تھی تے آپنڑے قُدرت آلے کلام نال سارے چیزاں کُوں سنبھال گِھندے۔ اوہ گُناہاں تُوں پاک کرݨ تُوں بعد اَسمان اُتے خُدائےعظیم دے سجے پاسے وَنج بیٹھا۔خُدا دے پوتر دی عظمت
4 اِیں واسطے اوہ فرشتیاں کنُوں اِتنا بزُرگ تھی گِیا جِتنا اُونیں میراث ءچ اُنہاں کنُوں افضل ناں پایا۔ 5 کیوں جو فرشتیاں ءچوں خُدا نیں کَڈݨ کہیں کُوں آکھیا جو
”تُوں میڈا پوتر ہئیں
اَج مَیں تیڈا پیُو بنڑیا a ۔“
تے وَل ایہہ جو
”مَیں اُوندا باپ ہوساں
تے اوہ میڈا پوتر ہوسی b ۔“
6 تے وَل جِیں وَیلے اوہ آپنڑےپلوٹھے کُوں دُنیا ءچ گِھن آندے تاں آہدھے جو
”خُدا دے سبھ فرشتے اُونکُوں سِجدہ کرݨ۔“
7 پَر فرشتیاں دے متعلق اوہ آہدھے جو
”اوہ آپنڑے فرشتیاں کُوں ہواواں
تے آپنڑے خادماں کُوں بھاہ دے شعلے بنڑیندا ہے ۔“
8 پَر پوتر دے بارے ءچ آہدھے جو
”اے خُدا تیڈا تخت ہمیشاں تَئیں قائم رَہسی،
تے تیڈی بادشاہی دا عصا اِنصاف دا عصا ہے۔
9 تَیں نیکی نال پیار کیتے تے بُرائی کنُوں نفرت کیتی ہے۔
اِیں واسطے خُدا یعنی تیڈے خُدا نیں
تیکُوں شادمانی دے تیل نال مخصوص کرتے
تیڈے ساتھیاں کنُوں زیادہ سرفراز کیتا ۔“
10 تے ایہہ وی جو
”اے خُداوند! تَیں اِبتدا ءچ زمین دی بُنیاد رکھی
تے اَسمان تیڈے ہَتھاں دی کاریگری ہے۔
11 اوہ برباد تھی وَیسن پَر تُوں ہمیشاں رَہسیں۔
اوہ پُشاک وانگوں گھس ویسن۔
12 تُوں اُنہاں کُوں چادر وانگوں ولھیٹ گِھنسیں
تے اوہ پُشاک وانگوں بدل ڈِتے ویسن۔
پَر تُوں لا تبدیل ہئیں تے ہمیشاں تئیں قائم رَہسیں۔“
13 خُدا نیں فرشتیاں ءچوں کَڈݨ کہیں دے بارے ءچ ایہہ آکھیا جو
”تُوں میڈے سجے پاسوں بہہ
جئیں تئیں میں تیڈے دُشمنڑاں کُوں
تیڈے پیراں دی چوکی نہ بنڑا ڈیواں ؟“
14 کیا اوہ سارے فرشتے خدمت گُزار رُوحاں نئیں، جیہڑیاں نجات پاوݨ آلیاں دی خدمت کیتے بھیجیاں وَیندیاں ہِن؟