عظیم نجات
2
1 اِیں واسطے جیہڑا کلام اَساں سُنڑیا ہے ،اُوندے اُتے ساکُوں بِیا وی زیادہ غور کرنڑا چاہیدے، کِتھائیں اِینویں نہ تھیوے جو اَساں وَہہ تے اُوندے کنُوں دُور لگے وَنجوں۔ 2 کیوں جو جیہڑا کلام فرشتیاں دی معرفت فرمایا گِیا ہاa، جِیں وَیلے اوہ قائم رِیہا تے ہر خلاف ورزی تے نافرمانی دی سزا مِلی، 3 تاں وَل جے اساں اِتنی وَڈی نجات کنُوں غافل رَہوں تاں کِیویں بچ سگسوں؟ کیوں جو اِیں نجات دا بیان پہلے خُداوند نیں خود کیتا تے وَل جِنہاں اِینکُوں سُنڑیا، اُنہاں نیں اُوندی سچائی ساڈے اُتے ثابت کر ڈِتی۔ 4 نال ای خُدا نشاناں، عجیب کَماں، قِسم قِسم دے معجزیاں تے آپنڑی مرضی دے مطابق رُوح القُدس دیاں تقسیم شُدہ نعمتاں دے ذریعے خود وی گواہی ڈیندا رِیہا۔یسوع مسیح نجات دا ذریعہ تے کامل رَہنما
5 خُدا نیں اُوں آوݨ آلے جہان کُوں فرشتیاں دے تابع نئیں کِیتا جِیندا ذِکر اَساں کریندے ہئیں۔ 6 بلکہ کلام ءچ کِتھائیں کہیں نیں خُدا کُوں ایہہ آکھیا ہے جو
”اِنسان کیا چیز ہے جو تُوں اُوندا خیال رکھیں؟
یا آدم زاد کیا ہے جو تُوں اُوندی خبر گیری کریں؟
7 تَیں اُونکُوں فرشتیاں کنُوں کُجھ ای گَھٹ بنڑایا۔
جلال تے عزّت دا تاج اُونکُوں پوایا۔
[ تے آپنڑے ہَتھاں دے کَماں اُتے اُونکُوں مختار بنڑایا۔]
8 تے ہر چیز اُوندے پیراں تَلے کر ڈِتی ہے۔“
بس جِیں وَیلے لِکھا ہے جو ’ہر چیز اُوندے پیراں تَلے کر ڈِتی ہے‘ تاں اِیندا مطلب ہے جو خُدا نیں کوئی چیز باقی نہ چھوڑی جیہڑی اُوندے تابع نہ کیتی گئی ہووے۔ پَر اَساں ہُنڑ تئیں ساریاں چیزاں اُوندے تابع نئیں ڈیدھے۔ 9 پَر اَساں یسوع کُوں ڈیدھے ہئیں، جِینکُوں کُجھ دیر کیتے فرشتیاں کنُوں گَھٹ کیتا گِیا، تے موت دا ڈُکھ سَہنڑ دے سبّبوں اُونکُوں شان تے عزت دا تاج پوایا گِیا۔ ہاں خُدا دے فضل نال اُونیں ہر اِنسان کیتے مَوت دا مَزہ چکھیا۔ 10 کیوں جو مناسب ہاجوخُدا جِیندے کیتے تے جِیندے وسیلے نال ساریاں چیزاں ہِن، جِیں وَیلے بہُوں سارے فرزنداں کُوں آپنڑے جلال ءچ شامِل کرے تاں اُنہاں دی نجات دے بانی یسُوع کُوں ڈُکھاں دے ذریعے کامل بنڑاوئے۔
11 پاک کرݨ آلا یسوع تے پاک تھیوݨ آلے لوک ہِکو جڑکنُوں ہِن۔ اِیں واسطے اوہ اُنہاں کُوں بِھرا آکھنڑ کنُوں نئیں شرمیندا۔ 12 تے اوہ فرمیندا ہے جو
”میں آپنڑے بِھرانواں کُوں تیڈے ناں دا بیان کریساں،
تے جماعت دے درمیان تیڈی حمد دے گیت گاساں ۔“
13 تے وَل ایہہ جو
”میں اُوندے اُتے بھروسہ رکھیساں ۔“
تے ایہہ جو
”ڈیکھ میں اُنہاں فرزنداں دے نال حاضر ہاں جِنہاں کُوں خُدا نیں میکُوں ڈِتا ۔“
14 کیوں جو خُدا دے ایہہ فرزند اِنسان ہِن ایں واسطےیسوع خود وی اُنہاں دے وانگوں خون تے گوشت بنڑیا تاں جو آپنڑی موت دے وسیلے نال موت دی قُدرت رکھنڑ آلے یعنی اِبلیس کُوں تباہ کر ڈیوے، 15 تے اُنہاں کُوں جیہڑے ساری عُمر موت دے ڈر کنُوں غلامی ءچ گرفتار ریہے، چُھڑا گِھنے۔ 16 حقیقت ءچ یسوع فرشتیاں دا نئیں بلکہ ابرہام دی نسل دی مدد کریندا ہے۔ 17 اِیہو وجہ ہے جواُونکُوں ہر لحاظ نال آپنڑے بِھرانواں دے وانگوں بننڑا لازمی تھیّا، تاں جو اوہ خُدا دی خدمت کرݨ کیتے ہِک رحم دِل تے دیانتدار سردار کاہن بنڑ تے اُنہاں دے گُناہاں دا کفارہ ڈیوے۔ 18 تے کیوں جو یسوع نیں خود اَزمایش دا سامنڑا کیتا، اِیں واسطے اوہ اُنہاں دی وی مدد کر سگدا ہے جیہڑے اَزمایش دا سامنڑا کریندے ہِن۔