خُدا دے لوکاں کیتے دائمی آرام
4
1 بس جِیں وَیلے خُدا دا ایہہ وعدہ قائم ہے جو اَساں اُوندے آرام ءچ داخل تھی سگدے ہئیں تاں ساکُوں خبردار رہنڑا چاہیدے، کِتھائیں اِینویں نہ تھیوے جو تُساں ءچوں کوئی اُوندے ءچ داخل تھیوݨ کنُوں محروم رہ وَنجے۔ 2 جِیویں اُنہاں لوکاں نیں خوشخبری سُنڑی اُونویں ای اَساں وی خوشخبری سُنڑی، پَر جیہڑا پیغام اُنہاں سُنڑیا اوہ اُنہاں کیتے بے فائدہ ثابت تھیّا کیوں جو اُنہاں اُونکُوں اِیمان نال نہ سُنڑیا ہا۔ 3 فقط اَساں جیہڑے اِیمان گِھن آئے ہئیں خُدا دے آرام ءچ داخل تھیندے ہئیں جِیویں اُونیں آکھیا جو”میں آپنڑے غضب ءچ قَسم کھادی جو
اوہ اُوں جاہ ءچ کَڈھائیں داخل نہ تھیسن
جِتھاں میں اُنہاں کُوں آرام ڈیونڑا ہئی ۔“
بھانویں جو دُنیا دے بنڑائے وَنجنڑ دے وقت کنُوں اُوندے کَم پورے تھی گئے ہَنa۔ 4 بلکہ سَتویں ڈینہہ دے متعلق کہیں وقت اِینویں فرمایا گِیا ہےجو
”خُدا نیں آپنڑے کَم کُوں سَتویں ڈینہہ مکمل کیتا تےاِیں تُوں فارغ تھیّا۔“
5 تے وَل اُونہئی جاہ تے اوہ آہدھے،
”اوہ اُوں جاہ ءچ کَڈھائیں داخل نہ تھیسن
جِتھاں میں اُنہاں کُوں آرام ڈیونڑا ہئی۔“
6 جِنہاں سبھ تُوں پہلے ایہہ خوشخبری سُنڑی اوہ آپنڑی نافرمانی دی وجہ کنُوں داخل نہ تھی سگے، پَر کُجھ ہُنڑ وی داخل تھی سگدے ہِن۔ 7 تے خُدا نیں ہِک ڈینہہ مقرّر کِیتا یعنی اَج۔ بہُوں مُدت دے بعد اُونیں داؤد دی معرفت ایہہ گالھ آکھی جیویں پہلے ذِکر تھیّا ہے جو ”جے اَج تُساں اُوندی آواز سُنڑو تاں آپنڑے دِلاں کُوں سخت نہ کرو۔“
8 جے یشوع بن نُون نیں اُنہاں کُوں آرام ڈِتاb ہوندا تاں خُدا اُوندے بعد ہِک بئے ڈینہہ دا ذِکر نہ کریندا۔ 9 اِیں واسطے خُدا دے لوکاں کیتے ایجھاخاص آرام باقی ہے جیہڑا سبت دے ڈینہہ آلی کار ہے۔ 10 کیوں جو جیہڑا کوئی خُدا دے آرام ءچ داخل تھیندے اوہ خُدا وانگوں آپنڑے کَماں تُوں فارغ تھی تے آرام کریندا ہے۔ 11 اِیں واسطے آؤ! اَساں اُوں آرام ءچ داخل تھیوݨ دی پُوری کوشش کروں تاں جو کوئی شخص اُنہاں دے نافرمانی دے نمُونے اُتے ٹُر تے ڈھے نہ پووے۔
12 کیوں جو خُدا دا کلام زندہ تے موثر ہے۔ اوہ ہر ڈو دھاری تلوار کنُوں زیادہ تیز ہے، اِتھوں تئیں جو جان تے رُوح، تے جوڑاں تے مِکھ کُوں چیردا ہویا لَنگھ وَیندے، تے دِل دے خیالاں تے اِرادیاں کُوں پَرکھدے۔ 13 کائنات دی کوئی چیز خُدا دی نظر کنُوں لُکی ہوئی نئیں بلکہ جِیندے حضور ءچ ساکُوں جواب ڈیونڑا ہے، اُوندی نگاہ ءچ ہر چیز ظاہر تے بے پردہ ہے۔
یسوع ساڈا کامل سردار کاہِن
14 بس جِیں وَیلے ساڈا ہِک ایجھا عظیم سردار کاہِن ہے جیہڑا اَسماناں کنُوں لَنگھ گِیا یعنی خُدا دا پُوتر یسوع، تاں آؤ اَساں آپنڑے اِیمان اُتے قائم رَہوں۔ 15 کیوں جو ساڈا سردار کاہِن ایجھا نئیں جیہڑا ساڈی کمزوریاں ءچ ساڈا ہمدرد نہ تھی سگے بلکہ اوہ سارے گالھیں ءچ ساڈے وانگوں اَزمایا گِیا، وَل وی بے گُناہ رِیہا۔ 16 اِیں واسطے اَساں خُدا دے فضل دے تختc دے کولھ دلیری نال چلوں تاں جو اوہ ساڈے اُتے رحم کرے تے اَساں اُوں فضل کُوں حاصل کروں جیہڑا ضرورت دے وقت ساڈی مدد کرے۔