‏4 اوہ لوک جِنہاں دے دِل ہِک پھیری روشن تھی گئے ہِن تے جیہڑے اَسمانی بخشش دا مزہ چَکھ چُکے ہِن، جِنہاں کُوں رُوح القُدس مل چُکیا ہے، ‏5 جیہڑے خُدا دے کلام دی چنگائی تے آوݨ آلے جہان دی قوتاں دا مزہ چَکھ چُکے ہِن، ‏6 جے آپنڑے اِیمان کنُوں وَل پھر وَنجنڑ تاں اُنہاں کُوں وَلا کنُوں توبہ دو رجوع کراوݨ ممکن نئیں۔ کیوں جو اوہ خُدا دے پوتر کُوں آپنڑی اِیں حرکت نال ڈوجھی واری مصلُوب کر تے علانیہ طور تے ذلیل کریندے ہِن۔

‏7 جیہڑی زمین بارش کنُوں متواتر سیراب تھیندی رَہندی ہے اوہ رَڑھ رَہاوݨ آلیاں کُوں چنگی فصل ڈیندی ہے تے خُدا دی طرفوں بابرکت ہوندی ہے۔ ‏8 پَر جے اوہ زمین جھاڑ کَنڈے پیدا کریندی رَہوے تاں کہیں کَم دی نئیں۔ اوہ لعنتی ہووݨ دے قریب ہے تے آخر کار اِینکُوں ساڑ ڈِتا ویسی۔

‏9 عزیزو! بھانویں اَساں ایہہ گالھیں آہدھے ہئیں، وَل وی اَساں تُہاڈے کیتے اِنہاں کنُوں چنگےگالھیں دا یقین رَکھیندے ہئیں جِنہاں دا تعلق نجات نال ہے۔ ‏10 اِیں واسطے جو خُدا بے اِنصاف نئیں جیہڑا تُہاڈے کَم تے اُوں محبت کُوں بُھل وَنجے جیہڑی تُساں اُوندے ناں دی خاطر اُوندے مُقدساں دی خدمت کرݨ کنُوں ظاہر کیتی تے ہُنڑ وی کریندے پئے ہِیوے۔ ‏11 ساکُوں بہُوں سِک ہے جو تُہاڈےءچوں ہر ہِک اِینویں ای کوشش کریندا رَہوے تاں جو تُہاڈی اُمید پوری تھی وَنجے۔ ‏12 تُساں سُست نہ تھیوو بلکہ اُنہاں دے نمُونے اُتے چلو جیہڑے آپنڑے اِیمان تے صبر دے باعث وعدیاں دے وارث تھیندے ہِن۔

‏13 جِیں وَیلے خُدا نیں ابرہام نال وعدہ کیتا تاں اُونیں آپنڑے ای ناں دی قَسم کھادی کیوں جو قَسم کھاوݨ کیتے خُدا کنُوں وَڈا کوئی نہ ہا۔ ‏14 خُدا نیں فرمایا "میں تیکُوں یقین نال برکت ڈیساں تے تیڈی اولاد کُوں بہُوں وَدھیساں۔" ‏15 اِینویں ابرہام نیں صبر دے نال اِنتظار کر تے وعدے دے مُطابق برکت حاصل کیتی۔ ‏16 آدمی تاں آپنڑے کنُوں وَڈے دی قَسم کھاندے ہِن تے ہر قَسم اِختلاف دے خاتمے دی تصدیق تھیندی ہے۔ ‏17 اِیں واسطے جِیں وَیلے خُدا دی مَنشا تھئی جو وعدے دے وارثاں اُتے بِیا وی صاف طور تے ظاہر کرے جو میڈا اِرادہ لاتبدیل ہے تاں اُونیں قَسم کھا تے اِیندی تصدیق کیتی۔ ‏18 خُدا کُوڑ نئیں مار سگدا، اِیں واسطے خُدا دا وعدہ تے خُدا دی قَسم ڈو ایجھیاں چیزاں ہِن جیہڑیاں لاتبدیل ہِن۔تے اِنہاں دی وجہ کنُوں اَساں جیہڑے بھج تے خُدادی پناہ ءچ آ گئے ہئیں، وَڈے حونصلے نال اُوں اُمید کُوں جیہڑی ساڈے سامنڑےہے،پکڑی رکھ سگدے ہئیں۔ ‏19 ایہہ اُمید ساڈے کیتے ایجھا لنگر^a ہے جیہڑا ثابت قدم تے قائم رَہندے تے ساکُوں پردے دے پِچھے خُدا دے پاک مقام تئیں پُچیندا ہے، ‏20 جِتھاں یسوع ساڈے کنُوں پہلے ای وَنج تے ہمیشاں کیتے مَلکِ صدق آلی کار سردار کاہن بنڑ تے ساڈی خاطر داخل تھی گِیا ہے۔