یسوع ساڈا سردار کاہِن
8
1 جیہڑے گالھیں اَساں ہُنڑ اَکھیندے پئے ہئیں، اُنہاں ءچ خاص گالھ ایہہ ہے جو ساڈا ایجھا سردار کاہِن ہے جیہڑا اَسمان اُتے عظیم خُدا دے تخت دے سجے پاسے وَنج بیٹھا، 2 تے مَقدِس ءچ یعنی اُوں حقیقی تمبو ءچ خدمت کریندے جِینکُوں کہیں اِنسان نیں نئیں بلکہ خُداوند نیں کھڑا کیتا۔3 ہر سردار کاہِن نذراں تے قُربانیاں پیش کرݨ کیتے مُقرر کیتا وَیندے، اِیں واسطے لازمی ہا جو ساڈے سردار کاہِن دے کولھ وی پیش کرݨ کیتے کُجھ ہووے۔ 4 جے یسوع زمین اُتے ہوندا تاں اَصلُوں کاہِن نہ ہوندا کیوں جو اِتھاں شریعت دے مُطابق نذراں پیش کرݨ آلے کاہِن موجود ہِن، 5 جیہڑے اُوں مَقدِس ءچ خدمت کریندے ہِن جیہڑا اَسمانی مَقدِس دی نقل تے اُوندا سایہ ہے۔ اِیہو وجہ ہے جو جیں ویلے موسیٰ مقدّس تمبو بنڑاوݨ لگا تاں اُوں وقت خُدا نیں اُونکُوں فرمایا جو ”ساریاں چیزاں اُوں نمونے دے مطابق دھیان نال بنڑا جیہڑا تیکُوں پہاڑ اُتے ڈِکھایا گیا ہا۔“ 6 پَر ہُنڑ مسیح کُوں ڈوجھے کاہناں کنُوں افضل خدمت مِلی ہے کیوں جو اوہ اُوں افضل عہد دا درمیانی ہے، جیہڑا چنگے وعدیاں اُتے قائم کیتا گِیا ہے۔
7 جے پہلا عہد بے نُقص ہونداa تاں ڈوجھے عہد دی لوڑ ای نہ تھیندی۔ 8 پَر خُدااُنہاں لوکاں دے نُقص بیان کر تے فرمیندے جو
”ڈیکھ ! میں خُداوند فرمیندا ہاں جو
اوہ ڈینہہ آندے پئے ہِن جو میں اِسرائیل دے گھرانے،
تے یہُوداہ دے گھرانے دے نال ہِک نواں عہد بَدھیساں۔
9 ایہہ اُوں عہد دے وانگوں نہ ہوسی،
جیہڑا میں اُنہاں دے پِیُو ڈاڈاے نال اُوں ڈینہہ کیتا ہَم
جِیں وَیلے میں مِصر دے مُلک ءچوں
اُنہاں دا ہتھ پکڑ تے اُنہاں کُوں
مصر دے ملک ءچوں کَڈھ تے گِھن آیا ہم
پَر اوہ میڈے عہد اُتے قائم نہ ریہے
تے میں خُداوند نیں اُنہاں دوتوجہ نہ کیتی۔
10 خُداوند ایہہ وی فرمیندے جو
جیہڑا عہد میں بنی اِسرائیل دے نال
اُنہاں ڈینہاں دے بعد کریساں، اوہ ایہہ ہے جو
میں آپنڑے حُکم اُنہاں دے دماغ ءچ پَیساں
تے اُنہاں دے دِلاں اُتے نقش کر ڈیساں
میں اُنہاں دا خُدا ہوساں تے اوہ میڈی اُمت ہوسِن۔
11 کہیں کُوں ایہہ ضرورت نہ تھیسی جو
اوہ آپنڑے وطنی کُوں یا آپنڑے بِھرانواں کُوں
ایہہ تعلیم ڈیوے جو خُداوند کُوں سُنجاݨ،
کیوں جو چھوٹے کنُوں وَڈے تئیں سارے میکُوں سُنجاݨ گِھنسِن۔
12 میں اُنہاں دیاں بُرائیاں کُوں معاف کر ڈیساں
تے اُنہاں دے گُناہاں کُوں وَلا یاد نہ کریساں۔“
13 خُدا نیں ”نویں عہد“ دا ذکر کرتے پہلے کُوں پُرانڑا قرار ڈِتا۔ تے جیہڑی چیز پہلے دی ہے اوہ پُرانڑی تے ناکارہ ہے، اوہ جلدی ختم تھی ویسی۔