‏6 بس اِنہاں چیزاں دے اِیں طریقے نال تیار تھی وَنجنڑ دے بعد کاہِن آپنڑی خدمت کرݨ کیتے تمبو دے پہلے حصے ءچ بار بار داخل تھیندے رَہندے ہَن۔ ‏7 پَر ڈوجھے حصے ءچ صرف سردار کاہِن سال ءچ فقط ہِک واری ای وَیندا ہا۔تے اوہ آپنڑی تے اُمت دے بُھل چُک آلے گناہاں دی خاطر پیش کرݨ کیتے قُربانی دے خُون دے بغیر نئیں ویندا۔ ‏8 اِیندے تُوں رُوح القُدس دا ایہہ اشارہ ہے جو جِیں وَیلے تئیں ایہہ پہلا تمبو موجود ہے، مقدّس ترین مقام تئیں وَنجنڑ دا رستہ نئیں کُھلدا۔ ‏9 اوہ موجودہ زمانے کیتے ہِک مِثال ہے، تے ایہہ ظاہر کریندے جو جیہڑیاں نذراں تے قُربانیاں اُتھاں پیش کیتیاں وَیندیاں ہِن، اوہ عبادت کرݨ آلے دے دِل کُوں پوری طرح مُطمئن نئیں کر سگدیاں۔ ‏10 اُنہاں دا تعلق صرف کھاوݨ پیوݨ تے جِسمانی غسلاں ^a نال ہے۔ ایہہ جِسمانی قانون ہَن جیہڑے صرف نویں نظام دے آوݨ تئیں مُقرر کیتے گئے ہَن۔

‏11 پَر ہنڑ مسیح سردار کاہن بنڑتے آ گِیا ہے تے ساکُوں چنگیاں برکتاں مِلدیاں پِیاں ہِن۔ اوہ عظیم تے کامِل تمبو ءچ داخل تھی گِیا ہےجیہڑا اِنسانی ہَتھاں دا بنڑایا ہویا نئیں بلکہ اِیں دُنیا دا نئیں۔ ‏12 اوہ بکریاں تے وچھیاں دا خُون گِھن تے نئیں بلکہ آپنڑا خون گِھن تے ہِکو واری مقدّس ترین مقام ءچ داخل تھی گِیا تے ساکُوں ایجھی مخلصی ڈِتی جیہڑی ہمیشاں کیتے ہے۔ ‏13 کیوں جو جِیں وَیلے بکرے تے ڈانداں دے خُون تے وچھے دی راکھ دے چھنڈکے وَنجنڑ نال ناپاک لوک جِسمانی طور تے پاک تھیندے ہِن، ‏14 تاں مسیح دا خون جئیں اَزلی رُوح القُدس دے وسیلے نال آپنڑے آپ کُوں خُدا دے حضور ءچ ہِک بے عیب قُربانی کیتے پیش کر ڈِتا، تُہاڈے دِل کُوں ایجھے مَوت گِھن آوݨ آلے کَماں تُوں کیوں نہ پاک کریسی تاں جو تُساں زندہ خُداوند دی عبادت کرو۔

‏15 اِیہو وجہ ہے جو مسیح نویں عہد دا درمیانی ہےتاں جو خُدا دی طرفوں سَڈے گئے لوک وعدہ کِیتی ہوئی اَبدی میراث کُوں حاصل کرݨ۔ ایہہ ایں واسطے ممکِن تھی گیا ہے جو مسیح نیں اُنہاں کُوں اُنہاں گناہاں دی سزا کنُوں چُھڑاوݨ کیتے آپنڑی جان فدیہ دے طور تے ڈِتی، جیہڑے اُنہاں نیں پہلے عہد دے وقت کیتے ہَن۔

‏16 جِتھاں وَصیت^b ہووےاُتھاں وَصیت کرݨ آلے دی مَوت دا ثابت تھیونڑا وی لازمی ہوندے۔ ‏17 کیوں جو وَصیت فقط موت دے بعد عمل ء چ آندی ہے۔ وَصیت کرݨ آلے دے جِیندے جی وَصیت اُتے عمل نئیں تھی سگدا۔ ‏18 اِیہو وجہ ہے جو پہلا عہد وی بغیر خُون دے نئیں بدھیا گِیا۔ ‏19 جِیں وَیلے موسیٰ نیں ساری اُمت کُوں شریعت دا ہِک ہِک حُکم سُنڑا ڈِتا تاں اُونیں وَچھیاں تےبکریاں دا خون گِھن تے پانڑی ءچ رَلایا۔ وَل اُونیں رَتی کپاہ تے زُوفا بُوٹے دی لَڑی دے ذریعے اُوں خُون کُوں شریعت دی کتاب تے سارے لوکاں اُتے چھِنڈک ڈِتا۔ ‏20 تے آکھیا، " ایہہ خُون اُوں عہد کُوں قائم کریندا ہے جِیندے اُتے خُدا نیں تُہاکُوں عمل کرݨ دا حکم ڈِتا ہے۔" ‏21 اِیں طرحاں اُونیں خُون کُوں مقدّس تمبو اُتے تے عبادت دی ساریاں چیزاں اُتے چِھنڈک ڈِتا۔ ‏22 اصل ءچ شریعت دے مُطابق تقریباً ساریاں چیزاں خُون نال پاک کیتیاں وَیندیاں ہِن تے جِیں وَیلے تئیں خون نہ وَہایا وَنجے معافی نہ مِلدی ہئی۔

‏23 بس ایہہ لازمی ہا جو ایہہ چیزاں جیہڑیاں اَسمانی چیزاں دی نکل ہَن، ایجھیاں قُربانیاں دے وسیلے نال پاک کیتیاں وَنجنڑ۔ پَر اَسمانی چیزاں اِنہاں کنُوں چنگی قُربانی دے وسیلے نال۔ ‏24 مسیح اِنسانی ہَتھاں دے بنڑائے مَقدِس ءچ، جیہڑے حقیقی مَقدِس دی صرف نقل ہِن، داخل نئیں تِھیّا بلکہ اَسمان ءچ ای داخل تھیّا تاں جو اوہ ساڈی خاطر خُدا دے آمنڑے سامنڑے حاضر تھیوے۔ ‏25 زمین اُتے سردار کاہِن مقدّس ترین کمرے ءچ ہر سال ڈوجھے دا یعنی جانوراں دا خُون گِھن تے وَینداہے پَر مسیح نیں آپنڑے آپ کُوں وَلا وَلا قُربانی دے طور تے پیش نہ کیتا۔ ‏26 نہ تاں دُنیا دے شروع کنُوں گِھن تے ہُنڑ تئیں اُونکُوں وَلاوَلا موت دا ڈُکھ چاونڑا پوندا۔ پَر ہُنڑ زمانیاں دے آخر ءچ مسیح ہِک واری ظاہر تھیّا تاں جو آپنڑے آپ کُوں قُربان کرݨ نال گُناہ کُوں فنا کر ڈیوے۔ ‏27 تے جِیویں اِنسان دا ہِک واری مَرݨ تے اُوندے بعد عدالت دا تھیوݨ مُقرر ہے، ‏28 اُونویں ای مسیح وی بہُوں سارے لوکاں دے گُناہ آپنڑے سِر اُتے چا وَنجنڑ کیتے ہِکو واری قُربان تھیّا۔ تےاوہ ڈوجھی واری گُناہ چا وَنجنڑ کیتے نئیں بلکہ اُنہاں کُوں نجات ڈیوݨ کیتے ڈِکھالی ڈیسی جیہڑے اُوندے اِنتظار ءچ ہِن۔