‏5 میڈے پیارے بِھراؤ سُنڑو! کیا خُدا نیں دُنیا دے غریباں کُوں نئیں چُنڑیا جو اِیمان ءچ دولت مند ہووݨ تے اُوں بادشاہی دے وارث ہووݨ جِیندا اُونیں آپنڑے مُحبت رکھنڑ آلیاں کُوں ڈیوݨ دا وعدہ کیتا ہویا ہے؟ ‏6 پَر تُساں غریب دی بے عزتی کیتی۔ کیا دولت مند ای تُہاڈے اُتے ظلم نئیں کریندے تے تُہاکُوں عدالتاں ءچ گِھیل تے نئیں گِھن وَیندے؟ ‏7 کیا ایہہ لوک مسیح دے ناں دی توہین نئیں کریندے جِیندے نال تُساں منسوب ہِیوے؟

‏8 جے تُساں خُدا دے کلام دے اِیں شاہی فرمان دے مطابق جو "آپنڑے ہمسائے نال آپنڑے وانگوں محبت رکھ" عمل کریندے ہِیوے تاں چنگا کریندے ہِیوے۔ ‏9 پَر جے تُساں طرفداری نال کَم گِھندے ہِیوے تاں گُناہ کریندے ہِیوے تے شریعت تُہاکُوں قصوروارکھڑیندی ہے۔ ‏10 کیوں جو جے کوئی ساری شریعت اُتے عمل کرے پَر کہیں ہِک حُکم دا نافرمان تھیوے تاں اوہ ساری شریعت دا قصُوروارکھڑدے۔ ‏11 کیوں جو جئیں آکھیا جو ”زِنا نہ کر“، اُونیں ایہہ وی آکھیا جو ”خون نہ کر۔“ بس جے تُوں زِنا تاں نئیں کریندا پَر خون کر یندیں تاں تُوں شریعت دا نافرمان تھیّا۔ ‏12 تُساں آپنڑے قول وفعل ءچ اُنہاں لوکاں وانگوں بنڑو جِنہاں دا اِنصاف آزاد کرݨ آلی شریعت دے مطابق تھیسی۔ ‏13 کیوں جو جِیں نیں رحم نئیں کیتا، اُوندی عدالت بغیر رحم دے کیتی ویسی۔ پَر رحم عدالت اُتے غالب آندے۔

‏14 میڈے بِھراؤ! جے کوئی آکھے جو میں اِیمان رکھیندا ہاں تے اوہ عمل نہ کریندا ہووے تاں کیا فائدہ؟ کیا ایجھا اِیمان اُونکُوں نجات ڈے سگدے؟ ‏15 جے کہیں بِھرا یا بھینڑ کولھ کپڑے نئیں تے روزانہ کھاوݨ کیتے روٹی نئیں، ‏16 تے تُہاڈے ءچوں کوئی اُنہاں کُوں آکھے جو ” خیر نال وَنج، گرم تھی تے کھا پی “ پَر اُنہاں کُوں جِسمانی ضرورت دیاں چیزاں نہ ڈیؤ تاں کیا فائدہ؟ ‏17 اِینویں ای جے اِیمان دے نال اَعمال نہ ہووݨ تاں اوہ اِیمان وی مُردہ ہے۔

‏18 تھی سگدے جو کوئی آکھے جو ” تُوں اِیمان رکھیندا ہئیں پَر میں عمل کریندا ہاں۔“ تُوں بغیر اَعمال دے آپنڑا اِیمان میکُوں ڈِکھا تے میں آپنڑا اِیمان آپنڑے اَعمال کنُوں تیکُوں ڈِکھیساں۔ ‏19 تُوں اِیمان رکھیندیں جو خُدا ہِک ای ہے۔ بہُوں چنگا کریندیں، ایہہ تاں شیاطین وی مَنیندے ہِن تے ڈرتے کمبدے ہِن۔ ‏20 پَر اے بیوقوف! کیا تُوں ایہہ وی نئیں سمجھدا جو اِیمان عمل دے بغیر مُردہ ہے؟ ‏21 جِیں وَیلے ساڈے پِیُو ابرہام نیں آپنڑے پوتر اِضحاق کُوں قُربان گاہ اُتے نذر کیتا تاں کیا اوہ آپنڑے اُوں عمل دی وجہ کنُوں راستباز نہ تھیّا؟ ‏22 ڈیکھو! اُوندے اِیمان نیں اُوندے اَعمال دے نال رَل تے اثر کیتا تے اَعمال دے ذریعے اِیمان کامل تھی گِیا۔ ‏23 اِینویں خُدا دے کلام دی ایہہ گالھ پوری تھئی جو ”ابرہام خُدا اُتے اِیمان گِھن آیا تے ایہہ اُوندے کیتے راستبازی شمار کیتا گِیا،“ تے ”اوہ خُدا دا دوست اَکھوایا۔“ ‏24 بس تُساں ڈیکھ گِھدے جو اِنسان کلھا اِیمان نال ای نئیں بلکہ اَعمال نال راستباز کھڑدے۔

‏25 اِینویں ای جِیں وَیلے راحب فاحشہ نیں جاسُوساں کُوں پناہ ڈِتی تے ڈوجھے رستے کنُوں کَڈھ ڈِتا تاں کیا اوہ آپنڑے اَعمال کنُوں راستباز نہ کھڑی؟

‏26 بس جِیویں بدن بغیر رُوح دے مُردہ ہے، اُونویں ای اِیمان وی بغیر اَعمال دے مُردہ ہے۔