ڈیکھو! ہِک چھوٹی جیہی چنگاری نال کِتنے وَڈے جنگل ءچ بھاہ لگ وَیندی ہے۔ ‏6 زبان وی ہِک بھاہ ہے۔ اوہ باقی اَنگاں دے درمیان رہ تے آپنڑے اندر بُرائی دی ہِک دُنیا رکھی پئی ہے۔ زبان ساڈا اوہ اَنگ ہے جیہڑاسارے جِسم کُوں وِگاڑ ڈیندا ہے تے ساری زندگی کُوں ساڑ ڈینداہے کیوں جو اوہ خُود دوزخ دی بھاہ کنُوں بلدا رَہندا ہے۔ ‏7 اِنسان ہر قِسم دے جانور، پَکھیں، کیڑے مکوڑے تے سمندری جانوراں کُوں آپنڑے قابو ءچ رکھ سگدے ہِن بلکہ کر وی گِھدا ہے۔ ‏8 پَر کوئی اِنسان زبان کُوں قابو ءچ نئیں رکھ سگدا۔ ایہہ ہِک بلا ہے جیہڑی کڈھائیں نئیں رُکدی تے ہلاک کرݨ آلے زہر کنُوں بھری ہوئی ہے۔

‏9 اِیں زبان نال ای اَساں خُداوند تے باپ دی حمد کریندے ہئیں تے اِیندے نال ای اِنساناں کُوں جیہڑے خُدا دی صورت اُتے خلق کیتے گئے ہِن بد دُعا ڈیندے ہئیں۔ ‏10 ہِکو مُنہ تُوں برکت تے لعنت نِکلدی ہے۔ بِھراؤ! اِینویں تاں نئیں ہوونڑا چاہیدا۔ ‏11 کیا چشمہ دے ہِکو مُنہ کنُوں مِٹھا تے کھارا پانڑی نِکل سگدے؟ ‏12 اے میڈے بِھراؤ! کیا ہنجیر دے درخت کنُوں زیتون تے انگور کنُوں ہنجیر پیداتھی سگدے ہِن؟ نئیں۔ اِینویں ای کھارے پانڑی دے چشمہ کنُوں مِٹھا پانڑی نئیں نِکل سگدا۔

‏13 تُہاڈے ءچوں کیہڑا دانشمند تے سمجھدارہے؟ جیہڑا ایجھا ہووے، اوہ آپنڑے چنگے کردار دے ذریعے، تے ایجھی حلیمی نال جیہڑی حکمت کنُوں پیدا تھیندی ہے نیک عمال دے ذریعے اُونکُوں ثابت کرے۔ ‏14 پَر جے تُہاڈے دِل ءچ حسد دی کڑواہٹ تے تفرقہ بازی ہے تاں شیخی نہ مارو تے نہ ای حق دے خلاف کُوڑ نال کَم گِھنو۔ ‏15 ایجھی حِکمت اَسمان کنُوں نئیں لَہندی بلکہ دُنیوی، نفسانی تے شیطانی ہوندی ہے۔ ‏16 کیوں جو جِتھاں حسد تے تفرقہ بازی ہوندی ہے اُتھاں فساد تے ہر بُرا کَم وی ہوندا ہے۔ ‏17 پَر جیہڑی حِکمت اَسمان کنُوں لَہندی ہے، اول تاں اوہ پاک ہوندی ہے، وَل صُلح پسند، نرم مزاج، تربیت پذیر، رحم تے چنگے کَماں نال بھری ہوندی ہے۔ اُوندے ءچ طرفداری تے منافقت نئیں ہوندی۔ ‏18 صُلح کراوݨ آلے جیہڑے صُلح دے نال رَہندے ہِن اوہ راستبازی دی فصل رَہیندے ہِن۔