طُومار a تے برّہ
5
1 وَل میں اُوندے سَجے ہَتھ ءچ ، جیہڑا تخت اُتے بیٹھا ہئی، ہِک طُومار ڈِٹھا جیہڑا ڈوہائیں پاسوں لکھیا ہویا ہئی، تے جِینکُوں سَت مُہراں لا تے بند کیتا گِیا ہئی۔ 2 وَل میں ہِک فرشتہ کُوں ڈِٹھا جیہڑا اُچی آواز نال ایہہ آدھا پِیا ہئی جو ”کوݨ اِنہاں مُہراں کُوں تَروڑ تے اِیں طُومار کُوں کھولنڑ دے لائق ہے؟“ 3 پَر اَسمان اُتے یا زمین اُتے یا زمین دے تَلے کوئی شخص اُوں طُومار کُوں کھولنڑ تے اُونکُوں پڑھنڑ دے لائق نہ ہا۔ 4 تے میں بُٹ بُٹ رووݨلگ پِیا کیوں جو کوئی وی اِیں لائق نہ تھیّا جو جیہڑا اُوںطُومار کُوں کھول سگے یا اُونکُوں پڑھ سگے۔ 5 وَل اُنہاں بزُرگاں ءچوں ہِک نیں میکُوں آکھیا جو ”نہ رو، ڈیکھ، یہوواہ دے قبیلہ دا شیر ِ ببر جیہڑا داؤد دی نسلb ہے، غالب آیا ہے۔ اُوہو اُوں طُومار کُوں تے اُوندیاں سَتاں مُہراں کُوں کھول سگدا ہے۔“6 وَل میں اُوں تخت تے اُنہاں چارے جانداراں تے اُنہاں بزُرگاں ءچ جِیویں ذبح تھیّا ہویا ہِک برّہ ڈِٹھا۔ اُوندے سَت سِینگ ہَن تے سَت اَکھیں۔ ایہہ خُدا دیاں سَت رُوحاںc ہِن جیہڑیاں ساری زمین اُتے بھیجیاں گِیاں ہِن۔ 7 اوہ برّہ آیا تے اُونیں تخت اُتے بیٹھے ہوئے دے سَجے ہَتھ کنُوں اوہ طُومار گِھن گِھدا۔ 8 تے جِیں وَیلے اُونیں اوہ طُومار گِھن گِھدا تاں اوہ چارے جاندار تے اوہ چویح بزُرگ ، برّہ دے سامنڑے سِجدہ ءچ ڈھے پئے۔ اُنہاں ءچوں ہر ہِک دے کولھ بربط تے بخُور کنُوں بھرے سونے دے مُنگر ہَن۔ ایہہ مُقدساں دیاں دُعاواں ہِن۔ 9 تے اوہ ایہہ نواں گیت گاوݨ لگے جو
”تُوں اِی اِیں لائق ہئیں جو طُومارکُوں گِھن تے
اُوندیاں مُہراں کھولیں، کیوں جو تَیں ذبح تھی تے
آپنڑے خون نال ہر قبیلہ، ہر زبان، ہر اُمت تے
ہر قوم کنُوں لوکاں کُوں خُدا دے واسطے مُل گِھن گِھدے۔
10 تے اُنہاں کُوں ساڈے خُدا کیتے ہِک بادشاہی
تے کاہِن بنڑا ڈِتا تے اوہ زمین اُتے بادشاہی کریسن۔“
11 وَل میں نِگاہ کیتی تاں لکھاں کروڑاں فرشتیاں دی آواز سُنڑی جیہڑے اُوں تخت تے اُنہاں جانداراں تے بزُرگاں دے چودھارُوں موجود ہَن۔ 12 اوہ اُچی آواز نال آہدھے پئے ہَن جو
”ذبح تھیّا ہویا برّہ ای قُدرت ، دولت ،
حِکمت ،عزت ، جلال تے تمجید دے لائق ہے۔“
13 وَل میں اَسمان تے زمین اُتے تے زمین دے تَلے تے سمُندر دی ساری مخلوق کُوں یعنی ساریاں چیزاں کُوں جیہڑیاں اُنہاں ءچ ہِن، ایہہ آہدھے ہوئے سُنڑیا جو
”جیہڑا تخت اُتے بیٹھا ہے، اُوندی تے برّہ دی تمجید،
عزت ، جلال تے قُدرت ہمیشاں تئیں رَہوے۔“
14 تے چارے جانداراں نیں آکھیا "آمین" تے بزُرگاں نیں ڈھے تے سِجدہ کیتا۔