‏1 اِیندے بعد میں ڈِٹھا جو زمین دے چارے چُونڈھاں اُتے چار فرشتے کھڑے ہَن۔ اوہ زمین دی چارے ہواواں کُوں جَھلی کھڑے ہَن تاں جو زمین یا سمندر یا کہیں درخت اُتے ہوا نہ چلے۔ ‏2 وَل میں ہِک بئے فرشتے کُوں زِندہ خُدا دی مُہر گِھدے ہوئے مشرِق کنُوں اُتے چڑھدا ڈِٹھا۔ اُونیں اُنہاں چارے فرشتیاں کُوں جِنہاں کُوں زمین تے سُمندر کُوں نقصان پُچاوݨ دا اِختیار ڈِتا گِیا ہا، اُچی آواز ءچ آکھیا، ‏3 جو ”جِیں وَیلے تئیں اَساں آپنڑے خُدا دے بندیاں دے مَتھیاں اُتے مُہر نہ لا گِھنوں، زمین تے سُمندر تے درختاں کُوں نقصان نہ پُچائے۔“ ‏4 وَل میں سُنڑیا جو جیہڑے لوکاں اُتے مُہر کیتی گئی ہئی، اُنہاں دا شمار بنی اِسرائیل دے سارے قبیلیاں ءچوں ہِک لَکھ چوتالیہہ ہزار (144,000 ) ہا۔ ‏5 یُہوداہ دے قبیلہ ءچوں بارہاں ہزار (12,000) اُتے مُہر کیتی گئی، رُوبن دے قبیلہ ءچوں بارہاں ہزار اُتے، جدّ دے قبیلہ ءچوں بارہاں ہزار اُتے، ‏6 آشر دے قبیلہ ءچوں بارہاں ہزار اُتے، نفتالی دے قبیلہ ءچوں بارہاں ہزار اُتے، منسّی دے قبیلہ ءچوں بارہاں ہزار اُتے۔ ‏7 شمعون دے قبیلہ ءچوں بارہاں ہزار اُتے،لاوی دے قبیلہ ءچوں بارہاں ہزار اُتے، اشکار دے قبیلہ ءچوں بارہاں ہزار اُتے۔ ‏8 زبُولُون دے قبیلہ ءچوں بارہاں ہزار اُتے، یُوسف دے قبیلہ ءچوں بارہاں ہزار اُتےتے بِنیمِین دے قبیلہ ءچوں بارہاں ہزار اُتے۔