ڈو حیوان
13
1 تے اژدہا سُمندر دے کِنارے اُتے کھڑا تھی گِیا۔وَل میں ہِک حیوانa کُوں سُمندر ءچوں نِکلدے ڈِٹھا۔ اُوندے ڈاہ سینگ تے سَت سِر ہَن تے سینگاں اُتے ڈاہ تاج ہَن۔ اُوندے سِراں اُتے کُفر دے ناںb لکھے ہَن۔ 2 جئیں حیوان کُوں میں ڈِٹھا ہا، اُوندی شکل چیتے وانگوں ہئی، پیر ریچھ وانگوں تے مُنہ ببر شیر جِیہا ہئی۔ اژدہا نیں آپنڑی قُدرت، آپنڑا تخت تے وڈا اِختیار اُوں حیوان کُوں ڈے ڈِتا۔ 3 میں اُوندے سِراں ءچوں ہِک اُتے مُہلک زخم دا نِشان ڈِٹھا۔ اوہ مُہلک زخم چنگا تھی گِیا تے دُنیا آلے حیران تھیندے ہوئے اُوں حیوان دے پِچھوں تھی پئے۔ 4 اُنہاں نیں اژدہا دی پُوجا کیتی کیوں جو اُونیں آپنڑا اِختیار اُوں حیوان کُوں ڈے ڈِتا ہا، تے حیوان دی وی پُوجا کِیتی تے آکھنڑ لگے جو ”اِیں حیوان دے وانگوں کوݨ ہے؟ کوݨ ہے جیہڑا اُوندے نال لَڑ سگدے؟“5 وَڈے وَڈے بول بولنڑ تے کُفر بکنڑ کیتے اُونکُوں ہِک مُنہ ڈِتا گِیا۔ اُونکُوں اِختیار ڈِتا گِیا جو اوہ بِیالیہہ مہینے تئیں ایہہ کَم کریندا رَہوے۔ 6 اُونیں خُدا دی شان ءچ کُفر بکنڑ کیتے آپنڑا مُنہ کھولیا جو اُوندے ناں تے اُوندی سکُونت گاہ دی نسبت یعنی اَسمان ءچ رہوݨ آلیاں دے خلاف کُفر بکے۔ 7 اُونکُوں مُقدساں نال جنگ کرݨ تے اُنہاں اُتے غالب آوݨ دی طاقت ڈِتی گئی تے ہر قبیلہ، اُمت ، زبان تے قوم اُتے اِختیار ڈِتا گِیا۔ 8 تے زمین دے اوہ سبھ رَہوݨ آلے جِنہاں دے ناں اُوں برّہ دی کتاب ِ حیات ءچ نئیں لکھے گئے جیہڑا دُنیا دے بننڑ تُوں پہلے ذبح تھیّا ہے، اُوں حیوان دی عبادت کریسن۔
”جے کوئی غُلامی کیتے ہے تاں اوہ غُلامی ءچ ویسی۔
جے کوئی تلوار نال قتل کریسی تاں اوہ تلوار نال ای قتل کیتا ویسی۔“
مُقدساں دے صبر تے اِیمان دا اِیہو وقت ہے۔
11 وَل میں ہِک حیوان کُوں زمین ءچوں نِکلدے ڈِٹھا۔ اُوندے ڈو سِینگ ہَن جیہڑے برّہ دے سینگاں وانگوں ہَنc، پَر اژدہا وانگوں بولیندا ہا۔ 12 اوہ پہلے حیوان دا سارا اِختیار اُوندی خاطرچَلیندا ہا تے دُنیا تے اُوندے رَہوݨ آلیاں کُنوں اُوں پہلے حیوان دی جِیندا مُہلک زخم چنگا تھی گِیا ہا، عبادت کروَیندا ہا۔ 13 اوہ وَڈے وَڈے کرشمے ڈکھیندا ہا۔ اِتھوں تئیں جو لوکاں دے اَکھیں دے سامنڑے اَسمان کنُوں بھاہ نازل کر ڈینداہا۔ 14 اُنہاں کرشمیاں دے ذریعے جیہڑے اُونکُوں اُوں پہلے حیوان دی خاطر ڈِکھاوݨ کیتے ڈِتے گئے ہَن، اوہ زمین آلیاں کُوں گُمراہ کریندا ہا ۔تے اُنہاں کُوں حُکم ڈیندا ہا جو اُوں حیوان دا جِینکُوں تلوار دا مُہلک زخم لگا ہا، تے وَل وی اوہ زندہ ہا، بُت بنڑاؤ۔ 15 اُونکُوں پہلے حیوان دے بُت ءچ دَم پھونکنڑ دا اِختیار ڈِتا گِیا تاں جو حیوان دا بُت بولنڑ لگےتے جیہڑے اُوں بُت کُوں سِجدہ کرݨ دا اِنکار کریسن، اُنہاں کُوں قتل کروا چھوڑے۔ 16 ڈُوجھے حیوان نیں چھوٹیاں، وَڈیاں، امیرغریب، آزاد غُلام تے سارے لوکاں دے سَجے ہَتھ اُتے یا مَتھے اُتے نشانd لوا ڈِتا۔ 17 تے فقط اوہ لوک جِنہاں اُتے اُوں حیوان دا نشان یعنی اُوندا ناں یا اُوندے ناں دا عدد ہوسی ،خریدوفروخت کر سگسن۔
18 ایہہ گالھ حِکمت آلیاں کیتےہے۔ جیہڑا سمجھدار ہے، اوہ اِیں حیوان دا عدد گِنڑ گِھنے کیوں جو ایہہ ہِک آدمی دا عدد ہے تے اُوندا عدد چھی سو چھیٔٹھ (666) eہے۔