‏4 وَل میں تخت ڈِٹھے جئیں اُتے اوہ لوک بیٹھے ہَن جِنہاں کُوں عدالت کرݨ دا اِختیار ڈِتا گِیا ہا۔ تے میں اُنہاں لوکاں دِیاں رُوحاں ڈِٹھیاں جِنہاں دے سِر یسوع دی گواہی ڈیوݨ تے خُدا دے کلام دی وجہ کنُوں کَپ ڈِتے گئے ہَن۔ اُنہاں لوکاں نیں نہ تاں اُوں حیوان دی تے نہ اُوندے بُت دی عبادت کیتی تے نہ مَتھے یا ہَتھاں اُتے اُوندا نِشان لوایا ہا۔ اوہ زندہ تھی گئے تے ہِک ہزار سال تئیں مسیح دے نال بادشاہی کریندے ریہے۔ ‏5 باقی مُردے ہِک ہزار سال پورے تھیوݨ تئیں زندہ نہ تھئے۔ ایہہ پہلی قیامت ہے۔ ‏6 مُبارک تے مُقدّس ہِن اوہ لوک جیہڑے پہلی قیامت ءچ شریک ہِن۔ اُنہاں اُتے ڈوجھی مَوت دا کوئی اِختیار نئیں بلکہ اوہ خُدا تے مسیح دے کاہِن ہوسِن تے ہزار سال تئیں اُوندے نال بادشاہی کریندے رَہسن۔

‏7 جِیں وَیلے ہزار سال پورے تھی وَیسن تاں شیطان آپنڑی قید ءچوں رِہا کر ڈتا ویسی۔ ‏8 تے ساریاں قوماں کُوں جیہڑیاں زمین دے چودھارُوں آباد ہِن یعنی جوج ماجوج^a کُوں گُمراہ کر تے جنگ کیتے جمع کریسی۔ اُنہاں دا شمار سُمندر دی ریت دے برابر ہوسی۔ ‏9 اوہ ساری زمین اُتے کِھنڈ ویسن تے مُقدّساں دی لشکر گاہ تے اُوں عزیز شہر کُوں چودھارُوں گھیر گِھنسن۔ وَل اَسمان کنُوں بھاہ نازل تھیسی تے اُنہاں کُوں ساڑ تے سواہ کر سَٹیسی۔ ‏10 تے اِبلیس، جئیں اُنہاں کُوں گُمراہ کیتا ہا، گندھک تے بھاہ دی جھیل ءچ سَٹیا ویسی جِتھاں اوہ حیوان تے کُوڑا نبی وی ہوسی تے اوہ ڈینہہ رات ہمیشاں تئیں عذاب ءچ رَہسن۔

‏11 وَل میں ہِک وڈا سفید تخت تے اُونکُوں جیہڑا اُوندے اُتے بیٹھا ہا، ڈِٹھا۔ زمین تے اَسمان اُوندی حضوری کنُوں بھج گئے تے اُنہاں کُوں کِتھائیں ٹِکانڑا نہ مِلیا۔ ‏12 تے میں چھوٹے وَڈے سارے مُردیاں کُوں تخت دے سامنڑے کھڑے ڈِٹھا۔تے کِتاباں کھول ڈِتیاں گِیاں۔ وَل ہِک بئی کِتاب وی کھول ڈِتی گئی جیہڑی کِتاب ِ حیات ہے تے ساریاں مُردیاں دی عدالت اُنہاں دے اعمال دے مطابق کیتی گئی جیہڑے اُنہاں کِتاباں ءچ لکھے ہَن۔ ‏13 سُمندر نیں اُنہاں مُردیاں کُوں جیہڑے اُوندےءچ ہَن ڈے ڈِتا تے مَوت تے عالم ِ ارواح نیں آپنڑے مُردیاں کُوں ڈے ڈِتا تے ہر ہِک دی عدالت اُوندے اعمال دے مطابق کیتی گئی۔ ‏14 وَل مَوت تے عالم ِ ارواح کُوں بھاہ دی جھیل ءچ سَٹ ڈِتا گِیا۔ ایہہ بھاہ دی جھیل ڈوجھی مَوت ہے۔ ‏15 تے جئیں کہیں دا ناں کِتاب ِ حیات ءچ لکھیا نہ مِلیا، اُونکُوں بھاہ دی جھیل ءچ سَٹ ڈِتا گِیا۔