پوتر دا پیدا تھیونڑاں

پیدائش 17،18،21ابواب

تعارف۔ 25 سالاں دے بعد ابرام دا ناں تبدیل کر تے ابرہام تے ساری دا ناں تبدیل کر تے سارہ رکھیا گیاہا۔۔انھاں   دے پوتر دے جمنڑ دے نال تاریخ نے   نواں رُخ اختیار کیتا۔

پیدائش 17 باب

جیں ویلے ابراہام ننانوے سال دا تھیا ۔خُدا نےآپنڑے آپ کوں ابراہام اتے ظاہر کیتا۔ خُدا   نےابرہام کوں آکھیا۔ میں قادرِمُطلق خُدا ہاں توں میڈے حضور ٹردا رہ تے کامل بنڑ۔ ڈیکھ !میڈا عہد تیڈے نال ہے تے توں بہوں قوماں دا پیو بنڑسیں۔  ہنڑ تیڈا ناں ابرام نہ ہوسی  بلکہ تیڈا ناں  ابرہام ہوسی۔ قوماں تیڈی نسل ءچوں نکلسن  تے بادشاہ تیڈی اولاد ءچوں نکلسن۔میں تیکوں  تے  تیڈی نسل کوں  پورا مُلکِ کنعان ڈیساں۔ میں اُنھاں  دا رب ہوساں۔ تہاڈے ہر ہک فرزند نرینہ دا ختنہ کیتا ونجے۔ ایہہ اوں عہد دا نشان ہوسی جیہڑا میڈے تے تیڈے درمیان ہے۔ خُدا     نےابرام کوں آکھیا ۔ ساری جیہڑی تیڈی ذال ہے ،اوندا ناں سارہ ہوسی تے قوماں اوندی نسل ءچوں  ہوسن۔ سارہ کنوں  تیڈا  ہک پوتر جمسی اوندا ناں اضحاق رکھائےمیں اوندے تے اُوندی نسل نال عہد بدھیساں۔

پیدائش18 باب

خُدا نےفرمائے جو یقیناً ہک وڈی تے زبردست قوم  تیڈے ءچوں پیدا تھی سی،ساریاں قوماں اوندے وسیلے نال برکت پےسن۔ کیوں جو میں جانڑدا  ہاں  جو او ہ آپنڑے پوتراں تے گھرانڑے کوں جیہڑے پچھو ں رہ ویسن وصیت کریسی۔ جیہڑے خُدا دی راہ ءچ قائم رہ تے عدل تے انصاف کریسن     تاں  جو ، جیہڑا کجھ خُدا نےابرہام دے حق ءِچ فرمایا ہے اُونکوں پورا کرنڑ۔

اضحاق دا جمنڑاں

(پیدائش 21 باب)

خُدا   نےجیویں اُونیں  فرمایا ہا ،سارہ اتے  نظر کیتی۔ اُو نیں  آپنڑے وعدہ دے مطابق سار ہ کوں  آکھیا۔ ول سار ہ کوں حمل تھی گیا۔ ابرہام کیتے  بُڈھیپے ءِچ اُوں معین وقت اتے جیندا ذکر خُدا نیں  اوندے نال کیتا ہا ،اوندا پوتر جمیا۔ ابرہام   نےآپنڑے پوتر دا ناں جیہڑا سارہ توں جمیا ہا،اضحاق رکھیا ابرہام   نےخُدا دے حُکم دے مُطابق اضحاق دا ختنہ اوں  ویلے  کیتا جیں  ویلے او ہ اٹھ ڈینہہ دا ہا۔ جیں  ویلے اوندا پوتر اضحاق اُوں توں جمیا ابرہام سو سال دا  ہا ۔ سارہ نیں  اُونکوں آ کھیا خُدا نیں  میکوں کِھلائے ۔سارے سنڑن آلے میڈے نال کھلسن۔ ول ایہہ  وی آکھیا بھلا کوئی  ابرہام کوں آکھ سگدا  ہا جو سارہ  پوتر  کو ں کھیر پلیسی۔کیوں جو اوں توں بڈھپیے ءچ میڈا ہک پوتر تھیاء ۔ او ہ چھوہر وڈا تھیا     ۔اوندا کھیر چھڑایاگیا۔ اضحاق دے کھیر چھڑاونڑ دے ڈینہہ ابرہام نیں  وڈی خوشی منائی۔

سوالات

۔ خُدا نیں  ابرہام کوں نواں ناں جیہڑا ڈتہ ایندے توں  کیا مراد ہے؟

۔ ابرہام تے اوندی نسل نال خُدا نیں  جیہڑا عہد بدھیا او ہ کیا اکھویندے؟

۔ابرہام کوں آپنڑی اولاد  کوں کیجھی تعلیم ڈیونڑی  ہئی؟

۔ ابرہام تے سار ہ کوں اولاد کیتے، کیتی سال انتظار کرنڑا پیا۔انتظار ساڈی زندگی ءِچ کیہڑی چیز گھن آندے؟