المسیح دا مردیاں ءچوں زندہ تھیونڑاں
( متی ۲۸ باب، مرقس ۱۶ باب، لوقا ۲۴ باب، یوحنا ۲۰ باب)
(تعارف) ’’میڈے بھراؤ! اج ایں کہانڑی ءچوں اساں سیکھسوں جو المسیح کینویں مردیاں ءچوں زندہ تھئے۔ چار ہزار سال تئیں موت نیں انسانی نسل تےحکمرانی کیتی ایہہ موت باغِ عدن ءچ گناہ دے ذریعے داخل تھئی ہئی تاں اتھاں فوری طور تے خدا طرفوں وعدہ ڈتاگیا جو ہک ڈینہہ عورت دی نسل ءچوں ہک بندا آسی جیہڑا نانگ دے سر کوں کچلیسی تے نسل انسان کوں آزاد کریسی تے اوہ ڈینہہ اج آسی۔
(لوقا۔24۔1)’’سبت دے بعد ہفتہ دے پہلے ڈینہہ سیجھ پھوٹنڑدے ویلے عورتاں خوشبو دار چیزاں جیہڑیاں انھاں تیار کیتیاں ہَن گھن تے قبر اتےآئیاں۔(متی۔28۔4)’’ تاں ڈیکھو ہک وڈا زلزلہ آیا کیوں جو خدادا فرشتہ آسمان توں لتھیاتے اونیں قبر تےپئے پتھر کوں لڑھکا ڈتا تے اوں تےبہہ گیا اوندی صورت بجلی آلی کار ہئی تے اوندی پوشاک برف آلی کار چٹی ہئی اوندے ڈر توں چوکیدار کنمب گئے تےمردیاں وانگوں تھی گئے۔(5)’’ او ہ اتھاں کائنی۔(6)’’ کیوں جو او ہ اپنڑے وعدے دے مطابق زندہ تھی گیا ہے جلدی ونج تے اوندے شاگرداں کوں آکھو جو او ہ مردیاں ءچو ں زندہ تھی گیاہے۔(8)’’ اوہ عورتاں خوف تےوڈی خوشی دے نال قبر توں روانہ تھی تے اوندے شاگرداں کوں خبر ڈیونڑبھجیاں۔(لوقا۔24۔11)’’ شاگرداں نیں عورتاں دا یقین نہ کیتا۔(12)’’ ایں تے پطرس اٹھ تے قبر آلے پاسے بھجیا تےجھک تے نظر کیتی تے ڈیٹھا جو صرف کفن ای ہے مگر المسیح دی لاش کوں نہ ڈٹھاتے ایں ماجرے توں تعجب کر کے لگا گیا۔(متی۔28۔11)’’ ول پہرے داراں نیں شہر ءچ آ تے سارا ماجرا سردار کاہناں نال بیان کیتا۔(12)’’ انہاں نیں سپاہیاں کوں بہوں سارا روپیہ ڈے تے آکھیا۔(13)’’ جو تساں ایں آکھ ڈیوائے جو رات کوں جڈاں اساں ستے پائے ہاسے اوندے شاگرد آئے لاش چوری کر تے گھن گئے جے ایہہ گالھ حاکم دے کن تئیں اپڑی تاں اساں اونکوں سمجھا ڈیسوں۔(15)’’ بس انھاں نیں پیسہ گھن تے جینویں اونہیں کوں سکھایا گیا ہا اونویں ای کیتا تے ایہہ گالھ اج تئیں یہودیاں ءچ مشہور ہے۔(یوحنا۔20۔19)’’ وَل اوں شام المسیح آتے انھاں دے وچال کھڑا تھی گیا تے انھاں کوں آکھیا تہاڈی سلامتی ہووے۔(لوقا۔24۔37)’’پر او ہ گھبرا گئے تےخوف ذدہ تھی تے ایہہ سمجھنڑ لگے جو کہیں روح کوں ڈیدھے ہین۔(38)’’ المسیح نیں فرمایا تساں کیوں گھبریندے ہیوے تےکیوں تہاڈے دِل ءچ شک پیدا تھیندا ہے۔(39)’’میڈے ہتھاں تےپیراں کوں ڈیکھو میں ای ہاں میکوں پکڑ تے ڈیکھو جو روح دی گوشت تےہڈی نیں ہوندی جینویں میڈے ءچ ڈیدھے ہیوے۔(یوحنا۔20۔20)’’ بس شاگرد المسیح کوں ڈیکھ تے خوش تھئے۔(لوقا۔24۔44)’’ وَل المسیح نیں انھاں کوں آکھیا جو ایہہ میڈیاں او ہ گالھیں ہِین جیہڑیاں میں اوں ویلے آکھیاں ہن جڈاں میں تہاڈے نال ہم جو ضرور ہے جتنیاں گالھیں موسیٰ دی توریت ءچ تے نبیاں دے صحیفیاں تے زبور ءچ میڈے بارے لکھیاں ہویاں ہِین او ہ ساریاں پوری ہوسن یعنی ایہہ جو۔(46)’’المسیح ڈکھ چیسی تے تریجھے ڈینہہ مردیاں ءچو ں زندہ تھی ویسی۔(47)’’ ساریاں قوماں ءچ توبہ تے گناہاں دی معافی دی منادی اوندے ناں توں کیتی ویسی۔(متی۔28۔19)’’ بس تساں ونج تے ساریاں قوماں کوں شاگرد بنڑاؤ تےانھاں کوں باپ تےپوترتے روح القدس دے ناں نال بپتسمہ ڈیوتے انھاں کوں ایہہ تعلیم ڈیو جو او نہیں ساریاں گالھیں اتےعمل کرنڑ جنہاں دا میں تہاکوں حکم ڈتاہے۔(مرقس۔16۔17۔18)’’تے ایمان گھن آلیاں دے وچال ایہہ معجزے تھیسن جو او ہ میڈے ناں توں بدروحاں کوں کڈھیسن نویاں نویاں زباناں بولیسن اوہ بیماراں تےہتھ رکھیسین تے بیمار چنگے تھی ویسن۔(لوقا۔24۔49)’’ تے ڈیکھو جیندا میڈے باپ تہاڈے نال وعدہ کیتا ہے میں اونکوں تہاڈے اتے نازل کریساں۔
’’ دوستو ! میں امید کرینداہاں جو اج دی کہانڑی تساں دوستاں کوں بہوں چنگی لگی ہوسی۔ تےایں کہانڑی دے چار سوال ہِین میں امید کرینداہاں جو تساں ساکوں انھاں سوالاں دے ضرور جواب ڈیسو۔
(1)’’ ایہہ واقعہ تاریخ دے عظیم ترین ڈینہہ دا بیان کریندا ہے ایہہ او ہ ڈینہہ ہے جڈاں ایں زمین تےزندگی تے موت دے بارے ءچ انسان دی سوچ مکمل طور تےبدل گئی۔تہاڈا ایندے بارے ءچ کیا خیال ہے؟
(2)’’ المسیح دے مردیاں ءچوں جی اٹھنڑداساریاں توں پہلے کینکوں پتہ لگا ۔؟
(3)’’ اوں رات جڈاں شاگرداں نیں المسیح کوں ڈیٹھا تے پکڑایا شاگردیں دا ردِ عمل کیا ہا۔؟
(4)’’ المسیح نیں کیا فرمایا جو ساریاں قوماں ءچ کیہڑی گالھ دی منادی کرنڑاں ضروری ہے۔؟
