ہک رومی المسیح تے ایمان گھن آندا ہے۔(اعمال:10باب)
(تعارف)’’ دوستو ! اج میں بھرانواں کوں ایہہ کہانڑی سنڑوینداہاں جو نجات غیر قوماں تئیں کینویں پجی تے مقدس پطرس ہک سبق سیکھندے ہین۔ ’’قیصریہ ءچ کرنیلیس ناں ہک بندا ہا اوہ اوں پلٹن دا صوبیدار ہا جیہڑی اطالیانی آکھویندی ہئ ۔
(2)’’ او ہ دین دار ہا تےاپنڑے سارے گھرانیں سمیت خدا توں ڈردا ہا تےیہودیاں کوں بہوں ساری خیرات ڈیندا ہا تے ہر ویلے خدا توں دعا کریندا ہا۔(3)’’ ہک ڈینہہ خدا دے فرشتے نیں اوندے کولھ آ تے آکھیا کرنیلیس۔(4)’’اوں آکھیا فرما مالک۔(5)’’ فرشتے نیں آکھیا یافہ ءچ بندے بھیج تے شمعون کوں جیہڑا پطرس آکھویندا ہےِ سڈ گھن (6)’’ اوہ ہک کھلڑی رنگنڑآلے دا مہمان ہےجیندا ناں شمعون ہےتےاوندا گھر سمندر دے کنارے ہے۔(9)’’ ڈوجھے ڈینہہ پطرس ڈوپہار دے نیڑےدعا کرنڑکیتے چھت تےچڑھیا۔(10)’’ تےاوں تےبے خودی چھا گئی۔(11’’ تےاو نیں ڈیٹھا جو ہک چیز وڈی چادر آلی کار آسمان توں لڑھکدی ہوئی زمین آلے پاسے لاہندی پئی ہے۔(12)’’ جیندے ءچ ہرنسل دے جانور تےکیڑے مکوڑے تےہوا دے پکھی ہَن۔(13)’’ تےاونکوں ہک آواز آئی جو اٹھ ذبح کر تےکھا۔(14)’’ مگر پطرس نیں آکھیا اے مالک ہرگز نئیں کیوں جو میں کڈھائیں کوئی حرام یا ناپاک چیز نیں کھادی۔(15)’’ وَل ڈوجھی پھیری اونکوں آواز آئی جنھاں کوں خدا نیں پاک کیتے توں انھاں کوں حرام نہ آکھ ۔(16)’’ ترے پھیری اینویں ای تھیا۔(17)’’ جڈاں پطرس اپنڑے دِل ءچ حیران تھیندا پیا ہا جو کھلی اکھیاں نال روحانی عالم ءچ جیہڑا منظر میں ڈیٹھا ہے کیا ہےِ تاں ڈیکھو او ہ بندے جنھاں کوں کرنیلیس نیں بھیجا ہا شمعون دا گھر گولھ کے اتھاں اپڑیے۔(18)’’ تےپچھنڑلگے جو شمعون جیہڑا پطرس آکھویندا ہے اتھائیں مہمان ہے ۔(19)’’روح القدس نیں پطرس کوں آکھیا جو ڈیکھ ترے بندے تیڈا پچھدے ودے ہین۔(20)’’بے جھجھک انھاں دے کولھ لگا ونج کیوں جو میں ای انھاں کوں بھیجیا ہےِ ۔(23)’’تے ڈوجھے ڈینہہ اوہ اٹھ تے انھاں دے نال روانہ تھئے تے یافہ ءچ بئے بھرا انھاں دے نال قیصریہ ءچ کرنیلیس دے گھر ءچ داخل تھئے۔(24)’’ تے کرنیلیس اپنڑے رشتہ داراں تےقریبی دوستاں کوں کٹھا کر تے انھاں دا راہ ڈیدھا پیا ہا۔(27)’’ تےپطرس اندر گیا تےبہوں سارے لوکاں کوں کٹھے ڈیکھ تے انھاں کوں آکھیا جو۔(28)’’ تساں تاں جانڑدے ہیوے جو یہودیاں کوں غیر قوماں آلیاں نال صحبت رکھنڑاں یا انھاں دے نال ونجنڑاں جائز نیں مگر خدانیں میں تےظاہر کیتے جو میں کہیں بندے کوں نجس یا نا پاک نہ آکھاں۔(34)’’ پطرس نیں آکھیا ہنڑ میکوں پورا یقین تھی گئے جو رب کہیندا طرفدارنئیں۔(35)’’ بلکہ ہر قوم ءچوں جیہڑا اوں کنوں ڈردے تے راستبازی دے کم کریندےاو ہ اونکوں پسند آندےِ (38)’’ خدانیں المسیح ناصری کوں روح القدس تےقدرت نال کینویں المسیح کیتے اوہ بھلائی کریندا تےانھاں ساریاں کوں جیہڑے شیطان دے ہتھوں ظلم چیندے ہَن شفا ڈیندا ریہاکیوں جو خدااوندے نال ہا۔(39)’’ تے اساں انھاں ساریاں کماں دے گواہ ہیں جیہڑےالمسیح نیں یہودیاں دے ملک تےیروشلیم ءچ کیتے تے انھاں نیں المسیح کوں صلیب تےلٹکا تے مار ڈتا۔(40)’’ اونکوں خدا نیں تریجھے ڈینہہ زندہ کیتے تےظاہر وی کر ڈتا۔(43)’’ اوندی سارے نبی گواہی ڈیندے ہین جو جیہڑا کوئی اوندے اتےایمان گھن آسی اوندے ناں توں گناہاں دی معافی حاصل کریسی۔(44)’’ پطرس ایہہ گالھیں آدھا ای پیا ہا جو روح القدس دانزول انھاں ساریاں اتےتھیا جیہڑے کلام سنڑدے پئے ہَن۔(45)’’ تے پطرس دے نال جیہڑے ایماندار آئے ہن او ہ سارے حیران تھئے جو غیر قوماں تے وی روح القدس دی بخشش جاری تھئی۔(46)’’کیوں جو انھاں کوں طرح طرح دیاں زباناں بولیندےتے خدا دی تمجید کریندے سنڑیا ۔پطرس نیں آکھیا۔(47)’’ کیا کوئی پانڑی توں روک سگدا ہےجو ایہہ بپتسمہ نہ گھنن جنھاں نیں ساڈی طرح روح القدس کوں بخشش دے طور تےپاتے؟ (48)’’ تےپطرس نیں حکم ڈتا جو انھاں کوں المسیح دے ناں ءچ بپتسمہ ڈتا ونجے۔‘‘
دوستو ! میں امید کرینداہاں جواج دی کہانڑی تہاکوں بہوں چنگی لگی ہوسی تےایں کہانڑی ءچ ساڈے چھی سوال ہین آؤسوال سنڑوں۔
(1)’’ کرنیلیس کیہڑے قسم دا بندا ہا اوندے نال کونڑ ہم کلام تھیا۔؟
(2)’’ مقدس پطرس کوں حلال کرنڑتےکھاونڑ دا کیوں آکھیا گیا تےخدامقدس پطرس کوں کیا پیغام ڈینداپیا ہا۔؟
(3)’’ مقدس پطرس نیں کیا اعتراف کیتا جو یہودی غیر قوماں نال کیا ورتاواکریندے ہَن۔؟
(4)’’کرنیلیس دے گھر تےمقدس پطرس نیں کیا پیغام ڈتا۔؟
(5)’’ جیہڑے لوک ایمان گھن آئے انھاں دے نال کیا تھیا کیا انھاں دا تجربہ فطری ہا یا فطری۔؟
(6)’’مذہبی وابستگی یا پسِ منظر توں قطع نظر ایں واقعے دی روشنی ءچ کیا نظر آندا ہے جو خدا دی بادشاہی کیہڑے لوکاں کیتے ہے ۔؟
’’ دوستو! اج دی کہانڑی تہاکوں بہوں چنگی لگی ہوسی میں امید کرینداہا ں جو تساں ساڈے ڈتے گئے نمبر تےضرور رابطہ کریسو۔ تےایں پروگرام دے نال اپنڑے بھرا غلام فرید کوں ڈیو اجازت وَل ملسوں ۔
