آخری کھانڑاں (متی ۲۶ باب ، یوحنا ۱۴، ۱۶ باب)
(تعارف) دوستو ! اج اساں المسیح دی موت دے بارے ءچ سکھسوں جو انھاں اپنڑے شاگرداں کوں اپنڑی موت دے بارے ءچ پہلے ڈس ڈتا ہئی آخری کھانڑاں کھادا تےانھاں آخری حکم ڈتا۔ (متی26: 14)
’’اوں ویلے انھاں بارھاں ءچوں ہک جیندا ناں یہوداہ اسکر یوتی ہا نیں سردار کاہناں دے کولھ ونج تے آکھیا۔(15) جےمیں المسیح کوں تہاڈے حوالے کراں تاں میکوں کیا ڈےسو؟ انہاں نیں آکھیا اساں تیکوں چاندی دے تریح سکے ڈیسوں ۔(20)’’ جڈاں شام تھئی تاں المسیح بارھاں شاگرداں دے نال کھانڑاں کھاندا بیٹھا ہا تے۔(21)’’ جڈاں او ہ کھاندا پیا ہَا تاں المسیح نیں آکھیا میں تہاکوں سچ آدھاں جو تہاڈے ءچوں ہک میکوں پکڑویسی۔(22)’’ ول ہر ہک اونکوں آکھنڑ لگا اے مالک کیا میں ہاں۔؟ (23)’’ او نیں جواب ءچ آکھیا جئیں میڈے نال سالنڑدے برتن ءچ ہتھ پاۓاوھو میکوں پکڑویسی۔(25)’’ اوندے پکڑاونڑآلے یہوداہ جواب ء چ آکھیا اے استاد کیا میں ہاں ؟المسیح نیں اونکوں آکھیا تئیں خود آکھ ڈتے۔(متی:26۔26)’’ بس یہوداہ اسکر یوتی روٹی دا گراں گھن تے باہر لگا گیا جڈاں او ہ کھاندے پئے ہَن تاں المسیح نیں روٹی گھدی تےبرکت ڈے تے تروڑی تے شاگرداں کوں ڈے تے آکھیا جو گھنو ایہہ میڈا بدن ہے۔(27)’’ میڈی یاد گاری ءچ اینویں ای کیتا کرو وَل پیالہ دے ءچ (انگور دا شیرہ ) گھن تے شکر کیتا تےانھاں کوں ڈے تے آکھیا تساں سارے ایں ءچوں پیو۔(28)’’ کیوں جو ایہہ میڈا او ہ عہد دا خون ہے جیہڑا بہوں سارے لوکاں دے گناہاں دی معافی کیتے وہایاویندے۔(یوحنا۔14۔1)’’تہاڈا دل نہ گھبراوے تساں خدا تے ایمان رکھیندے ہیوے میڈے تےوی رکھو۔(2)’’ میڈے باپ دے گھر ءچ بہوں سارے مکان ہِین جے نہ ہوندے تاں میں تہاکوں آکھ ڈیندا کیوں جو میں وینداہا ں تاں جو تہاڈے کیتے جاہ تیار کراں۔(3)’’ تے جے میں ونج تے تہاڈے کیتے جاہ تیار کراں تاں ول آتے تہاکوں اپنڑے نال گھن گھن ساں تاں جو جتھاں میں ہاں اتھاں تساں وی ہو۔(4) تے جتھاں میں وینداہا ں تساں اتھاں دی راہ جانڑدے ہیوے۔(5)’’ توما رسول نیں اونکوں آکھیا اے مالک اساں نئیں جانڑدے جو توں کتھاں ویندا ہیں اساں راہ کینویں جانڑوں۔؟ (6)’’ المسیح نیں آکھیا راہ تے حق تے زندگی میں ہاں کوئی میڈے وسیلے دے بغیر باپ کولھ نیں آندا۔(21) ’’ جیہڑا میڈے حکماں تےعمل کریندا ہے اوہو میڈے نال محبت کریندا ہے۔(15۔12)’’ میڈا حکم ایہہ ہے جو جینویں میں تہاڈے نال محبت رکھی ہے تساں وی ہک ڈوجھے نال محبت رکھو۔(یوحنا۔16۔33)’’ میں تہاکوں ایہہ گالھیں ایں واسطےآکھیاں ہن جو تساں میڈے ءچ اطمینان پاؤ ۔دنیا ءچ مصیبت چیندے ہیوے پرحوصلہ رکھو میں دنیا تے غالب آیا ہاں۔(متی۔26۔30)’’وَل او ہ گیت گا تے زیتون دے پہاڑ تےگئے۔
دوستو ! ایہہ کہانڑی یقیناً تساں سجنڑاں کوں چنگی لگی ہوسی۔ ایں کہانڑی ءچ ساڈے چھی سوال ہِین میں امید کرینداہا ں جو تساں انھاں سوالاں دے ضرور جواب ڈیسو۔
(1)’’ کیا المسیح جانڑدے ہن جو انھاں کوں کیہڑا پکڑویسی۔؟
(2)’’ سردار کاہن تےفریسی المسیح کوں کیوں گرفتار کراونڑچاہندے ہَن۔؟
(3)’’ المسیح نیں اپنڑے شاگرداں کوں کیا آکھیا جو او ندی یاد گاری ءچ کیا کرنڑ۔؟
(4)’’ المسیح دا بدن کیہڑے لوکاں کیتے تروڑیا ویندےتے کیندے کیتے اوندا خون واہایا ویندا ہے۔؟
(5)’’ المسیح نیں آکھیا راہ حق تے زندگی میں ہاں انھاں لفظاں توں المسیح دا کیا مطلب ہے۔؟
(6)’’ المسیح نیں کیا فرمایا جو ساکوں خدادے کولھ کینویں آنونڑاں چاہیدا ہے۔؟
