خطرناک چیز

افریقہ دے ہک ملک بنام تنزانیاءچ ہک ڈاکٹر دا ہسپتال ہا ،جیہڑا ہک سنسان تے ڈراونڑی جاہءچ ہا ۔اوںءچ ہک دوا ساز جیندا ناں داؤدی ہا ،ڈھڈھ دے مرض دی دوا بنڑیندا پیا ہا ۔

ڈینہہ ڈھل گیا ہا تے بڈنڑ آلا ہا ۔ درختاں دے پچھاویں لمبے تھی گئے ہن ۔کاں راہنڑ کیتے ولدے پائے ہن تے درختاں دیاں لڑیاں تے بہہ تے کاں کاں کریندے تے لڑدے ہن ۔ ہسپتال دے باہر کجھ مریض پچھاویںءچ بہہ تے آپسءچ گالھ مہاڑ کریندے پائے ہن۔

انھاں ءچوں ہک جیندے سر تے جنگھ اُتے پٹی بدھی ہئی کنب تے آلایا ۔’’ بھراؤ! میکوں تاں شیر توں بہوں ڈر لگدے ‘‘

ہک موٹے تازے چھوہر کھنگھ تے آکھیا ’’ بس مشکی نانگ دا ناں سنڑ تے ای جان سک ویندی ہے  ،

داؤدی دوا بنڑیندا پیا ہا تے تول تول کے ہک بوتلءچ سٹیندا پیا ہا

انھاں تریہاں دیاں گالھیں سنڑ تے داؤدی اچی آواز نال آکھیا ’’ ہاں ایہ ٹھیک ہے پر جنھاں جانوراں توں واقعی ڈرنڑاں چاہیدا ہے او ہین مچھر پسو تے ماکھی ۔ اے ہوندے تاں چھوٹے ہین ۔پر ہین زہریلے ہزاراں بندیاں دیاں جاناں گھن ویندے ہین ۔جنگلی جانور
تاں تھوڑے زیادہ لوکاں کوں مریندے ہین ۔ پر انھاں چھوٹے چھوٹے کیڑیاں دی وجہ توں سالءچ ہزاراں گنا زیادہ  لوک مردے ہین ۔اتنا آکھ تے داؤدی کجھ دیر کیتے چپ ریہا تے ول بولیا ۔ لیکن انھاں کیڑیاں توں وی خطرناک ہک چیز ہے ۔ داؤدی دی گالھ سنڑ
تے لوک حیرت تے ڈر توں کمبنڑ لگے تے انگوگو جیہڑا ہر روز انکھاںءچ دوائی سٹنڑ آندا ہا بہوں گھبرایا ۔

دائودی آکھیا ایں مہلک چیز دا حال میں تہاکوں کئی طریقیاں نال سمجھیساں ۔ کیوں جو ایہ بہوں  ضروری ہے جو تساں چنگی طرح اوندے بارےءچ سمجھ گھنو ۔

داؤدی ہک چوکنڈا ڈبہ چا تے انھاں لوکاں کوں ڈیکھایا تے پچھیا جو اوندیاں کتنیاں تہاں ہین ؟ ہک جواب ڈتہ چار ۔پر انگوگو آکھیا نہ چھی ۔کیوں جو ہک اتے ہک تلے وی ہے ۔ داؤدی آکھیا۔ ہا ٹھیک ہے  ایویں ہک مہلک چیز دیاں وی کئی شکلاں ہین ۔اج رات
جڈاں پکھی درختاں تے ستے ہوسین تے چارے پاسے سناٹا ہوسی تے اساں جنگل ءچ بھاہ بال کے باہسوں اوں ویلے میں تہاکوں ایں مضمون تے کہانڑیاں سنڑویساں جئیں توں تساں سمجھ سگسو جو ایہ مہلک چیز ساریاں ڈراونڑیاں چیزاں توں زیادہ خطر ناک ہے۔