ڈاہ حُکم

ڈاہ حُکم

خروج  20:  1 –  17

خُدا ایہ سبھ گالھیں آکھیاں:

1۔  پہلا حُکم:  خُدا کُوں ہک منیں۔

(میں رب العالمین تیڈا خُدا ہاں، جیہڑا تیکُوں^a مُلک ِ مِصر دی غلامی ءچوں کڈھ آیا ہاں۔  تُوں میڈے علاوہ کہیں بئے معبُود دی پرستش نہ کرِیں۔)

2۔ ڈوجھا حُکم : کہیں بُت دی پُوجا نہ کریں۔

(آپنڑے کیتے بُت نہ بنڑاویں۔ کہیں وی شے دی مُورت نہ بنڑاویں، بھانویں او اسمان اُتے یا تلے زمین اُتے یا سمندر ءچ ہووے۔ نہ بُتاں کُوں سِجدہ کرِیں تے نہ اُنہاں دی عبادت کرِیں، کیوں جو میں رب العالمین تیڈا خُدا غیور خُدا ہاں۔ جیہڑے میڈے نال نفرت کریندے ہِن، اُنہاں کُوں میں تریجھی تے چوتھی پُشت تئیں سزا ڈینڈا ہاں۔ پر جیہڑے میڈے نال محبت رکھیندے تے میڈے حُکم مَنیندے ہِن، اُنہاں اُتے میں ہزار پُشتاں تئیں مہربان رَہندا ہاں۔)

3۔تریجھا حُکم :   خُدا دا ناں بے فائدہ استعمال نہ کریں۔

(تُوں آپنڑے خُدا رب العالمین دا ناں غلط کَماں کیتے اِستعمال نہ کرِیں۔ جیہڑا وی اِینویں کریندے، اُونکُوں رب العالمین سزا ڈتے بغیر نہ چھوڑیسی۔)

4۔  چوتھا حُکم : سبت  دے ڈینہہ کُوں پاک منیں۔

(یاد کر تے تُوں سبت دے ڈینہہ کُوں مُقدّس مَناوِیں۔ ہفتے دے پہلے چھی ڈینہہ تُوں محنت کر تے آپنڑا سارا کم کرِیں۔ پر ستواں ڈینہہ رب العالمین تیڈے خُدا دے سبت دا ڈینہہ ہے۔ اُوں ڈینہوار اصلُوں کم نہ کرِیں، نہ تُوں نہ تیڈے پوتر، نہ دِھی، نہ نوکر، نہ نوکرانڑی، نہ ڈنگرتے نہ پردیسی جیہڑا تیڈے نال رَہندا ہووے۔ کیوں جو رب العالمین چھی ڈینہاں ءچ زمین، اسمان، سمندر تے جیہڑا کُجھ اُنہاں دے وچال ہے بنڑایا تے سَتویں ڈینہہ آرام کیتا۔ اِیں کیتے رب العالمین سبت دے ڈینہہ کُوں برکت ڈے تے اُونکُوں مخصوص تے مُقدّس کیتا۔)

5۔ پنجواں حُکم: آپنڑے ما ء پیُو دی عزت  کریں۔

( تُوں آپنڑے ماء پِیُو دی عزت کرِیں، تاں جو اُوں ملک ءچ جیہڑا رب العالمین تیڈا خُدا تیکُوں ڈیوݨ آلا ہے، تُوں دیر تئیں زندہ رَہویں۔)

6۔ چِھینواں حُکم: قتل نہ کریں۔

(تُوں قتل نہ کرِیں۔)

7۔ ستواں حُکم:  زنا نہ کریں۔

(تُوں زِنا نہ کرِیں۔)

8۔اٹھواں حُکم: چوری نہ کریں۔

( تُوں چوری نہ کرِیں۔)

9۔  نوواں  حُکم :  آپنڑے ہمسائے دے بارے ءچ کُوڑی گواہی نہ ڈیوِیں۔

(تُوں آپنڑے ہمسائے دے بارے ءچ کُوڑی گواہی نہ ڈیوِیں۔)

10۔ڈاہواں  حُکم:  آپنڑے ہمسائے دی کہیں چیز  دا لالچ نہ کرِیں۔

(تُوں آپنڑے ہمسائے دے گھر دا لالچ نہ کرِیں۔ اُوندی ذال، نوکر، نوکرانڑی، ڈاند تے کھوتے بلکہ اُوندی کہیں وی شے دا لالچ نہ کرِیں۔ )