اوہ تحفہ جیہڑا آسمان توں لتھا

کرسمس مناونڑ کوئی رسم نئیں بلکہ ایہ ہک احساس تے محبت دا ڈینھ ہے۔ اوہ ڈینھ جڈاں آسمان دی خاموشی ءچوں خدا تعالیٰ دی طرفوں محبت، امید تے امن دی آواز گونجی جیندا بنیادی مقصد المسیح دی پیدائش ہا۔ حضرت یسوع المسیح دی آمد صرف ہک قوم یا مذہب کیتے نئیں بلکہ اوہ تے سارے جہاں دے انساناں کیتے خدا تعالیٰ دی طرفوں نجات دا نشان بنڑ تے آئے۔ المسیح دی صورت ءچ آسمان توں اوہ تحفہ آیا جیہڑا صدیاں گزرنڑ تُوں بعد وی دلّاں وچ سکون تے امن گھن آندے۔
کرسمس دا تہوار ساکوں سکھیندے جو سچّی خوشی گھنڑ ءچ نئیں بلکہ ڈیون ءچ ہے جینویں خدا تعالیٰ انساناں نال محبت کرتے المسیح دی صورت ءچ ساکوں ہک قیمتی تحفہ ڈتے، اونویں ای ساکوں وی چاہیدی جو اساں وی آپنڑے دِل نال ڈوجہے لوکاں نال محبت رکھوں۔