ناظرین ایہہ گالھ واضع ھِے   جوخدا نیں  آدم کوں اپنڑی شکل و صورت تے پیدا کیتا خدادے پاک کلام ءچ  لکھیا ہے  جو خدا نیں انسان کوں اپنڑی صورت تے  اپنڑے آلی کار بنڑائے(کتابِ پیدائش 1۔26) تے خدادی صورت تے پیدا
کیتا تے ایہو ہک امر ہا جیہڑا دنیا دے سردار کوں برداشت نہ تھی سگدا ہاجوانسان  خدادی صورت تے بنڑےایں واسطےاو نیں موقع پاتے اماں حوا کوں ورغلایا تے اوندے وسیلے نال  آدم تے وی غالب آیا جیندے باعث آدم خدا دی صورت تے نہ ریہا او ندی
صورت وگڑ گئی لیکن الہی محبت نیں وی ایں موقع تے جوش ماریا تے جےکر آدم تے حوا کوں انھاں دے گناہ دی سزا ڈتی گئی پر   باغِ عدن ءچ وعدہ وی عطا کیتا  گیا جوعورت دی نسل ناگ دے سر کوں کچلیسی تے   یسوع المسیح بی بی مریم
دے بطنِ مبارک توں پیدا  تھئے جینویں جو انجیل ءچ مرقوم ھِے ۔

جڈاں دنیا دے سردار نیں ایہہ  ڈیٹھا تاں او نیں الہی مولود کوں صفحہ ہستی توں نیست کرنڑدی کوشش ہیرودیس دے وسیلے نال کیتی ۔بیت لحم تے اوندے آسوں  پاسو ں دے سارے معصوم بال قتل کر ڈتے  گئے پر خدا نیں الہی بال کوں محفوظ رکھیا
ایہہ بال ودھدا گیا تےاپنڑے عالم شباب کوں اپڑیا پر  دنیا دے سردار نیں اوندا پیچھا نہ چھوڑیا بلکہ مردِ میدان بنڑ تے اوندے سانمنڑے آیا تے ترے آزمائشاں اوندے سانمنڑے رکھ ڈتیاں  پر  یسوع المسیح    اوں مرحلے تے
وی اونکوں شکست ڈیندے ہیں تے اپنڑے باپ  دی خدمت ءچ مصروف تھی ویندے ہین تے اپنڑے باپ دی مرضی کوں پوراکرنڑ  کیتے ہر مشکل برداشت  کریندے  ہین جیں ویلے یسوع المسیح    اپنڑی زمینی زندگی دے آخری ہفتہ ءچ قدم
رکھیندے ہین تاں دنیا دا سردار اوں موقعے تے تہاڈے سانمنڑے آندا ھےِ تے آپ اوندا سر صلیب اتے کچل تے رکھ ڈیندے ہین تے سارے انساں  دے گناہاں دا فدیہ ڈیونڑ تے ترے ڈینہہ تئیں عالمِ ارواح ءچ رہونڑ دے بعد زندہ تھی ویندے ہین تے چالیہہ ڈینہہ
تئیں   آپنڑے شاگرداں کوں ڈیکھائی ڈیندے ریہے تے وَل آسمان تے تشریف   گھن گئے ۔

صلیب تے شکست کھاونڑ توں  بعد دنیا دے سردار کوں ہک بئی گالھ سُجھی جو یسوع  المسیح دے زندہ تھیونڑ دی خبر غلط قرار ڈیواوے متی انجیل دے 28 باب ءچ ایں امر دا تذکرہ موجود ھِے پر سچائی دے سامنڑے اوندی پیش نہ چلی تے او نیں
المسیح دی  صلیبی موت    تے  اوندے زندہ تھیونڑ دا  انکار کیتا تے یسوع  المسیح دے بارے ءچ مشہور کیتاجو اوندی  قبر کہیں شہر ءچ ہے  تاں جو کفارہ دی غلط تعلیم ڈے تے بنی آدم کوں گمراہ کیتا
ونج سگے۔

ایں واقعہ تے میں ایہہ وی عرض کرنڑاں مناسب سمجھدا  ہاں جو خدا تےدنیا دے سردار دے درمیان ہک روحانی جنگ جاری ھِے تے ایہہ جنگ تا قیامت جاری راہسی لیکن حضرت انسان دا فرض  ھِے جو او ہ اپنڑے خالق و مالک دی یاد ءچ راہوے تے دنیا دے
سردار نال  جنگ  لڑداراہوے کیوں جو اساں جانڑدے ہیں جو آخر دنیا دے سردار نیں شکست کھاونڑی ھِے  ۔

دنیا دا سردار الہی صورت کوں جئیں تے آدم بنڑایا گیا ہا وگاڑنڑ ءچ کامیاب تھیا تے الہی محبت نیں جوش ماریا تے یسوع المسیح دی آمد دا ا وہ وعدہ باغِ عدن ء چ آدم کوں ڈتاگیا تے عبرانیاں دامصنف اوندی آمد دا  ذکر کریندا ھِے ۔

اگلے زمانہ ءچ  خدانیں آباؤاجداد نال حصہ بہ حصہ تے انبیا کرام دے ذریعے کلام کر تے ایں زمانے  دے آخر ءچ آپنڑے ازلی محبوب دے ذریعے کلام کیتا جنیکوں  خدانیں ساریاں چیزاں دا وارث ٹھہرایا تے اوندے وسیلے نال اونیں عالم وی خلق
کیتے اوہ خدا دی بزرگی دا عکس تے انہاں دی ماہیت دا عین نقش تھی تے ساریاں چیزاں کوں اپنڑی قدرت دے کلام نال سنبھلیندے ہین اوہ گناہاں توں پاک کر تے عرش معلیٰ تے خدا دے سجے پاسے ونج بیٹھے تے فرشتیاں توں اتنا  بزرگ  تھی گئے جتنا
میراث ءچ انہاں  توں افضل ناں پاتا ( خط عبرانیوں 1۔1)

یسوع المسیح دے آونڑ دا مقصد ایہو ہا  جو اوہ انسان کوں اوندی شکل و صورت تے از سر نو قائم کر ڈیوے ۔ یوحنا رسول اپنڑی انجیل دے پہلے باب ءچ ایں امر دا ذکر کریندا ھےِ جتنیاں نیں اونکوں قبول کیتا او نیں انھاں  کوں خدادے پوتر ہونڑ دا
شرف عطا کیتا او ہ نہ خون نال نہ جسم نال نہ انسان دے ارادے نال بلکہ خداتوں پیدا تھئے ہین  یوحنا اپنڑے پہلے خط ءچ رقم طراز ھےِ جو جیہڑا  خداتوں پیدا تھیا گناہ کر ای نیں سگدا۔

کجھ عرصہ پہلےہک مضمون  میڈی نظر توں گزریا جیندا عنوان ہا کرسمس جئیں ءچ نامہ نگار نیں ایں امر کوں آشکارا کرنڑ دی کوشش کیتی جو 25 دسمبر یسوع المسیح دا یومِ ولادت  نئیں  ۔ میں ایں تفصل ءچ ونجنڑاں نیں  چاہندا لیکن اتنا
عرض کیتے بغیر نئیں رہِ سگدا جو شروع دی کلیسیا نیں 25دسمبر کوں یومِ ولادت المسیح مقرر کیتا تے اوندے مطابق یسوع ا لمسیح دے پیرو کار ہر سال 25 دسمبر کوں یومِ ولادت المسیح منیندے ہین مضمون نگار ایں امر  توں انکار ی نئیں تھی سگدا جو
یسوع المسیح ایں دنیا ء چ آئے تے انھاں نیں بی بی مریم  دے بطن مبارک توں جنم گھدا بس ایں صورت ءچ  مسیحانِ عالم دا فرض ھِے  جو اپنڑے منجی دی پیدائش دی یاد گار مناونڑ بلکہ بقول یسوع المسیح دے جو جیندے بہوں گناہ معاف تھئے او ہ
بہوں پیار کریندا ھِے تے جیندے تھوڑے  او ہ تھوڑا ۔جیں نیں یسوع المسیح توں برکتاں حاصل کیتیاں اوندی محبت یسوع المسیح نال  اونویں ای ہوسی جڈاں جو ساڈا ایہہ ایمان ھےِ جو اونیں ساڈے گناہاں دا فدیہ ڈتاھِے او ہ ساڈے واسطے مصلوب تھیا
ہے۔ اوندے مار کھاونڑ نال ساکوں شفاملی  ھِےتے اوندی پیدائش دی یاد گار مناونڑ ہر مسیحی ا تے فرض ھِے البتہ خوشی مناونڑ دے طریقیاں تے گالھ تھی سگدی ھِے متی دی انجیل ءچ ہک ایجھی خوشی مناونڑ دا ذکرموجود ھےِ جئیں خوشی مناونڑ دا انجام
یوحنا بپتسمہ دی موت تھیا بعض  اوقات ساڈیاں خوشیاں ساڈے کیتے آزمائش پیدا کریندیاں ہین بس مسیحیاں دی خوشی ایں موقع تے نرالی خوشی ہونڑی چاہیدی ھےِ جو بنی آدم دیاں دیگر خوشیاں توں بالا تر ہوے ۔

مقدس شمعون نیں اپنڑا کرسمس کیویں منایا ؟ اونکوں جڈاں ایہہ  خبر ملی جو یسوع المسیح بیت لحم ءچ موجود ہین تاں اونیں  اپنڑی خوشی کینویں منائی لکھیا ھےِ جو او ہ بیت لحم ء چ تشریف گھن گئے تے یسوع المسیح کوں اپنڑی جھولی ءچ گھن تے خدا
دی تعریف کرتے آکھیا اے مالک  ہنڑتوں اپنڑے غلام کوں اپنڑے قول دے موافق سلامتی نال  رخصت کر یندا ہیں کیوں جو میں تیڈی نجات ڈیکھ گھدی ھِے ۔

مسیحی خوشی دا آغاز بیت لحم  توں شروع تھیندا ھِےتے ایں کیتے سارے مسیح  اپنڑے  خداوند  مسیح دی یاد منیندے ہین تے اوندی عبادت کریندے تے شکر گزاری کریندے ہین تے مقدس پولوس آہدھے جو اے بالو تہاڈی طرفوں میکوں وَل جاونڑ دے
درد لگے ہین جئیں تئیں جو المسیح تہاڈے ءچ صورت نہ پکڑے تے ہک مسیحی دی حقیقی خوشی ایں گالھ ءچ پوشیدہ ھِے جو یسوع المسیح تہاڈے ءچ صورت پکڑے تے تساں المسیح ءچ صورت پکڑو ۔یسوع المسیح نیں اوں وگڑی ہوئی صورت کوں ولا بحال کر ڈتاھےِ  انسان
از سر نوخدا  دی صورت تے تھی گیا پر  ضرورت ایں امر دی ھِے جو مسیح تہاڈےءچ صورت پکڑے ،تے ایہو میڈا کرسمس ھِے۔

اختتام